စက်တင်ဘာ-၂၅၊၂၀၂၅။ထားမြတ်/People’s Spring
အာဏာသိမ်းစစ်တပ်ရဲ့ ရွေးကောက်ပွဲ ဆန့်ကျင်ကန့်ကွက်ကြောင်း ချင်းညီနောင်က ယနေ့ စက်တင်ဘာ ၂၅ရက်မှာ ကြေညာချက်ထုတ်ပြန်ခဲ့ပြီး ထိန်းချုပ်နယ်မြေအတွင်း ရွေးကောက်ပွဲ ဖြစ်မြောက်ရေး ကြိုးပမ်းတွေကို တားမြစ်ကြောင်း ထုတ်ပြန်ပါတယ်။
ချင်းပြည်နယ် မတူပီ၊ မင်းတပ်၊ ကန်ပက်လက်၊ ဖလမ်းနဲ့ ကျင်ဒွေးမြို့တွေကို သိမ်းပိုက်ထားတဲ့ ချင်းညီနောင်က စစ်ကောင်စီ ရွေးကောက်ပွဲ လက်မခံကြောင်း ဖော်ပြကာ ပြည်သူတွေလည်း စစ်တပ်ရဲ့ ရွေးကောက်ပွဲမှာ ပါဝင်ဆောင်ရွက်ခြင်းမပြုဖို့ မေတ္တာရပ်ခံထားပါတယ်။
ခေတ်အဆက်ဆက် စစ်အာဏာရှင်စနစ်ကြောင့် အဖိနှိပ်ခံ ပြည်သူလူထုတို့ရဲ့ ဘဝဆင်းရဲဒုက္ခကို မငဲ့ဘဲ စစ်တပ်ရွေးကောက်ပွဲမှာပါဝင်ယှဉ်ပြိုင်မယ့် နိုင်ငံရေးပါတီတွေ၊ လွှတ်တော်ကိုယ်စားလှယ်တွေနဲ့ ရွေးကောက်ပွဲဖြစ်မြောက်ဖို့ ကူညီဆောင်ရွက်ပေးတဲ့ ဘယ်သူ့ကို မဆို ပြတ်သားစွာ အရေးယူသွားမည်လို့ ချင်းညီနောင်က သတိပေးခဲ့ပါတယ်။
Public Service Announcement
အာဏာသိမ်းစစ်တပ်ဟာ ပြည်သူလူထုရဲ့ သဘောဆန္ဒမပါဘဲ တရားမဝင်ရွေးကောက်ပွဲ ဖန်တီး ပြုလုပ်ခြင်းဟာ ဒီမိုကရေစီစနစ်ကို ဆန့်ကျင်ပြီး ပြည်သူလူထုရဲ့ အချုပ်အခြာ အာဏာကို အတင်းအဓမ္မ ရယူရန် ကြိုးစားနေခြင်း ဖြစ်တယ်လို့လည်း ဖော်ပြပါတယ်။
စစ်ကောင်စီဟာ ရွေးကောက်ပွဲ ကျင်းပဖို့ ကြိုးပမ်းနေစဉ်ကာလအတွင်း နိုင်ငံရေးအကျဉ်းသားတွေ ဆက်လက်ဖမ်းဆီးထားတာ၊ နိုင်ငံတစ်ဝှမ်းလုံးရှိ အရပ်သားပြည်သူတွေကို ပစ်မှတ် ထားတိုက်ခိုက်တာ၊ စစ်အုပ်ချုပ်ရေးကဲ့သို တင်းကြပ်တဲ့ ဥပဒေများ ချမှတ်ထားတာနဲ့ ပြည်သူ ကိုယ်စားပြုတဲ့ နိုင်ငံရေးပါတီတွေ မပါဝင်တာ စတာတွေကြောင့် စစ်ကောင်စီ ရွေးကောက်ပွဲဟာ လွတ်လပ်မှု၊ တရားမျှတမှုမရှိတဲ့ အတုအယောင်ရွေးကောက်ပွဲသာ ဖြစ်ကြောင်းချင်းညီနောင်က ထုတ်ပြန်ပါတယ်။
စစ်အုပ်စုရွေးကောက်ပွဲဟာ ဒီမိုကရေစီနည်းကျ ရွေးကောက် တင်မြှောက်တဲ့ အစိုးရဖြစ်မလာစေတဲ့အပြင်ရပဋိပက္ခကို ပိုမိုကြီးထွားစေပြီး နိုင်ငံသားတိုင်းတန်းတူမဲ ပေးပိုင်ခွင့်မရှိဘဲ နိုင်ငံရေးအရ ထွက်ပေါက်ရှာတဲ့ စစ်တပ်ရဲ့ ကြိုးပမ်းမှု၊ စစ်အာဏာရှင်စနစ် သက်ဆိုးရှည် ရေးအတွက် ကြိုးပမ်းမှုသာ ဖြစ်တယ်လို့ ဆိုပါတယ်။
ဒါကြောင့် ချင်းညီနောင်အနေနဲ့ မြန်မာတစ်နိုင်ငံလုံးရှိ မိတ်ဖက်တော်လှန်ရေး အဖွဲအစည်းတွေနဲ့ လက်တွဲပြီး ဆန့်ကျင် သွားမယ်လို့ ထုတ်ပြန်ကာ နိုင်ငံတကာအဖွဲအစည်းတွေအနေနဲ့ စစ်တပ်ရဲ့ ရွေးကောက်ပွဲ အားပေး ထောက်ခံခြင်းမပြုဖို့ နှိုးဆော်ထားပါတယ်။
