အစ္စရေးကနေ တရုတ်နိုင်ငံသားတွေ အမြန်ဆုံး ထွက်ခွာကြဖို့ သံရုံးတိုက်တွန်း

အစ္စရေးနိုင်ငံမှာ ရောက်ရှိနေတဲ့ နိုင်ငံသားတွေအားလုံး အမြန်ဆုံး ရွှေ့ပြောင်း ထွက်ခွာကြဖို့ တရုတ်သံရုံးက တိုက်တွန်း ကြေညာခဲ့ပါတယ်။

ဇွန်လ ၁၇ ရက်နေ့မှာ အစ္စရေး နိုင်ငံဆိုင်ရာ တရုတ်သံရုံးရဲ့ ကြေညာချက် ထွက်ပေါ်လာတာဖြစ်ပြီး အီရန်နဲ့ အစ္စရေးကြား အပြင်းအထန် တိုက်ခိုက်နေမှုတွေကြောင့် နိုင်ငံသားတွေ ထွက်ခွာကြဖို့ နှိုးဆော်ထားတာပါ။

လူပုဂ္ဂိုလ် တစ်ဦးချင်းစီရဲ့ လုံခြုံရေးအတွက် အစ္စရေးမှာ ရှိနေတဲ့ တရုတ်နိုင်ငံသားတွေ အနေနဲ့ ကုန်းလမ်းကနေတဆင့် အစ္စရေး နယ်ခြားကို ဖြတ်ကျော်ပြီး ထွက်ခွာကြဖို့ တိုက်တွန်းလိုကြောင်း တရုတ်သံရုံးက WeChatကနေ ကြေညာခဲ့ပါတယ်။

ဖြစ်နိုင်မယ်ဆိုရင် ဂျော်ဒန်နိုင်ငံဖက်ကို ထွက်ခွာကြဖို့လည်း ထောက်ခံ အကြံပြုလိုကြောင်း သံရုံးက ဆိုပါတယ်။

Public Service Announcement

ဆယ်စုနှစ်တွေနဲ့ချီ တင်းမာမှုတွေ ရှိခဲ့တဲ့ အစ္စရေးနဲ့ အီရန်တို့ရဲ့ စစ်ရေးပဋိပက္ခဟာ ပြီးခဲ့တဲ့ သီတင်းပတ်ကုန်မှာ အစ္စရေးက အီရန်ရဲ့ နျူကလီးယားဆိုင်ရာ အဆောက်အအုံတွေ၊ စစ်ရေးပစ်မှတ်တွေကို လေကြောင်းကနေ ပြင်းပြင်းထန်ထန် တိုက်ခိုက်ချိန်မှာ အစပြု ပေါက်ကွဲလာပါတော့တယ်။

တရုတ်သံရုံးက အဲဒီပဋိပက္ခဟာ ဆက်လက် အရှိန်မြင့်တက်လာနိုင်တယ်လို့ ယုံကြည်ရကြောင်းလည်း မှတ်ချက် ပေးထားခဲ့ပါတယ်။

စစ်ရေး ပဋိပက္ခကြောင့် အရပ်ဖက် အခြေခံ အဆောက်အအုံတွေ ထိခိုက်ပျက်စီးတာ၊ အရပ်သားတွေ သေဆုံးတာတွေဟာ ဆက်တိုက် မြင့်တက်လာနေပြီး လုံခြုံရေး အခြေအနေကလည်း ပိုပြီး စိုးရိမ်စရာ ဖြစ်လာနေတယ်လို့ အစ္စရေးနိုင်ငံဆိုင်ရာ တရုတ်သံရုံး ထုတ်ပြန်ချက်ထဲမှာ ဖော်ပြထားပါတယ်။

ကိုးကား: AFP