စက်တင်ဘာ-၉၊ ၂၀၂၅။ဇော်ဝင်း/People’s Spring
မကွေးတိုင်း၊ ထီးလင်းမြို့နယ်မှာ စစ်ကြောင်းထိုးလာတဲ့ စစ်ကောင်စီတပ်ကို တိုက်ခိုက်ခဲ့ရာ သုံးဦးသေဆုံးတယ်လို့ ယောကာကွယ်ရေးတပ် စစ်ဒေသရုံးဦးဆောင်ကော်မတီ -YDFက ထုတ်ပြန်ပါတယ်။
မနေ့က(စက်တင်ဘာ ၈ ရက်) မနက် ၇နာရီလောက်မှာ အင်အား ၈၀နဲ့ ထီးလင်းမြို့နယ် ထန်းပင်ကုန်းကျေးရွာကို စစ်ကြောင်းထိုးလာတာလို့ ဆိုပါတယ်။
အဲဒီစစ်ကြောင်းကို ကြားဖြတ်တိုက်ခိုက်ခဲ့ရာမှာ စစ်ကောင်စီတပ်သား သုံးဦး သေဆုံးပြီး လက်နက်ခဲယမ်းသိမ်းဆည်းရမိမှု မရှိဘူးလို့ အသိပေးပါတယ်။
Public Service Announcement
“ထီးလင်းမြို့ရဲ့ အပေါ်ဘက်ခြမ်းပဲ။ထန်းပင်းကုန်း နဲ့ မြို့ကြားက ပုဏ္ဏားရွာရှိသေးတယ်။မနေ့က ကြားတာတော့ အဲဒီရွာဘက်တိုက်ပွဲ ဖြစ်ပြီး စကစဘက်က မြို့ပေါ်ကို ပြန်ဆုတ်သွားရတယ်”လို့ ထီးလင်း မြို့နယ်ဒေသခံတဦးက ပြောပါတယ်။
တိုက်ခိုက်မှုမှာ တပ်ဖွဲ့ဝင်တွေ အထိအခိုက်မရှိ ခုခံနိုင်ခဲ့တယ်လို့လည်း YDFရဲ့ထုတ်ပြန်ချက်က ဖော်ပြပါတယ်။
စစ်ကောင်စီတပ်နဲ့ ပျူစောထီး ၄၀၀ ဝန်းကျင်လောက်ရှိတဲ့ ထီးလင်းမြို့ပေါ်ကလွဲလို့ မြို့နယ်ဧရိယာအများစုကို တော်လှန်ရေးအဖွဲ့တွေက စိုးမိုးထားပါတယ်။
စစ်ကောင်စီက နယ်မြေပြန်ထိန်းချုပ်ဖို့ ထီးလင်းမြို့နယ်မှာ မကြာခဏစစ်ကြောင်းထိုးတာရှိပေမယ့် မြို့ပေါ်ကိုပဲ ပြန်ဆုတ်ခဲ့တယ်လို့ သိရပါတယ်။ စစ်ကောင်စီဟာ စက်တင်ဘာ ၅ ရက်က လေကြောင်းကနေ ထီးလင်းမြို့ပေါ်ကို စားနပ်ရိက္ခာနဲ့ခဲယမ်းတွေ ဖြည့်တင်းထားပါတယ်။
စစ်ကောင်စီရဲ့ အရေးပေါ်ကြေညာထားတဲ့ ၆၃မြို့နယ်မှာ မကွေးတိုင်းထဲက ထီးလင်း၊ပေါက်၊မြိုင်၊ဆောနဲ့ ရေစကြိုမြို့နယ်တွေ ပါဝင်ပါတယ်။
