ကလေး PDF တိုက်ခိုက်၍ ၅ဦး​သေဆုံးခဲ့သည့် စစ်ကြောင်းကို CDF-KKG ထပ်တိုက်စစ်ကောင်စီတပ်မှ ၂ ဦးထပ်မံသေဆုံး

စစ်ကိုင်းတိုင်း ကလေးမြို့နယ် တောင်ပိုင်း မှန်တောရွာအနီးတွင် ကလေးမြို့နယ် ပြည်သူ့ကာကွယ်ရေးတပ်ဖွဲ့(PDF)က ခြုံခိုတိုက်ခိုက်ခဲ့၍ ၅ဦးသေဆုံးခဲ့သည့် အာဏာသိမ်းစစ်ကောင်စီတပ်ကို ချင်းကာကွယ်ရေးတပ်ဖွဲ့(ကလေး-ကဘော်-ဂန့်ဂေါ၊ CDF-KKG)က ထပ်မံတိုက်ခိုက်ခဲ့၍ စစ်ကောင်စီ တပ်ဖွဲ့ဝင် ၂ဦး ထပ်မံ သေဆုံးခဲ့ကြောင်း CDF-KKGက ထုတ်ပြန်သည်။

ယနေ့ (နိုဝင်ဘာ ၂၃ရက်နေ့) နံနက်ပိုင်းတွင် ကလေးနယ်တောင်ပိုင်း ကြံသာကျေးရွာမှ ခြေလျင်ထွက်ခွာလာသည့် စစ်ကောင်စီတပ်ဖွဲ့ဝင် ၂၀ကျော်ကို မှန်တောရွာအထွက်တွင် PDF-Kalay တပ်ဖွဲ့ဝင်များမှ တိုက်ခိုက်ခဲ့ပြီးနောက် နာရီဝက်ခန့်အကြာတွင် CDF-KKG က ထပ်မံ တိုက်ခိုက်ခဲ့ ခြင်းဖြစ်သည်ဟုဆိုသည်။

CDF-KKG (တပ်ရင်း ၄) တပ်ဖွဲ့ဝင်များက စစ်ကောင်စီတပ်များကို အနီးကပ် တိုက်ခိုက်ခဲ့၍ စစ်ကောင်စီတပ်မှ ၂ဦး သေဆုံးပြီး ဒဏ်ရာရသူအချို့ရှိခဲ့ကြောင်း၊ တိုက်ပွဲဖြစ်နေစဉ်အတွင်း ဟံသာဝတီကျေးရွာမှ စစ်ကောင်စီတပ်က လက်နက်ကြီးများဖြင့် ပစ်ခတ်ခဲ့ကြောင်းထုတ်ပြန်ခဲ့သည်။

CDF-KKG (တပ်ရင်း ၄) တပ်ဖွဲ့ဝင်များ အထိအခိုက်မရှိ အောင်မြင်စွာ ဆုတ်ခွာနိုင်ခဲ့ကြောင်း၊ စစ်ကောင်စီတပ်သည် မှန်တောရွာတွင် ရပ်နားကာ မွန်းလွဲပိုင်းတွင် ကြံသာရွာမှ စစ်ကားတစ်စီးက လာခေါ်သွား၍ ၁၈ ဦးသာ ပြန်ပါသွားကြောင်း မျက်မြင်သက်သေများက အတည်ပြုခဲ့သည်ဟု CDF-KKG၏ ထုတ်ပြန်ချက်၌ ဖော်ပြထားသည်။

Public Service Announcement