ဇူလိုင်-၂၃၊၂၀၂၆။ထားမြတ်/People’s Spring
ချင်းပြည်နယ်မြောက်ပိုင်း၊ တီးတိန်မြို့နယ် တိုက်ပွဲမှာ စစ်တပ်နဲ့ လက်အောက်ခံ ဇိုမီးတပ်ဖွဲ့ ZRA တပ်ဖွဲ့ဝင် ၆ဦးသေဆုံးခဲ့ကြောင်း PDF ဇိုလဲန်း က သတင်းထုတ်ပြန်ပါတယ်။
ဇူလိုင် ၂၁ရက်က တီးတိန်မြို့နဲ့ ကနေဒီတောင် ကြား ချီတက်လာတဲ့ စစ်ကောင်စီတပ်တွေကို ကြားဖြတ်တိုက်ခိုက်ခဲ့တာလို့ ဆိုပါတယ်။
အဲဒီ တိုက်ပွဲမှာ စစ်တပ်ဘက်က သေဆုံးခဲ့သူ ၆ဦးရှိပြီး အများအပြား ဒဏ်ရာရခဲ့ကြောင်း ဖော်ပြထားပါတယ်။ ဒါ့အပြင် သေဆုံးသူတွေထဲမှာ ZRA တပ်ဖွဲ့ဝင် ၃ဦး ပါဝင်ကြောင်း ZRAက ထုတ်ပြန်ထားပါတယ်။
Public Service Announcement
” စစ်ဆင်ရေးသည် PDF Zoland နဲ့ အကြမ်းဖက်စစ်တပ်ကြားမှ တိုက်ပွဲတစ်ခုသာဖြစ်ကြောင်း ပြည်သူများ သိရှိစေရန် ထုတ်ပြန်ကြေညာလိုက်ပါသည်” လို့ PDF ဇိုလဲန်းရဲ့ ထုတ်ပြန်ချက်မှာ ဖော်ပြထားပါတယ်။
အဲဒီတိုက်ပွဲနဲ့ပတ်သက်ပြီး PDF ဇိုလဲန်း စစ်ဦးစီးချုပ် ကိုဂိဒွန်ထံသို့ ဇူလိုင် ၂၂ရက်က ဆက်သွယ်မေးမြန်းရာ ထုတ်ပြန်ချက်အတိုင်းသာဖြစ်တယ်လို့ ပြောပါတယ်။
PDF ဇိုလဲန်းဟာ ချင်းညီနောင်အဖွဲ့ဝင် ဖြစ်ပြီး တီးတိန်မြို့နယ်အတွင်း မှာ စစ်ကောင်စီအထိနာအောင် တိုက်ခိုက်နေတဲ့ တော်လှန်ရေးတပ်ဖွဲ့ဖြစ်ပါတယ်။ ၂၀၂၅နှစ်ကုန်ပိုင်းက ချင်းမြောက်ပိုင်းကို စစ်ကောင်စီတပ် ထိုးစစ်ဆင်လာချိန်တုန်းကလည်း PDF ဇိုလဲန်းဟာ ချင်းညီနောင်တပ်တွေနဲ့သာမက ချင်းပြည်ကောင်စီ ကာကွယ်ရေးတပ်တွေနဲ့ပါ ပူးပေါင်းပြီး စစ်ကောင်စီကို ခုခံတိုက်ခိုက်ခဲ့တာရှိပါတယ်။
တဖက်မှာ ဇိုမီးတပ် ZRAဟာ စစ်တပ်နဲ့ ပူးပေါင်းပြီး ချင်းမြောက်ပိုင်းမှာ စစ်ရေးလှုပ်ရှားမှုတွေ လုပ်ဆောင်နေတဲ့အဖွဲ့ဖြစ်ပါတယ်။ အရင်ကလည်း ချင်းတော်လှန်ရေးတပ်တွေနဲ့ တိုက်ပွဲဖြစ်ပွားမှုတွေရှိခဲ့ပါတယ်။
အဲဒီ ZRA တပ်ဖွဲ့နဲ့ပတ်သက်ပြီး ZFU/PDF ဇိုလဲန်း တပ်ဖွဲ့က မတ်လ မှာ ကြေညာချက် ထုတ်ပြန်ခဲ့ရာ Zomi Revolutionary Army-Eastern Command(ZRA-EC) ဟာ စစ်ကောင်စီနဲ့ တွေ့ဆုံဆွေးနွေးကာ ပူးပေါင်းဆောင်ရွက်မှုတွေ ပြုလုပ်ခဲ့ကြောင်း ဖော်ပြကာ ZRA ဟာ ပြည်သူ့အကျိုးစီးပွားနဲ့ ရည်မှန်းချက်တွေကို ကိုယ်စားပြုတဲ့ တော်လှန်ရေးအင်အားစုအဖြစ် သတ်မှတ်လို့ မရဘဲ သူတို့ရဲ့ လုပ်ရပ်ဟာ စစ်ကောင်စီ လက်ပါးစေ ဖြစ်သွားပြီလို့ အသိပေးထားပါတယ်။
ZRAဟာ စစ်တပ်အာဏာသိမ်းပြီးနောက်ပိုင်းစစ်တပ်ကို တိုက်ခိုက်ခဲ့ဖူးတာမျိုးမရှိပဲ တော်လှန်ရေးအဖွဲ့တွေကိုသာ တိုက်ခိုက်ခဲ့ဖူးသလို ၊ စစ်တပ်နဲ့ အဆက်အသွယ်ရှိနေတယ်ဆိုတာ ကာလရှည် သတင်းထွက်နေတဲ့ အဖွဲ့ဖြစ်ပါတယ်။
CCအဖွဲ့ဝင် ချင်းတိုင်းရင်းသားတော်လှန်ရေးတပ်ဖွဲ့ဖြစ်တဲ့ချင်းအမျိုးသားတပ်မတော်(CNA) ပြောရေးဆိုခွင့်ရှိသူ ဆလိုင်းထက်နီကလည်း “ZRA eastern Command က အရင်ကတည်းက စကမ နဲ့ ပူးပေါင်းထားတဲ့ အဖွဲအစည်းဆိုတော့ စကမ ခိုင်းသမျှ လုပ်နေတာ ဘာမှ ပြောစရာ မရှိပါဘူး”လို့ ZRA ရဲ့ လုပ်ရပ်တွေနဲ့ ပတ်သက်ပြီး မတ်လ အတွင်းမှာ ပြောထားပါတယ်။
