'/%3E%3C/svg%3E){kind=small}
ဇွန် ၆၊ ၂၀၂၅။မေရီ/People’s Spring
မန္တလေးမှာ ဒီကနေ့ ညနေပိုင်းက ငလျင်ကောလဟာလကြောင့် အခြေခံပညာကျောင်းတချို့မှာ ရုတ်ရုတ်သဲသဲ ဖြစ်ပွားခဲ့ပါတယ်။
ဇွန်လ(၆)ရက် ညနေ(၄)နာရီခန့်က မန္တလေးမြို့မှာ ငလျင်ကြီးထပ်လှုပ်မယ်ဆိုတဲ့ ကောလဟာလ ပြန့်လာလို့ အခြေခံပညာကျောင်းတချို့မှာ ကလေးတွေကို မိဘတွေက လာရောက်ခေါ်ယူတာကြောင့် ရုတ်ရုတ်သဲသဲ ဖြစ်ပွားခဲ့တယ်လို့ မြို့ခံအချို့က ပြောပါတယ်။
“ကျောင်းအပေါက်ဝမှာမိဘတွေအကုန်စုပြုံရောက်နေတာ။ အကုန်လုံး စိတ်ပူပြီး လာခေါ်ကြတာ။”လို့ အမရပူရမြို့ကကလေးမိဘတဦးကပြောပါတယ်။ ဒါပေမဲ့ ကျောင်းဆင်းချိန်ကျမှသာ ကလေးတွေကို ပြန်လွှတ်လိုက်တယ်လို့ မိဘတွေက ဆိုပါတယ်။
Public Service Announcement
မနေ့ကလည်း နေပြည်တော်မှာ နောက်ဆက်တွဲ ငလျင်လှုပ်ခတ်ပြီးနောက် အခြေခံပညာကျောင်းတွေမှာ မိဘတွေက ကလေးတွေကို လာရောက်ခေါ်ယူခဲ့ရပြီး ကျောင်းဆင်းမပေးတဲ့ ဆရာမတွေကြောင့် ကျောင်းသားမိဘတွေနဲ့ စကားများခဲ့ကြတယ်လို့ မြို့ခံတွေက ပြောပြပါတယ်။
မတ်လ (၂၈)ရက်နေ့က လှုပ်ခတ်ခဲ့တဲ့ စစ်ကိုင်းငလျင်ကြီးကြောင့် အခြေခံပညာကျောင်းတွေမှာ အဆောက်အအုံတွေ ထိခိုက်ပျက်စီးခဲ့ပေမဲ့ စစ်ကောင်စီကတော့ ဇွန်လဆန်းမှာ ကျောင်းဖွင့်စေခဲ့ပါတယ်။
လက်ရှိမှာ စစ်ကောင်စီဟာ အခြေခံပညာကျောင်းတွေကို အတန်းအလိုက်မနက်ပိုင်းနဲ့ နေ့လယ်ပိုင်း နှစ်ပိုင်းခွဲပြီး ကျောင်းတက်ခိုင်းထားတယ်လို့ သိရပါတယ်။
