မေ-၁၊ ၂၀၂၅။ ကျော်ဇော/People’s Spring
ငဖဲမြို့နယ်၊ မင်းဘူး-အမ်းလမ်းရှိ နတ်ရေကန် လေကြောင်းရန်ကာကွယ်ရေးတပ်စခန်း၏ ကာကင်းစခန်းဖြစ်သော ပဇီရွာဘုန်းကြီးကျောင်းမှ စစ်ကောင်စီတပ်သားများ လမ်းလုံခြုံရေးယူရန်ထွက်လာစဥ် ကြားဖြတ်တိုက်ခိုက်ခဲ့ကြောင်း အရှိုချင်းကာကွယ်ရေးတပ်(CDF-Asho)မှ တာဝန်ရှိသူတစ်ဦးက ပြောသည်။
ယမန်နေ့(ဧပြီ ၃၀ ရက်)နံနက် ၈ နာရီခန့်ကငဖဲမြို့နယ်၊ ပဇီရွာတပ်စခန်းမှ လမ်းလုံခြုံရေးယူရန်လာသော အင်အား ၂၀ ခန့်ပါ စစ်ကောင်စီတပ်သားများကို ဖြတ်တောက်တိုက်ခိုက်ခဲ့ခြင်းဟု၎င်းတာဝန်ရှိသူက ပြောသည်။
တိုက်ခိုက်မှုအတွင်း စစ်ကောင်စီတပ်သား ၉ ဦး ပွဲချင်းပြီးသေဆုံး၍ MA အမျိုးအစားသေနတ် ၉ လက်၊ ကျည်ဘောက်နှင့် ခဲယမ်းများအပါ အဝင် လက်နက်ကြီးကျည်များလည်းရရှိခဲ့ကြောင်း အရှိုချင်းကာကွယ်ရေးတပ် (CDF-Asho)က အသိပေးသည်။
Public Service Announcement
တိုက်ခိုက်မှုအခြေအနေအပြည့်အစုံအား သိရှိနိုင်ရန် လူထုနွေဦးက အရှိုချင်းကာကွယ်ရေးတပ် (CDF-Asho)ထံ ဆက်သွယ်ခဲ့သော်လည်း ခရီး သွားနေသည်ဖြစ်၍ နောက်မှသာဖြေကြားပေးနိုင်မည်ဟု အကြောင်းပြန်ကြားခဲ့သည်။
နတ်ရေကန် လေကြောင်းရန်ကာကွယ်ရေးတပ်စခန်း၏ ကာကင်းစခန်းဖြစ်သောပဇီရွာဘုန်းကြီးကျောင်း၌ စစ်ကောင်စီ ကပစ များဖြစ်သော ကပစ(၂)၊ (၁၀)၊ (၁၃)နှင့် (၁၄)တို့အပြင် တပ်မ (၉၉)တပ်များအပါအဝင် အင်အား ၁၃၀ ခန့် အထိုင်ချတပ်စွဲထားခြင်းဟု CDF-Asho က အသိပေးသည်။
