မတ္တရာမြို့နယ်က စစ်တပ် နောက်တန်းစခန်း​တွေကို ​​တော်လှန်​ရေးတပ်​တွေဝင်တိုက်

ဇူလိုင်-၂၀၊၂၀၂၅။​ရှိန်း/People’s Spring

မန္တလေးမြို့နဲ့ ၁၀မိုင်ခန့်အကွာကပုသိမ်ကြီးမြို့နယ်နဲ့ မတ္တရာမြို့နယ်အစပ်က စစ်ကောင်စီ နောက်တန်းအထိုင်စခန်းတွေ ဒီကနေ့ ​တော်လှန်​ရေးတပ်​တွေက ဝင်ရောက်တိုက်ခိုက်ခဲ့တယ်လို့ဒေသခံ တွေက​ပြောပါတယ်။

စစ်ကောင်စီတပ် မတ္တရာမြို့နယ်ကိုစစ်ကြောင်းထိုးဖို့အတွက်နောက်တန်းအထိုင်စခန်းအဖြစ်အထိုင်ထားတဲ့ မြကံသာရွာနဲ့သရက်ကိုင်းရွာအထိုင်စခန်းတွေကို ပြည်သူ့ကာကွယ်ရေးတပ် PDF တွေကဝင်ရောက်တိုက်ခိုက်ခဲ့တာလို့စုံစမ်းသိရပါတယ်။

ဇူလိုင် ၂၀ ရက်နေ့လည်ပိုင်းအထိ စခန်းတစ်ခုကို ထိုးစစ်ဆင် သိမ်းပိုက်ခဲ့ပြီး အခြားစခန်း​တွေကိုလည်းဆက်လက်တိုက်ခိုက်ခဲ့တယ်လို့ တော်လှန်ရေး တပ်ဖွဲ့ဝင်တဦးကပြောပါတယ်။

Public Service Announcement

ဒေသခံတွေရဲ့ပြောကြားချက်အရ ဇူလိုင် ၁၉ ရက်ညပိုင်းက စပြီး ပုသိမ်ကြီးမြို့နယ် မှာ စစ်​ကောင်စီရဲ့ ကင်းထောက် လေယာဉ် တွေဆက်တိုက်ဝဲ နေပြီး ဒီကနေ့ မနက်ပိုင်းမှာလည်း ‌‌‌လေယာဉ် ၄စီးထပ်မနည်း မတ္တရာမြိုနယ်အရှေ့ခြမ်းကို သွားခဲ့တယ်လို့သိရပါတယ်။

“မနေ့က ညအစောပိုင်းမှာ လေယာဉ် တွေဆက်တိုက်သွားတယ်။မနက်မိုးလင်းခါနီး ကင်းထောက်နှစ်စီးဝဲတယ်။ပြီး တော့ မနက်၉နာရီ၊၁၀နာရီအထိ ဆက်တိုက်ကို လေယာဉ် တွေသွားနေတာ”လို့ ပုသိမ်ကြီး မြို့နယ်ဒေသခံ တဦးက ပြောပါတယ်။

စစ်တပ်​နောက်တန်းစခန်းတွေအတိုက်ခံရချိန်မှာစစ်တပ်က​လေ​ကြောင်းက​နေ အကြိမ်​ရေများစွာပစ်ကူ​ပေးခဲ့တယ်လို့ ​ဒေသခံအချို့က​ပြောပါတယ်။

မန္တလေး- မတ္တရာ ကားလမ်းပိုင်းမှာ နေထိုင်သူ တွေကလည်း လူနာတင်ယာဉ် တွေနဲ့ မန္တလေး ဘက်ကို စစ်တပ်က ဒီနေ့ နေ့လည်ပိုင်းမှာအ​လောင်း​တွေလား၊ဒဏ်ရာရသူ​တွေကိုလားမသိရ​ပေမယ့် ပြန်လည်သယ်နေတယ်လို့ ပြောပါတယ်။

စစ်ကောင်စီရဲ့ အလယ်ပိုင်းတိုင်းစစ်ဌာနချုပ်က တိုက်ရိုက်ကွပ်ကဲပြီး မတ္တရာမြို့နဲ့ မန္တလေး ကားလမ်းပိုင်းကိုပြန်ထိန်းချုပ်နိုင်ဖို့ ပြန်မဆုတ်ရအမိန့်နဲ့ ၂၀၂၄ နှစ်ကုန်ပိုင်းက​နေ ဒီ​နေ့အထိ မတ္တရာမြို့နယ်အ​ရှေ့ခြမ်းကိုတိုက်နေချိန် မှာအခုလို နောက်တန်းစခန်း​တွေကို ဝင်တိုက်ခံရတာဖြစ်ပါတယ်။

စစ်တပ်​ထောက်ခံသူတချို့က တိုက်ခိုက်တာကမန္တ​လေးPDFနဲ့ TNLA တပ်ဖွဲ့ဝင်​တွေလို့ ​ပြောဆို​နေကြတာ​တွေ့ရပါတယ် ။ဒါ​ပေမယ့် ဘယ်​တော်လှန်​ရေးအဖွဲ့​တွေက တိုက်ခိုက်တယ်ဆိုတာရယ် ၊ တိုက်ပွဲအခြေအနေတွေကိုတော့ People’s Spring ကသီးခြားအတည်မပြုနိုင်ပါဘူး။

ဒါအပြင် ဇူလိုင် ၂၀ ရက် မနက်မှာရန်ကုန်-မန္တလေး အမြန်လမ်း မိုင်တိုင်၃၁၈အနီးမှာ စစ်​ကောင်စီရဲကားတစ်စီးတစ်စီးကို မြင်းခြံခရိုင် အမှတ်(၄) နဲ့ အမှတ် (၁၀) တပ်ရင်း​တွေက တိုက်ခိုက်တာ​ကြောင့် ရဲ ၂ ဦး​သေဆုံးပြီး ​သေနတ် ၂ လက်နဲ့ခဲယမ်း​တွေ သိမ်းဆည်းရရှိခဲ့တယ်လို့နွားထိုးကြီး PDF ကထုတ်ပြန်ပါတယ် ။

နံနက် ၇ နာရီ​ကျော်မှာတိုက်ပွဲစဖြစ်ခဲ့ပြီးလမ်းယာယီပိတ်ခဲ့သလို နံနက် ၁၀ နာရီ​ကျော်မှာ ကားလမ်းပြန်ပွင့်သွားတယ်လို့ ​ခရီးသွားအချို့က​ပြောပါတယ်။