စက်တင်ဘာ-၃၀၊၂၀၂၅။ဇော်ရမ်း/People’s Spring
ရှမ်းပြည်နယ်တောင်ပိုင်း၊အင်းလေကန်မှာ မိုးသည်းထန်စွာနေချိန်နေအိမ်တစ်လုံးမိုးကြိုးပစ်ခံရပြီးမီးလောင်ခဲ့ပါတယ်။
အင်းလေး၊သပြေပင်ကျေးရွာကနှစ်ထပ်အိမ်တစ်လုံးဟာစက်တင်ဘာလ၃၀ရက်နေ့မနက်ပိုင်းမှာ မိုးကြိုးထိမှန်ခဲ့တာပါ။
“ဟုတ်တယ်ဗျ။အိမ်တည့်တည့်ကိုမှမိုးကြိုးထိတာ။ အိမ်ရှင်တွေကတော့ တော်တော်လေးစိတ်ဓာတ်ကျတာပေါ့ဗျာ။ အကုန်ပျက်စီးတယ်လေ။ ဘာပစ္စည်းမှ ပြန်မရလိုက်ဘူး”လို့ ဒေသခံတစ်ယောက်ကပြောပါတယ်။
Public Service Announcement
စက်တင်ဘာလ၂၉ရက်ညပိုင်းကစပြီး မိုးသည်းထန်စွာရွာခဲ့ပြီး မိုးကြိုးတွေဖြစ်သလို လေပြင်းလည်းတိုက်ခတ်တယ်လို့ ဒေသခံတချို့ကပြောပါတယ်။
“အင်းလေးကဟင်္သာရုပ်လည်းလဲကျပြီး ရေတဲ့မြုပ်သွားတယ်ဗျ။ မိုးကြိုးတွေလည်းပစ်၊ လေပြင်းကလည်းတိုက်ခတ်တော့ စိုးရိမ်ကြတာပေါ့ဗျာ။ ကြောက်နေကြတာပေါ့” လို့ အခြားဒေသခံတစ်ဦးကလည်းပြောပါတယ်။
မိုးကြိုးပစ်ခံရပြီးမီးလောင်တဲ့နေအိမ်မှာစက်တင်ဘာလ၂၉ရက်နေ့ညနဲ့ ဒီနေ့မနက်ပိုင်းမှာ အိမ်ရှင်တွေမနေကြတဲ့အတွက် လူထိခိုက်မှုတော့မရှိခဲ့ဘူးလို့သိရပါတယ်။
အင်းလေးနဲ့ ပတ်ဝန်းကျင်ဒေသတွေဖြစ်တဲ့ရွှေညောင်နဲ့အောင်ပန်းမြို့နယ်တွေမှာလည်း စက်တင်ဘာ ၂၉ ရက်နေ့ကတည်းက မိုးနဲ့လေပြင်းတိုက်ခတ်ခဲ့တာဖြစ်ပါတယ်။ လေပြင်းကြောင့်ကြီးမားတဲ့ ပျက်စီးမှုတွေမရှိပေမယ့် ရေဘေးအန္တရာယ်ကိုဆက်လက် စိုးရိမ်နေရတယ်လို့ ဒေသခံတစ်ယောက်ကပြောပါတယ်။
ဒါအပြင်အင်းလေးကန်ထဲက မြေနီကုန်းကျေးရွာအနီးမှာ ဒေသခံတွေစိုက်ထူထားတဲ့ ဟင်္သာတိုင်ဟာ စက်တင်ဘာလ၂၉ရက်နေ့က လဲကျပြီးရေထဲနစ်မြုပ်သွားခဲ့တာပါ။ ဟင်္သာတိုင်လို့ခေါ်ကြတဲ့ အဲဒီဟင်္သာရုပ်ဟာ ၁၉၆၆ခုနှစ်က စိုက်ထူခဲ့တာဖြစ်ပြီး နှစ်ပေါင်း၆၀နီးပါးရှိပြီဖြစ်ပါတယ်။ ဒေသရဲ့အထင်ကရရုပ်တုတစ်ခု ရေထဲနစ်မြုပ်သွားလို့ နိမိတ်မကောင်းဘူးလို့ယုံကြည်နေသူတချို့လည်းရှိပါတယ်။
” စစ်အာဏာသိမ်းပြီးသွေးစွန်းသောလက် အတ္တမာနကြီးသူများ အသုံးချလှည့်စားမှု အကြိမ်ကြိမ်ပြုလုပ်လာမှုကို နိမိတ်အမျိုးမျိုးပြသခြင်း ၊ တဘောင်များပေါ်ခြင်း၊ ဆရာတော်များထံ သိကြားအိပ်မက်ပေးခြင်း၊ အင်းလေးဒေသတွင်ရေဘေး၊ငလျှင်ဘေး၊ လေဘေး စသည့်ကပ်ဆိုးကြီးတို့ဖြစ်ပေါ်ခဲ့တယ်”လို့ ဆရာကျော်(အင်းလေးသိဒ္ဓိ)ဆိုသူက ရေးသားထားပါတယ်။
ဒါပေမယ့် ဒေသခံအချို့ကတော့ ဟင်္သာတိုင်ဟာ ရာသီဥတုဒဏ်နဲ့ ငလျင်ဒဏ်ကြောင့် နစ်မြှပ်တာဖြစ်တယ်လို့လည်းပြောပါတယ်။
အင်းလေးဒေသဟာ ၂၀၂၄ခုနှစ် မိုးတွင်းကာလကောက် ရာဂီမုန်တိုင်းကြောင့် နေအိမ်ရာချီပျက်စီးခဲ့သလို ၂၀၂၅ မတ်လ၂၈ရက်နေ့က စစ်ကိုင်းနဲ့မန္တလေးကိုဗဟိုပြုပြီးလှုပ်သွားတဲ့ အင်အားပြင်းကလျှင်ဒဏ်ကြောင့်လည်းဒေသခံပြည်သူတွေသေဆုံးခဲ့သလို နေအိမ်ရာချီပျက်စီးခဲ့ပါတယ်။
လက်ရှိမှာလည်း ဘင်္ဂလားပင်လယ်အော်မှာ လေဖိအားနည်းရပ်ဝန်း ဆက်ရှိနေပြီး ဖိလစ်ပိုင်နိုင်ငံကိုဝင်ရောက်ခဲ့တဲ့ တောင်တရုတ်ပင်လယ်က တိုင်ဖွန်းမုန်တိုင်း BUALOI အရှိန်ကြောင့် ရှမ်းပြည်နယ်တောင်ပိုင်း၊ မန္တလေးတိုင်း၊ ကရင်နီပြည်နယ်၊ ပဲခူးတိုင်းနဲ့တနင်္သာရီတိုင်း၊ကချင်ပြည်နယ်၊ စစ်ကိုင်းတိုင်းအထက်ပိုင်း၊ ချင်းပြည်နယ်၊ ရန်ကုန်တိုင်း၊ ကရင်ပြည်နယ်နဲ့မွန်ပြည်နယ်တို့မှာ နေရာကွက်၍ မိုးကြီးပြီး လေပြင်းတိုက်ခတ်နိုင်တယ်လို့ အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနဲ့ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က ထုတ်ပြန်ထားပါတယ်။
အင်းလေးက အထင်ကရ ဟင်္သာတိုင်ရေထဲနစ်မြုပ်၊ မိုးကြိုးပစ်လို့ အိမ်တစ်လုံးမီးလောင် စက်တင်ဘာ-၃၀၊၂၀၂၅။ဇော်ရမ်း/People's Spring…
Posted by People's Spring on Tuesday 30 September 2025
ရုပ်သံ-ဒေသခံ
