–ဒီမိုကရေစီနည်းကျ အရပ်သားအစိုးရစနစ်ကိုပြန်သွားဖို့ ပြင်သစ်သံအမတ်ကြီးတောင်းဆို
မြန်မာစစ်တပ်က စွပ်စွဲတဲ့ ရွေးကောက်ပွဲမဲမသမာမှုတွေဟာ အထောက်အထားခိုင်လုံမှု လုံး၀မရှိတဲ့အတွက် စစ်အာဏာသိမ်းမှုကို ရှုတ်ချတယ်လို့ ဗြိတိန်နိုင်ငံခြားရေးဝန်ကြီး Liz Truss က ဒီနေ့ (နိုဝင်ဘာ ၈ ရက်) ထုတ်ပြန် ကြေညာပါတယ်။
၂၀၂၀ ရွေးကောက်ပွဲ (၁)နှစ်ပြည့်နှစ်ပတ်လည်နေ့မှာ ဗြိတိန်နိုင်ငံခြားရေးဝန်ကြီးက “စစ်တပ်ရဲ့ စွပ်စွဲချက်တွေဖြစ်တဲ့ မဲမသမာမှုတွေဟာ အထောက်အထားခိုင်လုံမှု လုံးဝမရှိတဲ့အတွက် စစ်တပ်အာဏာသိမ်းမှုကို ရှုတ်ချကြောင်း ယူကေအစိုးရက ထပ်လောင်းပြောကြားလိုပါတယ်” လို့ ဆိုပါတယ်။
ပြီးခဲ့တဲ့ ရွေးကောက်ပွဲမှာ မြန်မာပြည်သူလူထုဟာ ကာလရှည်ကြာစွာတည်ရှိနေတဲ့ ဒီမိုကရေစီ ဆန္ဒကို ရှင်းရှင်း လင်းလင်း ဖော်ပြနိုင်ခဲ့တယ်လို့ ဗြိတိန်နိုင်ငံခြားရေးဝန်ကြီးရဲ့ကြေညာချက်မှာ ဖော်ပြပါတယ်။
Public Service Announcement
ဒါ့အပြင် မြန်မာနိုင်ငံမှာ ဒီမိုကရေစီ ပြန်လည်ရှင်သန်ရေးအတွက် စစ်တပ်အနေနဲ့ အကြမ်းဖက်မှုတွေအဆုံးသတ်ပြီး နိုင်ငံရေးအကျဉ်းသားတွေကိ လွှတ်ပေးရမယ့်အပြင် တွေ့ဆုံဆွေးနွေးရေးလုပ်ဆောင်ရမယ်လို့ ဗြိတိန်နိုင်ငံခြားရေးဝန်ကြီးက တိုက်တွန်းပါတယ်။
၂၀၂၀ အထွေထွေရွေးကောက်ပွဲတစ်နှစ်ပြည့်နဲ့ပတ်သက်လို့ အမေရိကန်၊ ဗြိတိန်၊ နော်ဝေ နိုင်ငံခြားရေးဝန်ကြီးတွေက ရွေးကောက်ပွဲရလဒ်ကိုအသိအမှတ်ပြုပြီး စစ်တပ်အနေနဲ့ မြန်မာပြည်သူတွေရဲ့ ဆန္ဒကို လေးစားဖို့၊ အကြမ်းဖက်မှုတွေကို ရပ်တန့်ဖို့၊ ဖမ်းဆီးထိန်းသိမ်းခံနိုင်ငံ့ခေါင်းဆောင်တွေကိုပြန်လွှတ်ပေးဖို့နဲ့ ဒီမိုကရေစီလမ်းကြောင်းပေါ်ပြန်သွားဖို့ တိုက်တွန်းထုတ်ပြန်ကြပါတယ်။
ထို့အပြင် မြန်မာနိုင်ငံဆိုင်ရာ ပြင်သစ်သံအမတ်ကြီး Mr. Christian Lechervy ကလည်း ပြီးခဲ့တဲ့ ၂၀၂၀ ရွေးကောက်ပွဲမှာ မြန်မာပြည်သူတွေဟာ ဒီမိုကရေစီနဲ့ လွတ်လပ်ခွင့်အတွက် သူတို့ရဲ့ဆန္ဒကို ထုတ် ဖော်ပြသခဲ့ကြောင်းနဲ့ ဒီမိုကရေစီနည်းကျ အရပ်သားအစိုးရစနစ်ကိုပြန်သွားဖို့ တောင်းဆိုကြောင်း ထပ်လောင်းပြောကြားပါတယ်။
မြန်မာပြည်သူတွေရဲ့ တရားဝင်မှုစိတ်ဆန္ဒတွေကို လေးစားဖို့ ပြင်သစ်သံအမတ်ကြီးက တိုက်တွန်းပါတယ်။
