မေ ၁၅၊၂၀၂၅။ သုည/People’s Spring
ရန်ကုန်နဲ့ စစ်ကိုင်းတိုင်းမှာ သပိတ်အဖွဲ့တွေ၊ ဒေသခံပြည်သူတွေက ဒီကနေ့ (မေလ ၁၅)မှာ စစ်အာဏာရှင်ဆန့်ကျင်ရေး ဆန္ဒပြသပိတ်လှုပ်ရှားမှုတွေ အသီးသီး ပြုလုပ်ခဲ့ကြပါတယ်။
ကျောင်းသားကလေးငယ် ၂၀ကျော်သေဆုံးခဲ့ရတဲ့ စစ်ကောင်စီရဲ့ အိုးတိန်တွင်းရွာ လေကြောင်းတိုက်ခိုက်မှုဖြစ်စဉ်ကို ကမ္ဘာနဲ့တဝန်းသိစေရန်ဆိုကာ သရုပ်ဖော်တဲ့အနေနဲ့ Yangon Revolution Force-YRFက ရန်ကုန်မြို့လယ်မှာ သွေးစွန်းကျောင်းလွယ်အိတ်နဲ့ ဖတ်စာအုပ်တွေ လမ်းပေါ် ပုံထားတဲ့ လှုပ်ရှားမှုပြုလုပ်ခဲ့ပါတယ်။
စစ်ကောင်စီရဲ့ လူမဆန်တဲ့ လူမျိုးတုံးသတ်ဖြတ်မှု၊ စစ်ရာဇဝတ်မှုအဖြစ် မှတ်တမ်းတင်နိုင်ဖို့နဲ့ ကလေးသူငယ်တွေ စာသင်ကျောင်းအား လေကြောင်းပစ်မှတ်ထားကာ အကြိမ်ကြိမ် တိုက်ခိုက်မှု ပြုလုပ်လျက်ရှိနေခြင်းကို ကမ္ဘာနဲ့အဝန်းသိရှိနိုးကြားစေရန် ရည်ရွယ်ချက်နဲ့ လုပ်ဆောင်ခဲ့တာလို့ YRFက ဆိုပါတယ်။
Public Service Announcement
စစ်ကိုင်းတိုင်း ယင်းမာပင်မြို့နယ်မှာလည်း အောင်လံလွှင့်မည် ဒေါင်းသွေးနီ သပိတ်စစ်ကြောင်းက မတရားစစ်မှုထမ်းဥပဒေနဲ့ စစ်အာဏာရှင်စနစ်ကို ဆန့်ကျင်ကြဖို့ ချီတက်ဆန္ဒပြခဲ့ပါတယ်။
ယင်းမာပင်မြို့နယ် ကျေးရွာတစ်ရွာမှာလည်း ပြည်သူအားမာန်သပိတ်စစ်ကြောင်းဟာ “စစ်အာဏာရှင်စနစ် ကျရှုံးရမည်” ၊ “သွေးကြွေးမှာဆွေးနွေးစရာမရှိ”၊ “မတရားတဲ့စစ်မှုထမ်းဥပဒေ အလိုမရှိ” စတဲ့ ကြွေးကြော်သံတွေနဲ့ ကြွေးကြော် ဆန္ဒပြခဲ့ကြပါတယ်။
