စက်တင်ဘာ၁၆၊၂၀၂၅။သုည/People’s Spring
စစ်ကိုင်းတိုင်းအတွင်း သပိတ်အဖွဲ့တွေ၊ ဒေသခံပြည်သူတွေကစစ်ကောင်စီရဲ့ရွေးကောက်ပွဲကိုသပိတ်မှောက်ကြောင်းနဲ့ ဖမ်းဆီးခံဒေါ်အောင်ဆန်းစုကြည်နဲ့ နိုင်ကျဥ်းတွေလွတ်မြောက်စေဖို့ ဆန္ဒထုတ်ဖော်မှုတွေ ဒီကနေ့ (စက်တင်ဘာ ၁၆)မှာ အသီးသီးပြုလုပ်ခဲ့ပါတယ်။
စစ်ကိုင်းတိုင်း မုံရွာ-အမြင့်လမ်းမှာ သပိတ်ဦးဆောင်ကော်မတီက ပြည်သူလူထုကို နည်းလမ်းပေါင်းစုံနဲ့ ဖိနှိပ်နေတဲ့ စစ်အုပ်စုရဲ့ရွေးကောက်ပွဲကို ရတဲ့နေရာ၊ ရတဲ့နည်းလမ်းနဲ့ ဆန့်ကျင်ပေးကြဖို့ နဲ့ တော်လှန်ရေးကို ရှေ့ဆက်ချီတက်ပါဝင်ကြဖို့ကို တိုက်တွန်းဆန္ဒပြခဲ့ပါတယ်။
ကသာမြိုနယ်မှာလည်း ၅/ကသာ လူထုအောင်လံသပိတ်အဖွဲ့ဝင်တွေဟာ စစ်အာဏာရှင်က မတရားဖမ်းဆီးထားတဲ့ ဒေါ်အောင်ဆန်းစုကြည် အပါအဝင် နိုင်ငံရေးအကျဉ်းသားတွေအားလုံး အမြန်ဆုံး လွတ်မြောက်ပါစေကြောင်း ဆုတောင်းမေတ္တာပို့သခဲ့ပါတယ်။
Public Service Announcement
ယင်းမာပင်မြို့နယ်မြောက်ခြမ်းမှာလည်း နောက်ပြန်မလှည့်ကြေးဒီတော်လှန်ရေးသပိတ်၊ အောင်လံလွှင့်မည်ရွှေရေကြည်သပိတ်တို့က စစ်ကောင်စီရဲ့ ရွေးကောက်ပွဲကို ဆန့်ကျင်ကြောင်း ဆန္ဒထုတ်ဖော်ပြသခဲ့ပါတယ်။
စစ်ကိုင်းတိုင်းအတွင်း စစ်တပ်ကစစ်ကြောင်းတွေထိုးနေတဲ့ ကြားက စစ်အာဏာရှင် ဆန့်ကျင်ရေး ဆန္ဒပြသပိတ်တွေကို နေ့စဉ်ပြုလုပ်နေကြပါတယ်။
