ဇွန်-၂၊၂၀၂၅။အိမ်သွင်/People’s Spring
မြန်မာနိုင်ငံအထက်ပိုင်း ကချင်ပြည်နယ်မှ မြို့နယ်အချို့၌ရေဘေးကြုံနေစဉ် ကန်ရိုးတန်းဒေသဖြစ်သည့် ရခိုင်ပြည်နယ်တွင်လည်း မိုးသည်းထန်စွာရွာသွန်းပြီးကျောက်တော် နှင့် တောင်ကုတ်မြို့တွင် ရေကြီးနစ်မြုပ်မှုဖြစ်ပေါ်နေသည်။
ကျောက်တော်မြို့နယ်တွင်မေလ ၂၈ရက်မှစ၍ မိုးကောင်းခဲ့ပြီး ဇွန်လ၁ရက် ညမှစတင်ကာ မြေနိမ့်ပိုင်းဒေသများ ရေကြီးနေကာ ပင်လယ်ဒီရေလည်းတက်နေသည်ဟု သတင်းရရှိသည်။
“မိုးကလည်းကောင်း၊ဒီရေကလည်းတက်နေတော့ ရေမြုပ်နေတာမြန်တယ်။ကျောက်တော်-မြောက်ဦးလမ်းလည်းပိတ်သွားပြီ။ဖြတ်လို့မရတော့ဘူး”ဟု ရခိုင်ဒေသခံသတင်းရင်းမြစ်ကပြောသည်။
Public Service Announcement
ကျောက်တော်မြို့နယ်မှစပါးဆိပ်၊ ရွာမပြင်ရွာအပါပဝင် ကျေးရွာ၆ရွာထက်မနည်း ရေဘေးရင်ဆိုင်နေရသည်ဟု သတင်းရရှိသည်။ ထို့အပြင် တောင်ကုတ်မြို့တွင်လည်းမြေနိမ့်ပိုင်းကျေးရွာများနစ်မြုပ်နေပြီးဒေသခံများသည်ကုန်မြင့်နေရာများ၌သွားရောက်တိမ်းရှောင်နေကြရသည်ဟု သတင်းရရှိသည်။
မေလ ၂၉ရက်က ဘင်္ဂလားဒေ့ရှ်ကို ဝင်သွားသော မုန်တိုင်းသည် ကုန်းတွင်းလေဖိအားနည်းရပ်ဝန်းအဖြစ် မြန်မာ-အိန္ဒိယနယ်စပ်အနီးအထိ ဖြတ်နေပြီး ချင်းပြည်နယ်၊ကချင်ပြည်နယ်၊ ရခိုင်ပြည်နယ်၊ စစ်ကိုင်းတိုင်းနှင့်မကွေးတိုင်းတို့တွင် မိုးဆက်ရွာနိုင်ပြီး လျှပ်တပြက်ရေကြီးခြင်းနှင့်မြေပြိုခြင်းများကိုအထူးသတိပြုသင့်ကြောင်းအမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)ကသတ်ိပေးထားသည်။
လက်ရှိတွင် ကချင်ပြည်နယ်၊မြစ်ကြီးနားနားမြို့၊ ဝိုင်းမော်မြို့၊ ဆွမ်ပရာဘွမ်မြို့၊ချီဖွေမြို့၊ပူတာအိုမြို့၊ စစ်ကိုင်းတိုင်းမှ နာဂဒေသတို့တွင်လည်း ရေဘေးနှင့် မြေပြိုမှု ဘေးကြုံတွေ့နေသည်။
ဧရာဝတီမြစ်ရေသည်မြစ်ကြီးနားမြို့၏စိုးရိမ်ရေမှတ်အထက်၌ ၂ လက်မခန့်မြင့်တက်နေသည်။ ဧရာဝတီမြစ်အောက်ပိုင်းဒေသများရေဘေးသတိပြုကြရန် လူမှုကူညီအဖွဲ့များက သတိပေးနေကြသည်။
