ဒီးမော့ဆိုမြို့အနောက်ဘက်ခြမ်းရှိ တွင်းနက်ကြီး ဆက်လက်ပြိုကျနေ

ဧပြီ ၆၊၂၀၂၅။ရဲခေါင်/People’s Spring

ငလျင်လှုပ်ခတ်မှုအပြီးဖြစ်ပေါ်လာသည့် ကရင်နီပြည်နယ်၊ ဒီးမော့ဆိုမြို့အနောက်ဘက်ခြမ်းရှိ တွင်းနက်ကြီးမှာ ဆက်လက်ပြိုကျနေကြောင်း ဒေသခံအချို့က ပြောသည်။

စစ်ကိုင်းမြို့နယ်ဗဟိုပြုသည့် အင်အားပြင်ငလျင်လှုပ်ခတ်မှုအပြီး တစ်ရက်အကြာ မတ်လ ၂၉ ရက်တွင် အသေးစားမြေကြီးအက်ကွဲမှုကစအပြု၍ ဧပြီ ၁ ရက်တွင် တွင်းနက်ကြီးဖြစ်လာခဲ့သည်ဟု အသိပေးသည်။

“သဲတောင်လို ပုံစံမျိုးဆိုတော့ တွင်းရဲ့အတွင်းထဲက ပတ်ပတ်လည်က သဲတွေတော်တော်ကျနေတာ။အပေါ်ဘေးပတ်ပတ်လည်မှာလည်း နည်းနည်းစီကျနေတယ်။အလယ်က အကျယ်ကတော်တော်သိသာတယ်”ဟု ဒီးမော့ဆို မြို့နယ်အနောက်ဘက်ခြမ်းဒေသခံက တွင်းနက်ဆက်လက်ပြိုကျမှုအပေါ် ရှင်းပြသည်။

Public Service Announcement

အနက်နှင့် အကျယ် ပေ ၁၀၀ကျော်တွင်းနက်သည် ဒေသခံများ၏ နေအိမ်များနှင့် ပေ ၂,၂၀၀ခန့် အကွာအဝေးရှိကြောင်း သိရသည်။

“လူနေအိမ်အများစုနဲ့တော့ မီတာ ၇၀၀ကျော်လောက်တော့ ဝေးနေသေးတယ်။နေ့တိုင်းတော့ စောင့်ကြည့် နေကြတာပဲ။သက်ဆိုင်သူတွေကတော့ အနီးတဝိုက် မသွားဖို့တော့ သတိပေးတယ်။ခပ်ခွာခွာက သွားကြည့် ရတာပေါ့”ဟု ဒေသခံရဲဘော်တစ်ဦးက ပြောသည်။

ထိုကဲ့သို့ သဘာဝအလျောက်ဖြစ်လာစေသည့် တွင်းမျိုးသည့် ဒီးမော့ဆိုနှင့် ဖရူဆိုမြို့နယ်တို့တွင် မကြာခဏ ဖြစ်လေ့ရှိသော်လည်း ယခုထွက်ပေါ်သည့် တွင်းသည် မြေငလျင် ကြောင့် ဖြစ်သည်ဟု ယူဆရပြီး ပိုမိုကြီးမားကြောင်းလည်း ကရင်နီပြည်ကြားကာလအုပ်ချုပ်ရေးကောင်စီ၏ တွဲဖက်အတွင်းရေးမှူးဖြစ်သူ ဦးဗညားက လူထုနွေဦးသို့ ပြောထားသည်။

ဖြစ်စဥ်နှင့်ပတ်သက်၍ Sinkhole(မြေပြင်မျက်နှာပြင်အောက်က ကျောက်လွှာတွေ (သို့) မြေလွှာတွေ ပြိုကျပြီး မြေပြင်ပေါ်မှာ ရုတ်တရက်ချိုင့်ခွက်ကြီးဖြစ်ခြင်း)အသေးစားဖြစ်လာခြင်းဟု မိုးလေဝသ ပညာရှင် ဦးဝင်းနိုင်က ၎င်း၏ လူမှုကွန်ရက်မှတဆင့် အသိပေးထားသည်။