ကလေးမြို့နယ် ပြည်သူ့ကာကွယ်ရေးတပ်ဖွဲ့(PDF)မှ ဆေးတပ်ဖွဲ့ဝင် အမျိုးသမီးများကို ဖမ်းဆီးသွားသည့်စစ်ကောင်စီတပ်ကိုယနေ့တွင်လည်းဆက်လက် တိုက်ခိုက်နေကြောင်း ကလေး PDFက ထုတ်ပြန်ခဲ့သည်။
နိုဝင်ဘာ၁၆ ရက်က ကလေးမြို့နယ် အနောက်တောင်ကြော တစ်နေရာ ကလေး PDF တပ်ရင်း (၃) တပ်ခွဲစခန်းကို သိမ်းပိုက် တပ်စွဲထားသော အကြမ်းဖက် စစ်ကောင်စီတပ်ဖွဲ့သည် ယနေ့ နံနက် လင်းအားကြီးချိန်မှစ၍ လမ်းကြောင်း တစ်လျှောက် လက်နက်ကြီးများ တရစပ်ပစ်ခတ်၍ နဂါးပွက်ရွာသို့ ပြောင်းရွှေ့လာ ကြောင်း၊ ၎င်းတို့နှင့်အတူ ကလေး PDF တပ်ရင်း(၃) ဆေးတပ်ဖွဲ့မှ ဖမ်းဆီးခံ တပ်ဖွဲ့ဝင်များကိုလည်း ခေါ်ဆောင်လာ ကြောင်းသိရသည်ဟု ထုတ်ပြန်ချက်တွင်ပါရှိသည်။
ကလေး PDF တပ်ဖွဲ့ဝင်များအနေဖြင့် ယနေ့ နံနက် ၁၀နာရီခွဲခန့်တွင် နဂါးပွက်ရွာအတွင်းတပ်စွဲထားသော အကြမ်းဖက်စစ်ကောင်စီတပ်ဖွဲ့များကို သွားရောက် ပစ်ခတ်တိုက်ခိုက်ခဲ့ရာ တိုက်ပွဲဆက်လက် ဖြစ်ပွားနေကြောင်း၊ တိုက်ပွဲဖြစ်ရာနေရာသို့ ကလေးနည်းပညာတက္ကသိုလ်အတွင်း တပ်စွဲထားသည့် အကြမ်းဖက် စစ်ကောင်စီတပ်များက လက်နက်ကြီး ပစ်ကူပေးလျက်ရှိကြောင်းပါရှိသည်။
တစ်ချိန်တည်းတွင် ကလေးမြို့ဘက်မှ စစ်ကူတက်လာသော စစ်ကောင်စီယာဉ်တန်းသည် ချင်းဆိုင်ရွာအနီး ရပ်တန့်၍ စစ်ကြောင်းလျှောက်တက်လာရာတွင် ကလေး PDFတပ်ဖွဲ့ဝင်များက အသင့်တပ်ဆင့်ထားသော မိုင်း ၃လုံးကို ဆက်တိုက် ဖောက်ခွဲတိုက်ခိုက်ခဲ့ရာ စစ်ကောင်စီစစ်သား ၁၅ဦးခန့် ထိမှန်သေဆုံးခဲ့ဟု ထုတ်ပြန်သည်။
Public Service Announcement
နေ့လည်ပိုင်းတွင် အဆိုပါအကြမ်းဖက် စစ်ကောင်စီတပ်များက ချင်းဆိုင်ရွာအတွင်း ဝင်ရောက်၍ နေအိမ်များကို မီးရှို့လျက်ရှိကြောင်းလည်းဖော်ပြထားသည်။
ကလေး PDF တပ်ရင်း(၃) တပ်စခန်းတစ်ခုဝင်စီးခံရစဉ်
မလွတ်မြောက်ဘဲ ကျန်နေသူ အမျိုးသား ၂ဦး၊ အမျိုးသမီး၁၀ဦး စုစုပေါင်း ၁၂ဦး ရှိပြီး ယမန်နေ့က ဆိုရှယ်မီဒီယာတွင် ထွက်ပေါ်လာသော ဓာတ်ပုံများတွင် ပါဝင်မလာသည့် အမျိုးသမီးတစ်ဦးနှင့် အမျိုးသား ၂ဦး ၏ အခြေအနေကို မသိရသေးကြောင်း ကလေး PDF က ထုတ်ပြန်သည်။
ဖမ်းဆီးခံထားရသော ဆေးတပ်ဖွဲ့ဝင်များကို ကယ်ထုတ်နိုင်ရန်အတွက် ပြည်သူ့ကာကွယ်ရေးတပ်ဖွဲ့များကစစ်ကေူင်စီတပ်ကို လမ်းကြောင်းများပိတ်ဆို့၍ တိုက်ခိုက်နေရာတိုက်ပွဲများ ဆက်လက်ဖြစ်ပွားလျက်ရှိ၍ ပြည်သူများအနေဖြင့် လုံခြု့ရေးသတိရှိစွာဖြင့် နေထိုင်ကြစေလိုပြီး ယခုရက်ပိုင်းအတွင်း ကလေး – ဂန့်ဂေါ လမ်းပိုင်းတွင် သွားလာခြင်း လုံး၀မပြုလုပ်ကြရန်လည်း မေတ္တာ ရပ်ခံထားသည်။
“အခုစစ်ရေးအခြေအနေအရ ကလေးတပ်နယ်ကို ဂန့်ဂေါဘက်က စစ်ရေးလာဖြည့်တင်းမှာကို တားဆီးဖို့လုပ်နေကြတယ်။ အခုတော့ ကလေး-ဂန့်ဂေါလမ်းကို ပိတ်ထားတယ်။ ဒါကြောင့် အများပြည်သူတွေ မသွားလာကြဖို့ မေတ္တာရပ်ထားကြတယ်”ဟု ဒေသခံတစ်ဦးက ပြော သည်။
