မေ ၁၊၂၀၂၅။ဇေအောင်၊ရဲခေါင်/People’s Spring
မန္တလေးတိုင်း၊ မြင်းခြံမြို့နယ်၊ ဆီမီးခုံမြို့မှာ ကင်းပတ်လာတဲ့ စစ်အုပ်စုကို တိုက်ခိုက်ခဲ့ရာမှာ ဗိုလ်တဦးအပါအဝင် ၃ဦး သေဆုံးပြီး သေနတ် ၂လက်သိမ်းဆည်းခဲ့တယ်လို့ Myingyan Black Tiger (MBT) တပ်ဖွဲ့ရဲ့ခေါင်းဆောင် ဗိုလ်မိုက်ခဲက ပြောပါတယ်။
မနေ့က ဧပြီ ၃၀ရက် ည ၈နာရီခန့်က မြင်းခြံမြို့နယ်၊ ဆီမီးခုံမြို့မှာ ကင်းပတ်လာတဲ့ စစ်ကောင်စီတပ်နဲ့ပျူစောထီးတွေကို အနီးကပ်ပစ်ခတ် တိုက်ခိုက်ခဲ့ရာမှာ ဗိုလ်တစ်ဦးနဲ့ ပျူစောထီးနှစ်ဦး သေဆုံးကာ G3 သေနတ် (၂)လက်နဲ့ ကျည် ၁၈တောင့်ရရှိခဲ့တယ်လို့ MBTတပ်ဖွဲ့ခေါင်းဆောင် ဗိုလ်မိုက်ခဲက ပြောပါတယ်။
“သေနတ်က တကယ်တမ်း ၃လက်ရရမှာ။ သေနတ်က ဘယ်လိုမှကောက်မရတော့လို့။ မြို့ထဲဆိုတော့ ပြန်ပစ်တာတွေလည်းရှိတော့”လို့ ဗိုလ်မိုက်ခဲက ဆိုပါတယ်။
Public Service Announcement
တိုက်ခိုက်ခံရပြီးနောက် စစ်အုပ်စုက မြို့ပေါ်မှာ ကင်းပုန်းဝပ်တာတွေရှိတယ်လို့ သိရပါတယ်။
“ဆီမီးခုံမြို့ တံတားကြီးရှေ့ထိပ်နားမှာ ဖြစ်တာ။ဖြစ်စဉ်အပြီး စခ၊ ရခ၊ ပျူတွေ မြို့ထဲမှာ သေနတ်တွေ ပစ်ဖောက်သေးတယ်။ဒီမနက်မှ သေတဲ့သူတွေကို လာသယ်သွားတာ”လို့ ဆီမီးခုံမြိုခံသတင်းရင်းမြစ်က ယမန်နေ့ည ပစ်ခတ်မှု ဖြစ်စဥ်ကိုအပေါ် ပြောပါတယ်။
MBTတပ်ဖွဲ့ဟာ မြို့တွင်းစစ်ဆင်ရေးတွေဖော်ဆောင်နေလို့ ပြည်သူတွေအနေနဲ့ စစ်အုပ်စုနဲ့နီးရာတွေမှာ သွားလာတာမျိုးမလုပ်ဖို့ သတိပေးထားပါတယ်။
ပြီးခဲ့တဲ့နှစ်တွေကလည်း ဆီမီးခုံမြို့ပေါ်က စစ်ဆေးရေးဂိတ်တွေ၊ ကင်းပတ်စစ်အုပ်စုတွေကို ကာကွယ်ရေးအဖွဲ့တွေက မကြာခဏ ဝင်ရောက်တိုက်ခိုက်ခဲ့ဖူးပါသေးတယ်။
