တန့်ဆည်-ရေဦးလမ်းပိုင်းမှာ စစ်ကောင်စီတပ် စစ်ကြောင်းထိုးနေ

အောက်တိုဘာ-၁ ၊ ၂၀၂၅။ဇော်ဝင်း /People’s Spring

စစ်ကိုင်းတိုင်း၊တန့်ဆည်-ရေဦး ကားလမ်းပိုင်းထိန်းချုပ်ဖို့ စစ်ကောင်စီတပ်က စစ်ကြောင်းနှစ်ကြောင်းနဲ့ ထိုးစစ်ဆင်လာတယ်လို့ ဒေသခံသတင်းရင်းမြစ်အချို့က ပြောပါတယ်။

ပြီးခဲ့တဲ့ စက်တင်ဘာ ၂၈ ရက်က စစ်ကောင်စီတပ်ဟာ ကန့်ဘလူမြို့နယ်ကနေ တန့်ဆည်မြို့နယ်ကို စစ်အင်အားဖြည့်ပြီးတဲ့နောက် တန့်ဆည်-ရေဦးကားလမ်းပိုင်းကို ဒီကနေ့ (အောက်တိုဘာ ၁ ရက်)မနက်ပိုင်းကစပြီး စစ်ကြောင်းတွေ ထိုး​လာတယ်လို့ဆိုပါတယ်။

“စစ်​ကြောင်း တကြောင်းက ​အောင်သာရွာဘက်​ရောက်​နေပီး ​နောက် တကြောင်းက ​ရေဦး–တန့်ဆည်ကားလမ်းမအတိုင်း ခ​ပေါင်းကြိုင်ဘက် ဦးတည်​နေတယ်လို့ သတင်းရပါတယ်”လို့ ဒေသခံစစ်ရေးသတင်းရင်းမြစ် ကိုအနန္တက ပြောပါတယ်။

Public Service Announcement

တန့်ဆည်-ရေဦး ကားလမ်း​ဘေးက ကျေးရွာတွေအနေနဲ့ မြေပြင်စစ်​ကြောင်းအပြင် လေ​ကြောင်းအန္တရာယ်ကိုပါ အထူးသတိပြုကြဖို့နဲ့ နယ်​ဝေးခရီးသွားကားတွေအ​နေနဲ့ တန့်ဆည်–ပန်းကုံးမူးဆုံ–​ရေဦးကားလမ်းပိုင်း ​ရှောင်​မောင်းသင့်ပါတယ်လို့ သူက တိုက်တွန်းပါတယ်။

“ကန့်ဘလူနယ် ကာဘိုးက​နေ တန့်ဆည်မြို့ထိ တလမ်းလုံး စစ်တပ်ဘက်က စီးထားတာမို့ အင်အားအတိအကျ​ပြောဖို့​တော့ခက်ပါတယ်”စစ်ကိုင်းအထက်ပိုင်းစစ်ရေးအခြေအနေကို ဖော်ပြနေတဲ့ Infinity group တာဝန်ရှိသူက ပြောပါတယ်။

စစ်ကောင်စီတပ်က မြေပြင်စစ်ကြောင်းမဝင်ခင် စက်တင်ဘာ ၂၉ ရက်​ နေ့လယ်ပိုင်းက တန့်ဆည်–​ရေဦးကားလမ်းမ​ဘေးက ကျေးရွာ​တွေကို ဂျိုင်ရိုကောပတာသုံးစီးနဲ့ ​လေ​ကြောင်းတိုက်ခိုက်ခဲ့ပြီး အရပ်သားအမျိုးသမီးတဦး သေဆုံးခဲ့ပါတယ်။

စစ်ကိုင်းတိုင်းထဲက ဗျူဟာလမ်းတွေနဲ့ အဓိကလမ်းမတွေကို စိုးမိုးဖို့ စစ်ကောင်စီတပ်က ကြိုးစားနေပြီး သြဂုတ်က ကန့်ဘလူမြို့နယ်က ​ရွှေဘို–မြစ်ကြီးနားဗျူဟာလမ်းပိုင်းကို ပြန်ထိန်းချုပ်ခဲ့ပါတယ်။

ဒါ့အပြင်ခင်ဦးမြို့နယ်ကလမ်းပိုင်းကိုပါဆက်လက်ထိန်းချုပ်ဖို့ စစ်ကြောင်းထိုးခဲ့ပေမယ့် တော်လှန်ရေးအင်အားစုတွေက စစ်ကြောင်းပျက်တဲ့အထိ တိုက်ခိုက်နိုင်ခဲ့ပါတယ်။စက်တင်ဘာ ၂၂ ရက်က ခင်ဦး-ရွှေဘိုလမ်းပိုင်းတိုက်ပွဲမှာ ဒုဗိုလ်မှူးကြီးအဆင့်တွေအပါအဝင် စစ်ကောင်စီတပ်သားတွေ သေဆုံးခဲ့ပြီး လက်နက်တွေနဲ့ စစ်သုံ့ပန်းအချို့ပါ သိမ်းဆည်းရရှိခဲ့ပါတယ်။

လက်ရှိ တန့်ဆည်-ရေဦးလမ်းပိုင်းက စစ်ကောင်စီ စစ်ကြောင်းနဲ့ ပတ်သက်လို့ ဒေသခံတော်လှန်ရေး တပ်ဖွဲ့တွေနဲ့ ခရိုင်အဆင့် တာဝန်ရှိသူတွေထံ လူထုနွေဦးက မေးမြန်ထားဆဲ ဖြစ်ပါတယ်။