ပြည်တွင်းအနုပညာရှင်အားလုံး စစ်တပ်​ရွေးကောက်ပွဲအတွက် ဝါဒဖြန့်ရိုက်ကူးပေးရမှာဖြစ်ပြီး ငြင်းဆန်သူများအရေးယူမယ်လို့ စစ်ကောင်စီခြိမ်းခြောက်

အောက်တိုဘာ-၃၀၊ ၂၀၂၅/People’s Spring

ရွေးကောက်ပွဲနဲ့ပတ်သက်ပြီး ပြည်တွင်းမှာရှိတဲ့အနုပညာရှင်အားလုံး ဝါဒဖြန့်ရိုက်ကူးပေးရမှာဖြစ်ပြီး ငြင်းဆန်သူ​တွေကို အရေးယူမယ်လို့ စစ်ကောင်စီကခြိမ်းခြောက်ပြောဆိုလိုက်ကြောင်း လူထုနွေဦးရဲ့ အနုပညာသတင်းရင်းမြစ်​တွေက ပြောပါတယ်။

ဒီကနေ့(အောက်တိုဘာ ၃၀ရက်) နေ့လည် ၁နာရီမှာ စစ်ကောင်စီရဲ့ ပြန်ကြားရေးနဲ့ ပြည်သူ့ဆက်ဆံရေးဦးစီးဌာန၊ ညွှန်ကြားရေးမှူးချုပ် အေးကြွယ်ဟာ ရန်ကုန်မြို့က ရုပ်ရှင်လုပ်ငန်းရုံမှာ အနုပညာရှင်တွေကို ခေါ်ယူပြီး အထက်ပါအတိုင်း ဖိအားပေးခြိမ်းခြောက်လိုက်တာလို့ အနုပညာသတင်းရင်းမြစ်က ပြောပါတယ်။

ရုပ်ရှင်ဇာတ်ကားတွေ မရိုက်တော့တဲ့ နာမည်​ကျော်သရုပ်​ဆောင် များအပါအဝင် နာမည်ကြီးသရုပ်ဆောင်အနုပညာရှင်အားလုံး စစ်တပ်​ရွေး​ကောက်ပွဲအတွက် ​​ကန်းပိန်း ​တွေ ၊ ​ကြွေး​ကြော်သံ​တွေ စတဲ့ ဝါဒဖြန့်မှု​တွေမှာပါဝင်ရိုက်ကူး​ပေးရမှာဖြစ်ပြီး ငြင်းဆန်သူအားလုံးကို အထက်အမိန့်အရ အရေးယူမယ်လို့ အေးကြွယ်က ခြိမ်းခြောက်ပြောသွားတယ်လို့ ၎င်းက ပြောပါတယ်။

Public Service Announcement

” လုပ်ရမှာကတော့ ရွေးကောက်ပွဲနဲ့ ပတ်သတ်တဲ့ စာသားမျိုး​တွေ ၊ ​ဆောင်ပုဒ်မျိုး​တွေကို တစ်ယောက်ချင်းစီ ပြောရမယ်။ ရိုက်ကူးရေးကို စကမဘက်ရိုက်ပြီး သူတို့သတင်းနဲ့ ဖျော်ဖြေ​ရေပလက်​ဖောင်းအားလုံးမှာ ထုတ်လွှင့်မယ်”လို့ သတင်းရင်းမြစ်တဦးကပြောပါတယ်။

တချို့အနုပညာရှင်တွေအနေနဲ့ ကိုယ်တိုင်ရိုက်ကူးရပေးပို့ရမှာဖြစ်ပြီး အဲဒီအစီအစဉ်ကို နိုဝင်ဘာလဆန်းမှာ စတင်မယ်လို့လည်း ဆိုပါတယ်။

“ရုပ်ရှင်၊ ဇာတ်လမ်းတို မဟုတ်ပါ။ တစ်ယောက်ချင်းဆီမှ စကမဘက်က ရွတ်ဆိုခိုင်းတဲ့စာသား​တွေ ၊​ ကိုရွတ်ဆိုတဲ့ ဗီဒီယိုရိုက်ကူးရေးဖြစ်တယ်”လို့လည်း ပြောပါတယ်။

စစ်ကောင်စီရဲ့ရွေးကောက်ပွဲ ဝါဒဖြန့်ချိရေးဇာတ်ကားမှာပါဝင်သူတွေကို ပြည်သူ​တွေက လူမှု​ရေးပြစ်ဒဏ်ခတ်တာ ၊ သပိတ်​မှောက်တာ အပြင်းအထန်ပြုလုပ်​တာ​အောင်မြင်ခဲ့တာကြောင့် စစ်ကောင်စီရဲ့ ပြန်ကြားရေး ဝန်ကြီးဌာနက ​အောက်တိုဘာ ၃၀ ရက်​နေ့မှာ အနုပညာရှင်အားလုံးကို​ မလာမ​နေရ အ​ရေး​ပေါ်အစည်းအ​ဝေး​ခေါ်​ပြီး ဖိအားပေး ခြိမ်း​​ခြောက်ခဲ့တာလို့ အနုပညာအသိုင်းအဝိုင်းက သတင်းရင်းမြစ်​တွေက ပြောပါတယ်။

“သူတို့ အခုခေတ်သမိုင်းကို ဒုန်ဆိုင်းမည့်သူများဆိုတဲ့ ရွေးကောက်ပွဲကမ်ပိန်းဇာတ်ကားမှာ လူထုတုန့်ပြန်မှုနဲ့ Boycott မှာ လူထုဘက်က အောင်မြင်ခဲ့တဲ့အတွက် လူထုနဲ့ပါရန်တိုက်ပေးတယ်လို့ မြင်တယ်”လို့စစ်တပ်ရဲ့ အခုဖိအား​ပေးမှုအ​ပေါ် အနုပညာ​လောကသားတဦးက ပြောပါတယ်

ဒါ့အပြင်အခြားသတင်း တရပ်မှာပြည်တွင်းက အနုပညာရှင်တွေအနေနဲ့ နိုင်ငံခြားသွားရောက်ပါက စစ်ကောင်စီဆီကြိုတင်အကြောင်းကြားရမယ်လို့လည်း စစ်ကောင်စီထောက်ခံသူ ယုန်လေးက သူရဲ့လူမှုကွန်ရက်မှာ ရေးသားထားပါတယ်။

ဒီကနေ့မှာ နိုင်ငံခြားသွားတဲ့ အနုပညာရှင်အဖွဲ့တစ်ဖွဲ့ကို စစ်ကောင်စီက တားဆီးလို့ လေဆိပ်ကနေ လှည့်ပြန်လာခဲ့ရတယ်လို့လည်း အသိပေးထားပါတယ်။

စစ်ကောင်စီရဲ့ ရွေးကောက်ပွဲနဲ့ပတ်သက်ပြီး လုပ်ဆောင်သူတွေကို ပြင်းပြင်းထန်ထန် တုန့်ပြန်နေတဲ့ ရန်ကုန်အခြေစိုက် မြေအောက်တော်လှန်ရေးအဖွဲ့ ငါးဖွဲ့ကလည်းခေတ်သမိုင်းကို ဒုန်ဆိုင်းမည့်သူများဆိုတဲ့ဇာတ်လမ်း ပါဝင်သူတွေကို အရေးယူသွားမယ်လို့ ​ကြေညာထားပါတယ်။