ချင်းပြည်နယ်မြောက်ပိုင်း ကနေဒီတောင်ခြေတွင် အကြမ်းဖက်စစ်ကောင်စီတပ်နှင့် ဒေသကာကွယ်ရေးတပ်ဖွဲ့တိုကြား ထိတွေ့တိုက်ပွဲဖြစ်ရာ စစ်ကောင်စီတပ်သား နှစ်ဦးသေဆုံးပြီး ပြည်သူ့ဘက်တော်သားတစ်ဦး ပြင်းထန်စွာဒဏ်ရာရခဲ့သည်ဟု ကာကွယ်ရေးတပ်ဖွဲ့များက ထုတ်ပြန်သည်။
ယနေ့(နိုဝင်ဘာ ၅ ရက်) ညနေ ၃နာရီခွဲတွင် နှစ်ဖက်ထိတိုက်ပွဲဖြစ်ပွားခဲ့ခြင်းဖြစ်ပြီး အကြမ်းဖက်စစ်ကောင်စီတပ်ကို ဒေသကာကွယ်ရေးတပ်များဖြစ်သည့် CDF KKG (CDM Siyin) နှင့် PDF Zolandတို့က ပူးပေါင်းတိုက်ခိုက်ခဲ့ခြင်းဖြစ်သည်။
ထိုတိုက်ပွဲတွင် အကြမ်းဖက်စစ်သားနှစ်ဦးသေဆုံးပြီး ကျန်နှစ်ဦးမှာ ဒဏ်ရာရကာ ထွက်ပြေးသွားသည်ဟု ဒေသကာကွယ်ရေးတပ်များက ဆိုသည်။ ထို့အပြင် သေနတ်နှစ်လက်သိမ်းဆည်းရမိပြီး ကာကွယ်ရေးတပ်ဖွဲ့တစ်ဦးလည်း ပြင်းထန်စွာ ဒဏ်ရာရရှိခဲ့သည်ဟု ထုတ်ပြန်သည်။
အကြမ်းဖက်စစ်တပ်သည် ကနေဒီတောင်ထိပ်တွင် စစ်စခန်းဖွင့်လှစ်ထားပြီး ထိုစခန်းမှ အကြမ်းဖက်စစ်သားလေးဦးဆင်းလာစဉ် ဒေသခံကာကွယ်ရေးတပ်များက ပူးပေါင်းတိုက်ခဲ့ခြင်းဖြစ်သည်။
Public Service Announcement
အကြမ်းဖက်စစ်ကောင်စီတပ်သားများသည် ကလေး- ချင်းတောင်လမ်းမများတွင် စစ်စခန်းများဖွင့်လှစ်ပြီး ဒေသခံများထံမှ ငွေကြေးကောက်ခံမှုများ၊ ပစ္စည်းလုယက်မှုများလည်း ပြုလုပ်နေသည်ဟု ဒေသခံများကပြောသည်။
CDF KKG (CDM Siyin) ဒေသကာကွယ်ရေးတပ်သည် တီးတိန်မြို့နယ် ဖလမ်းမြို့နယ်နှင့် ကလေးမြို့နယ်အစပ်ရှိ စီးယင်းလူမျိုးကို အခြေပြုဖွဲ့စည်းထားသည့် တပ်ဖွဲ့တစ်ခုဖြစ်သည်။ PDF Zolandသည် တီးတိန်မြို့နယ် ကလေးမြို့နယ်နှင့် တွန်းဇံမြို့နယ်များရှိ ဇိုလူမျိူးများကို အခြေပြုဖွဲ့စည်းသည် ဒေသကာကွယ်ရေးတပ်ဖွဲ့တစ်ခုဖြစ်သည်။
