ဒီပဲယင်းမြို့နယ် ညောင်လှရွာနှင့်ဆည်ကြီးရွာဘက်ရောက်ရှိနေသော အကြမ်းဖက်စစ်ကောင်စီတပ်များနှင့် မဟာမိတ်ပူးပေါင်းအဖွဲ့များ နိုဝင်ဘာလ ၂၈ ရက်နံနက်မှစ၍ တိုက်ပွဲဖြစ်ခဲ့ရာ ပြည်သူ့ကာကွယ်ရေးအဖွဲ့ဘက်မှ တစ်ယောက်လက်ထိ(မစိုးရိမ်ရ)ခဲ့ပြီး စစ်ကောင်စီဘက်မှ ယနေ့နံနက်ထိ စုစုပေါင်း ငါးဆယ်ခန့်ထိခိုက်သေဆုံးနိုင်ကြောင်း ရွှေဘိုမိုးကြိုးမုန်တိုင်းအဖွဲ့က သတင်းထုတ်ပြန်သည်။
အကြမ်းဖက်စစ်ကောင်စီ တပ်များသည် ဒီပဲယင်းမြို့နယ်တစ်နယ်လုံးကို အရှေ့ဖျားမှ အနောက်ဖျားတိုင်အောင် ဝင်ရောက်စီးနင်းနေဆဲဖြစ်ပြီး ပြည်သူထောင်ချီ ထွက်ပြေးတိမ်းရှောင်နေရပြီး ကျေးရွာများအတွင်းသို့လည်း အကြိမ်ကြိမ်အခါခါ ဝင်ရောက်ဖျက်ဆီးခြင်း၊ လုယတ်ခြင်း၊ခိုးယူခြင်းများပြုလုပ်နေကြောင်း၊ တောင်သူလုပ်ငန်းများပင် မလုပ်ကိုင်နိူင်ဘဲ အခက်အခဲများကြုံတွေ့နေရကြောင်း ဒီပဲယင်းမြို့နယ်ညီနောင်များအဖွဲ့က အသိပေးသည်။
ယနေ့(နိုဝင်ဘာလ ၂၉ ရက်နေ့)နံနက်ပိုင်းက အကြမ်းဖက်စစ်ကောင်စီတပ်များ ဝင်ရောက်လာကာ ပြည်သူများ၏တောနေတဲများကို မီးရှို့ဖျက်ဆီးခဲ့ပြီး အဆိုပါတဲအိမ်များရှိ စက်ဘီး၊ ဆိုင်ကယ်၊ လယ်ထွန်စက်များအပြင် ဆန်များ၊ မြေပဲများအပါအဝင် စားနပ်ရိက္ခာများကို သွန်မှောက်မီးရှို့ဖျက်ဆီးမှုများ ပြုလုပ်သွားကြောင်း၊ တဲတစ်တဲမှ ငွေသိန်း၅၀ကျော် ရွှေလက်ကောက်၊ရွှေဆွဲကြိုးများကိုလည်း ရှာဖွေယူဆောင်သွားကြောင်း ဒေသခံများကပြောသည်။
ထိုအပြင်ဒီပဲယင်းမြို့နယ် အနောက်ခြမ်း ဆပ်ပြာကျင်းကျေးရွာရှိ တောင်သူတဲများနှင့် အသုံးအဆောင်ပစ္စည်းများ၊ စားနပ်ရိက္ခာများကိုလည်း အကြမ်းဖက်စစ်ကောင်စီတပ်များကမီးရှို့ဖျက်ဆီးခဲ့ပြီး ငွေသားသိန်းငါးဆယ်ကျော်နှင့် ရွှေထည်များအား သိမ်းယူသွားကြောင်း ဒေသခံများကပြောသည်။
Public Service Announcement
“တဲတွေကတော့ ဒေသခံတောင်သူတွေရဲ့တဲတွေပါ။ အရေအတွက်ကတော့မသိရသေးဘူး။”ဟု ဒေသခံတစ်ဦးကပြောသည်။
(အကြမ်းဖက်စစ်ကောင်စီတပ်က ဒေသခံပြည်သူများ၏ နေအိမ်များ၊ပစ္စည်းများကိုမီးရှို့၊ဖျက်ဆီး၊လုယက်မှုများဆက်တိုက်ပြုလုပ်နေသည်။)
