ဇူလိုင်-၅၊၂၀၂၅။ထားမြတ်/People’s Spring
ချင်းပြည်နယ် တီးတိန်မြို့နယ် မွှာလ်ပီးကျေးရွာ၌ တစ်လခွဲကျော် တပ်စွဲထားသည့် စစ်ကောင်စီတပ်ကို ချင်းတော်လှန်ရေးပူးပေါင်းတပ်က ယနေ့တွင် ထိုးစစ်ဆင်တိုက်ခိုက်ခဲ့ရာ စစ်ကောင်စီတပ်များ ဆုတ်ခွာသွားကြောင်း ချင်းသတင်းရင်းမြစ်က ပြောသည်။
မေလ ၁၈ ရက်တွင်စစ်ကိုင်းတိုင်းကလေးမြို့မှတီးတိန်မြို့နယ် သိုင်းငင်းမြို့ဘက်သို့ ထိုးစစ်ဆင်လာသည့် စစ်တပ်စစ်ကြောင်းကို ချင်းတော်လှန်ရေးပူးပေါင်းတပ်ကခုခံတိုက်ခိုက်ခဲ့ခြင်းဖြစ်သည်။ စစ်တပ်က မွှာလ်ပီးရွာ၌ အခြေချတပ်စွဲပြီး အင်
အားဖြည့်တင်း ထိုးစစ်ဆင်မှုများ ထပ်မံလုပ်ခဲ့သည်။ အဆိုပါ စစ်တပ်ခြေကုတ်တပ်စွဲထားသည့် မွှာလ်ပီးရွာကို ချင်းတော်လှန်ရေးပူးပေါင်းတပ်က ဇူလိုင် ၅ ရက်မနက် ၆နာရီတွင် ထိုးစစ်ဆင်ခဲ့ရာ တနေကုန်တိုက်ပွဲပြင်းထန်ခဲ့သည်ဟု ချင်းသတင်းရင်းမြစ်က ပြောသည်။
Public Service Announcement
“တိုက်ပွဲမှာ စစ်ကောင်စီ တပ်က အထိအခိုက်အကျအဆုံးများစွာနဲ့ ကလေးမြို့အထိ ပြန်ဆုတ်သွားတယ် ထွက်ပြေးသွားတယ်လို့ ပြောတယ်။ ယနေ့(ဇူလိုင် ၅) ညနေပိုင်း ၅နာရီ ဝန်းကျင်မှာအပြီးသတ် သိမ်းပိုက်နိုင်ခဲ့တာဖြစ်ပြီး လက်နက်ခဲယမ်းနဲ့ ရန်သူအလောင်းတွေလည်း သိမ်းဆည်းမိတာရှိပါတယ်လို့ ရှေ့တန်းက သတင်းရတယ်” ဟု ချင်းသတင်းရင်းမြစ်က ပြောသည်။
တိုက်ပွဲတွင်ချင်းအမျိုးသားတပ်ဦး/ချင်းအမျိုးသားတပ်မတော်(CNF/CNA)မှ ရဲဘော် ၁ဦး ကျဆုံးခဲ့သည်ဟု လည်း သတင်းရင်းမြစ်က ပြောသည်။
ချင်းပြည်မြောက်ပိုင်းသို့ ထိုးစစ်ဆင်လာသည့် စစ်ကောင်စီတပ်ကို ချင်းပြည်ကောင်စီ နှင့် ချင်းညီနောင် အဖွဲ့ဝင် ဒေသကာကွယ်ရေးတပ်များ နှင့်အတူ ကလေးမြို့နယ်ရှိ ပြည်သူ့ကာကွယ်ရေးတပ်(PDF) တို့ကပူးပေါင်းတိုက်ခိုက်နေခြင်းဖြစ်သည်။
ချင်းတော်လှန်ရေးပူးပေါင်းတပ်သည် ဇွန်လကုန်ပိုင်းကလည်း မွှာပီးကျေးရွာအနီး စစ်ကောင်စီ ယာယီတပ်စွဲထားသည့် တပ်စခန်း ၃ ခုကို သိမ်းပိုက်ခဲ့ရာ ထိုစဉ်ကလည်း စစ်တပ်မှဘက်က သေဆုံးထိခိုက်မှုများပြီးအထိနာခဲ့ကာ၊ တော်လှန်ရေးရဲဘော်အချို့လည်း ကျဆုံးခဲ့သည်။ ထိုစဉ်ကလည်း စစ်ကောင်စီတပ်ဖွဲ့ဝင် အလောင်းအချို့နှင့်လက်နက်ခဲယမ်းများကိုလည်း ချင်းပူးပေါင်းတပ်က သိမ်းပိုက်ရရှိခဲ့သည်။
စစ်ကောင်စီတပ်သည် ချင်းမြောက်ပိုင်းသို့ ထိုးစစ်ဆင်နေသကဲ့သို့ ချင်းတောင်ပိုင်းသို့လည်း မကွေးတိုင်း ပခုက္ကူမှ တဆင့် အင်အားအလုံးအရင်းဖြင့် ထိုးစစ်ဆင်ရန် ကြိုးပမ်းလျက်ရှိရာလမ်းခုလတ်တွင် တော်လှန်ရေးအင်အားစုများနှင့် တိုက်ပွဲများ ဖြစ်ပွားနေသည်။
