ဒီးမော့ဆိုတွင် စစ်တပ် လက်နက်ကြီးပစ်ခတ်မှုကြောင့် မိသားစုဝင်သုံးဦး သေဆုံး

စက်တင်ဘာ−၁၂၊ ၂၀၂၅။ရဲခေါင်/People’s Spring

ကရင်နီပြည်နယ်၊ဒီးမော့ဆိုမြို့နယ်တွင် စစ်ကောင်စီတပ်၏ လက်နက်ကြီးပစ်ခတ်မှုကြောင့် မိသားစုဝင်သုံးဦးသေဆုံးခဲ့ရကြောင်း အရေးပေါ်ကယ်ဆယ်ရေးအဖွဲ့(CTER-Karenni)က ယနေ့ (စက်တင်ဘာ၁၂ရက်) အသိပေးသည်။

စက်တင်ဘာ ၁၁ ရက် ည ၁၀နာရီခွဲခန့်တွင် ဒီးမော့ဆိုမြို့နယ်ရှိ ကျေးရွာတစ်ရွာကို စစ်ကောင်စီတပ်က လက်နက်ကြီးကျည်များဖြင့် ပစ်ခတ်ခဲ့ခြင်းဖြစ်ပြီး နေအိမ်တလုံးပေါ် တိုက်ရိုက်ကျရောက် ပေါက်ကွဲခဲ့သည်ဟု ဆိုသည်။

ကရင်နီပြည်ကြားကာလအုပ်ချုပ်ရေးကောင်စီ IEC ထံမှ ရရှိသည့်အချက်အလက်များအရ ဒီးမော့ဆိုမြို့နယ်အခြေစိုက် ခလရ(၁၀၂)တပ်ရင်း နှင့်ဖရူဆိုမြို့နယ်ရှိ အမှတ်(၁၄)တန်းမြင့်စစ်ရေးလေ့ကျင့်ရေးကျောင်းတို့မှ လက်နက်ကြီးဖြင့် ခြောက်ကြိမ်ပစ်ခတ်ခဲ့ခြင်း ဖြစ်သည်။

Public Service Announcement

ထို့ကြောင့် ဒေါဘျာကူးကျေးရွာမှ နေအိမ်တစ်လုံးထိမှန်ပြီး အဘွားဖြစ်သူ (၉၁)နှစ်အရွယ် ဒေါ်မီမာ၊ လင်မယားနှစ်ဦးဖြစ်သူ (၄၄)နှစ်အရွယ် ဦးငါးရယ်နှင့် (၃၈)နှစ်အရွယ် ဒေါ်စူးမာ ဖြစ်သူတို့ နေရာတွင် သေဆုံးခဲ့ရသည်။

ထို့အပြင် ကျန်ရစ်ခဲ့သည့် (၁၅)နှစ်၊ (၁၂)နှစ်နှင့် (၉)နှစ်အရွယ်တို့ ကလေးသုံးဦးသည် ခြေထောက်နှင့် မျက်နှာတို့တွင် ထိခိုက်မှုများရ၍ ဆေးကုသနေရကြောင်း အသိပေးသည်။

“အသက် ၁၂ နှစ်အရွယ် မီရယ်ထူး”သည် စိတ်ဒဏ်ရာရရှိခဲ့သည်ဟု IEC၏ အချက်အလက်၌ ပါရှိသည်။

“အမြောက်ကျည်တွေ သူတို့အိမ်ကို ကျသွားတယ်။ မိသားစုတစ်စုက သုံးယောက်လုံး တပြိုင်နက်တည်း သေဆုံးမယ်လို့ ဘယ်သူမှ မထင်ခဲ့ကြဘူး။ လူသားမဆန်လောက်အောင် ရက်စက်တာပဲ” ဟု ဒေသခံ တဦးက ပြောသည်။

ဒီးမော့ဆိုမြို့နယ်တွင် စစ်ကောင်စီတပ်နှင့် ကာကွယ်ရေးတပ်ဖွဲ့များအကြား တိုက်ပွဲများ နေ့စဉ် ဆက်လက်ဖြစ်ပွားနေပြီး စစ်တပ်က လေကြောင်းတိုက်ခိုက်မှုများ၊ အမြောက်ပစ်ခတ်မှုများနှင့် ဒရုန်းတိုက်ခိုက်မှုများပြုလုပ်နေသည်ဟု CTER-Karenniက ဆိုသည်။

ထို့အပြင် သြဂုတ်အတွင်း စစ်ကောင်စီ၏ တိုက်ခိုက်မှုများကြောင့် အရပ်သား ၃၅ဦးသေဆုံးပြီး ၅၀ ဝန်းကျင် ဒဏ်ရာရရှိကြောင်း ကရင်နီလူ့အခွင့်ရေးအဖွဲ့ (KnHRG)က ထုတ်ပြန်ထားသည်။