ဇူလိုင် – ၁၁၊၂၀၂၅ ၊ မေ/People Spring
စစ်ဘေးရှောင်တွေရှိနေတဲ့ စစ်ကိုင်းမြို့နယ်၊လင်းတလူးကျေးရွာကို စစ်ကောင်စီက လေကြောင်းတိုက်ခိုက်ခဲ့တာမို့ ပြည်သူ ၃၀ကျော် သေဆုံးပြီး ဒဏ်ရာရသူများပြားတယ်လို့ ဒေသခံ တွေဆီက သိရပါတယ်။
ဇူလိုင် ၁၁ရက် ဒီနေ့ မနက်စော ၁နာရီကျော်မှာ လင်းတလူးကျေးရွာကို စစ်ကောင်စီက ၂ကြိမ်တိုင် လေယာဉ်နဲ့ ဗုံးကြဲတိုက်ခိုက်ခဲ့တာလို့သိရပါတယ်။
ဗုံးကြဲခံရမှုမှာ ကလေးငယ်တွေအပါအဝင် ပြည်သူ ၃၀ကျော်သေဆုံးကြောင်း ကနဦးသိရပြီး ထိခိုက်ဒဏ်ရာရသူ အများအပြားရှိတယ်လို့သိရပါတယ်။
Public Service Announcement
မနေ့က စစ်ကောင်စီရဲ့ ကင်းထောက်လေယာဉ် တနေ့လုံးနီးပါး စစ်ကိုင်းမြို့နယ်ကို ပျံဝဲခဲ့ပြီး ဒီကနေ့ ဗုံးကြဲခဲ့တာလို့ ဒေသခံတစ်ဦး ကပြောပါတယ်။
“ညက စစ်ကိုင်းဘက်က ည၉နာရီလောက် ကတည်းကအသံတွေ တအုန်း အုန်းကြားတယ်။အုန်းတောကစစ်ကြောင်းလည်း မနေ့ကတည်းကတိုက်ပွဲဖြစ် နေတယ်”လို့ ဒေသခံတစ်ဦး ကပြောပါတယ်။
” ဒီနေ့ 11.7.2025 မနက် ၁ နာရီခန့်မှာ စစ်ကိုင်းမြို့နယ် လင်းတလူးကျေးရွာရှိ စစ်ဘေးရှောင်တွေရှိရာဘုန်းကြီးကျောင်း ၂ ကြိမ် ဗုံးကြဲချတိုက်ခိုက်ခံရ၊ လောလောဆယ် စစ်ဘေးရှောင်ကလေးလူကြီးစုစုပေါင်း ၃၀ ခန့်သေဆုံး၊ နောက်ထပ်သေဆုံးများရှိနိုင်သလို ဒဏ်ရာရလည်းများပြားနိုင်”လို့ အမျိုးသားညီညွတ်ရေးအစိုးရ(NUG)၊ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က သူ့ရဲ့လူမှုကွန်ရက်ကတဆင့် အသိပေးထားပါတယ်။
စစ်ကိုင်းမြို့နယ်မှာ မင်းကွန်း၊မန္တလေး- ရွှေဘိုလမ်း(အုန်းတော)အထွက်တွေမှာ စစ်ကောင်စီတပ် စစ်ကြောင်း တွေရှိနေတာပါ။
