မေ-၆၊၂၀၂၅။ ကျော်ဇော/People’s Spring
တနသ်ာရီတိုင်း၊ ရေဖြူမြို့နယ်၊ နတ်ကြီးစင်ကျေးရွာအုပ်စုအနီး စစ်ကောင်စီတပ်၊ ပျူစောထီးပူးပေါင်းအဖွဲ့များနှင့် တော်လှန်ရေးတပ်ဖွဲ့များ ထိတွေ့တိုက်ပွဲဖြစ်ပွားခဲ့ရာ နှစ်ဖက်ထိခိုက်မှုရှိကြောင်း ပြည်သူ့ကာကွယ်ရေးတပ်မတော် PDF၊ ဒေါနစစ်ကြောင်း(၃)မှ တာဝန်ရှိသူတစ်ဦးက ပြောသည်။
မေလ ၁ရက် နံနက် ၁၀နာရီခွဲခန့်က ဒေါနစစ်ကြောင်း(၃)မှ ရဲဘော်များ နတ်ကြီးစင်ကျေးရွာအုပ်စု၊ စိန်ဘုံကျေးရွာအနီး နယ်မြေရှင်းလင်းရေးသွားစဉ် စစ်ကောင်စီတပ်နှင့် ပျူစောထီးပူးပေါင်းအဖွဲ့၏ ခြောင်းမြောင်းတိုက်ခိုက်ခြင်းခံရပြီး တော်လှန်ရေးရဲဘော်တစ်ဦး ကျဆုံးခဲ့သည်ဟု အထက်ပါ တာဝန်ရှိသူက ပြောသည်။
အဆိုပါနှစ်ဖက်ထိတွေ့ ပစ်ခတ်တိုက်ခိုက်မှုအတွင်း စစ်ကောင်စီဘက်က နှစ်ဦးသေဆုံးပြီး 16-KR သေနတ် တစ်လက်၊ ပစ္စတိုတစ်လက်နှင့် ကျည်ဘောက်နှစ်ခု ဆုံရှုံးခဲ့ကြောင်း ဒေနစစ်ကြောင်း (၃)က အသိပေးသည်။
Public Service Announcement
နှစ်ဖက်တိုက်ခိုက်မှုဖြစ်ပွားနေစဥ် တိုက်ပွဲအနီးရှိ ဘုရားသုံးဆူကျေးရွာမှ (၃၉)နှစ်ခန့်အရွယ် ကိုလင်းထက်နှင့် (၄၀)နှစ်အရွယ် ကိုလှမြင့်ဆိုသူတို့ နှစ်ဦးကို စစ်ကောင်စီတပ်က ဖမ်းဆီးသွားပြီး ပစ်ခတ်သတ်ဖြတ်ခဲ့ကြောင်း ဒေါနစစ်ကြောင်း(၃)မှ တာဝန်ရှိသူက လူထုနွေဦးသို့ ပြောသည်။
“ပစ်သတ်ခံရတဲ့ သူတွေက ဒေသခံတွေ ပါပဲခင်ဗျာ။ စိန်ဘုံအနီးမှာ ဘုရားသုံးဆူ ရွာသားတွေပါ ခင်ဗျာ”ဟု ၎င်းတာဝန်ရှိသူက ပြောသည်။
လက်ရှိအခြေအနေတွင် စစ်ကောင်စီတပ်နှင့် ပျူစောထီးပူးပေါင်းအဖွဲ့များသည် ရေဖြူမြို့နယ်၊ မင်းသားကျေးရွာနှင့် ၎င်းရွာအနီး ဆင်စွယ်ကျေးရွာတို့တွင် အထိုင်ချတပ်စွဲထားပြီး နှစ်ဖက်စစ်ဆိုင်ထားဆဲဖြစ်ကြောင်း ဒေါနစစ်ကြောင်း(၃)ထံမှ စုံစမ်းသိရသည်။
“စကစမှာ စိန်ဘုံမှာ အခြေချ ထားတာမရှိဘူး။ ဘေးရွာ မင်းသားရွာနဲ့ အနီးရွာ ဆင်စွယ်ဖက်ခြမ်းမှာ ရှိနေပါတယ်”ဟု စစ်ကြောင်းတာဝန်ရှိသူက ပြောသည်။
အထက်ပါ ဘုရားသုံးဆူရွာနှင့် စိန်ဘုံကျေးရွာအနီးတွင် စစ်ရေးဆက်လက်တင်းမာလျှက်ရှိရာ ပြည်သူများအနေဖြင့် ထိုကျေးရွာများသို့ ခရီးသွားလာခြင်းများ ရှောင်ကျဉ်ကြရန် ဒေါနစစ်ကြောင်း(၃)နှင့် မဟာမိတ်ပူးပေါင်းတပ်ဖွဲ့များက အသိပေးထားသည်။
