ပွင့်ဖြူမှာ ဖဲဝိုင်းနဲ့ ကြက်ဝိုင်းတွေမလုပ်ဖို့ ပကဖ သတိပေး

နိုဝင်ဘာ-၂၀၊၂၀၂၅။ဇေအောင်/People’s Spring

မကွေးတိုင်း၊ ပွင့်ဖြူမြို့နယ်မှာ ဖဲဝိုင်းနဲ့ ကြက်ဝိုင်းတွေ မလုပ်ကြဖို့ ပွင့်ဖြူမြို့နယ်ပြည်သူ့ကာကွယ်ရေးအဖွဲ့(ပကဖ)ကသတိပေးလိုက်ပါတယ်။

ပွင့်ဖြူမြို့နယ်မှာ ကြက်တိုက်လောင်းကစားခြင်းနဲ့ ဖဲရိုက်လောင်းကစားခြင်းတွေ ပြုလုပ်နေတာကို တွေ့ရှိရတဲ့အတွက် မပြုလုပ်ကြဖို့ သတိပေးတားမြစ်လိုက်ကြောင်းပွင့်ဖြူမြို့နယ်ပြည်သူ့ကာကွယ်ရေးအဖွဲ့က နိုဝင်ဘာ၂၀ ရက်မှာထုတ်ပြန်ပါတယ်။

“မြို့နယ်အတွင်းမှာ လောင်းကစားတွေ ပတ်လုပ်နေတဲ့သူတွေရှိတယ်။ သူတို့တွေက ကျွန်တော်တို့ လှုပ်ရှားနယ်​မြေအထိပါ လောင်းကစားလုပ်တာတွေ၊ ပြောဆိုတာတွေ လုပ်နေတာတွေရှိတယ်လို့ ပြောလာတယ်။ အဲဒီအခြေအနေကြောင့်မို့လို့ ကြိုပြီးတော့ အရေးယူဖို့ ထုတ်ပြန်ထားတာ။”လို့ ပွင့်ဖြူပကဖအဖွဲ့ရဲ့ တာဝန်ခံက ပြောပါတယ်။

Public Service Announcement

လိုက်နာခြင်းမရှိပါက အပြစ်ပေးအရေးယူသွားမယ်လို့ ပွင့်ဖြူပကဖက သတိပေးပါတယ်။

ပွင့်​ဖြူမြို့နယ်မှာ စစ်ကောင်စီလက်အောက်ခံ ပျူစောထီးတွေကိုယ်တိုင် ခေါင်းဆောင်ပြီး လောင်းကစားဝိုင်းတွေ ဖွင့်လှစ်နေကြောင်း ဒေသခံတွေက ပြောပါတယ်။

ပွင့်ဖြူမြို့နယ်အတွင်း ကြားကာလပြည်သူ့အုပ်ချုပ်ရေးများ ဖော်ဆောင်နေ တော်လှန်ရေးမပြီးဆုံးမီ ပြ​ည်သူတွေအနေနဲ့ စိတ်အေးချမ်းသာစွာ နေထိုင်နိုင်ရေး တပ်ရင်းတပ်ဖွဲ့များ ပူးပေါင်းဆောင်ရွက်နေကြောင်း ပွင့်ဖြူပကဖက အသိပေးထားပါတယ်။

ပွင့်ဖြူမြို့နယ်မှာ စစ်ရေးအရ ငြိမ်သက်နေပေမဲ့ စစ်ကောင်စီတ​ပ်က လူငယ်အများအပြားကို ပေါ်တာဆွဲဖမ်းဆီးနေကြောင်း ဒေသခံတွေဆီက သိရပါတယ်။

စစ်ကောင်စီအာဏာသိမ်းပြီးနောက်ပိုင်း ဒေသအသီးသီးမှာ လောင်းကစားဝိုင်းတွေ အဆမတန်များပြားလာပြီး စစ်အုပ်စုဝင်တွေက လိုင်းကြေးယူကာ ပေါ်ပေါ်တင်တင်ပြုလုပ်နေကြောင်း သတင်းရရှိပါတယ်။