ထားဝယ်မြို့နယ်မှာ စစ်ကြောင်းထိုးနေတဲ့ စစ်ကောင်စီတပ်မှ တပ်သားသစ်တစ်ဦး လက်နက်နဲ့အလင်းဝင်

စက်တင်ဘာ-၁၈၊ ၂၀၂၅။ ကျော်ဇော/People’s Spring

တနင်္သာရီတိုင်း၊ ထားဝယ်မြို့နယ် ပကာရီကျေးရွာဘက်ကို စစ်ကြောင်းထိုးနေတဲ့ စစ်ကောင်စီတပ်မှ စစ်မှုထမ်းသင်တန်းဆင်း တပ်သားတစ်ဦး လက်နက်ခဲယမ်းတွေနဲ့အတူ အလင်းဝင်လာတယ်လို့ ဓဝယ်အ မျိုးသားလွတ်မြောက်ရေးတပ်တော်(DNLA)တာဝန်ရှိသူတစ်ဦးက ပြောပါတယ်။

စစ်ကောင်စီရဲ့ စစ်မှုထမ်းသင်တန်းအပတ်စဥ်(၁၉)ဆင်း တပ်သားရဲသိန်းနိုင်ဟာ စက်တင်ဘာ ၁၃ ရက်မှာ စစ်ကောင်စီတပ်လက်အောက်ကနေ ထွက်ပြေးခဲ့ပြီး DNLA တပ်ဖွဲ့ထံ အလင်းဝင်လာတာလို့ သိရပါတယ်။

အဲဒီစစ်မှုထမ်းသင်တန်းဆင်း တပ်သားရဲသိန်းနိုင်ဟာ ခမရ-၄၀၆ မှာ တာဝန်ချထားခံရသူဖြစ်ပြီး အလင်းဝင်လာချိန်မှာ သူနဲ့အတူ MA1 အမျိုးအစားသေနတ်တစ်လက်၊ ကျည်ဘောက်လေးခု၊ ကျည် ၁၈၀ တောင့်ယူဆောင်လာတယ်လို့ DNLA က အသိပေးပါတယ်။

Public Service Announcement

ဒါကြောင့် တပ်သားရဲသိန်းနိုင်ကို ဓဝယ်အမျိုးသားလွတ်မြောက်ရေးတပ်တော်(DNLA)မှ ကျပ်သိန်း ၅၀ ဂုဏ်ပြုငွေ ပေးအပ်ချီးမြှင့်ခဲ့တဲ့အပြင် ၎င်းသွားရောက်လိုတဲ့ လွတ်မြောက်နယ်မြေတစ်ခုသို့ ပို့ဆောင်ပေးလိုက်တယ်လို့ သိရပါတယ်။

“အခုအလင်းဝင်လာတာကတော့ ထားဝယ်မြို့ကနေ ပကာရီရွာ နယ်မြေရှင်းစစ်ကြောင်းကနေ ထွက်ပြေးလာတာပါ။ ရဲတစ်ယောက်အပါအဝင် ​လေးယောက်ရှိပါပြီခင်ဗျာ”လို့ DNLA တာဝန်ရှိသူက လူထုနွေဦးကို ပြောပါတယ်။

DNLA တပ်ဖွဲ့ထံ တပ်သားရဲသိန်းနိုင်အပါအဝင် လေးဦးမှာ သုံးဦးက လက်နက်နဲ့တကွ အလင်းဝင်လာတာလို့ သိရပါတယ်။

စစ်ကောင်စီတပ်ဟာ ထားဝယ်မြို့နယ်အပါအဝင် ထားဝယ်ခရိုင်ထဲက မြို့နယ်တွေမှာ မြေပြင်စစ်ကြောင်းထိုးတာတွေလုပ်ဆောင်နေသလို မနေ့(စက်တင်ဘာ ၁၇ရက်)ကဆိုရင်လည်း လေယာဥ်နဲ့ ဗုံးပတ်ကြဲတာတွေ လုပ်ခဲ့တာကြောင့် ပြည်သူနှစ်ဦးသေဆုံးပြီး သုံးဦးထက်မနည်း ထိခိုက်ဒဏ်ရာရခဲ့ကြပါတယ်။