ဒီဇင်ဘာ ၂၄၊ ၂၀၂၅။မေရီ/People’s Spring
ရှေးဟောင်းမြို့တော် ပုဂံ၊ညောင်ဦးမြို့ကို အလည်လာတဲ့ ဧည့်သည်ဇနီးမောင်နှံနှစ်ဦး ပျောက်ဆုံးနေကြောင်း နီးစပ်သူတွေက ပြောပါတယ်။
ညောင်ဦးမြို့၊ ရွှေစည်းခုံဘုရားအနီးက Zfreeti Hotel မှာ တည်းခိုနေတဲ့ ဇနီးမောင်နှံဟာ မနေ့က ဒီဇင်ဘာ ၂၃ ရက် မနက် ၉ နာရီခန့်က ပုပ္ပါးတောင်ဘက်သွားမယ်ဆိုပြီး ငှားထားတဲ့ ဆိုင်ကယ်နဲ့ ထွက်သွားရာကနေ ဟိုတယ်ကို ပြန်ရောက်မလာတော့ဘဲ ဒီကနေ့ (ဒီဇင်ဘာ ၂၄ရက်) ညနေပိုင်းအထိ အဆက်အသွယ်မရတော့တာဖြစ်ကြောင်း ဆွေမျိုးသားချင်းတစ်ဦးက လူမှုကွန်ရက်ကနေ အသိပေးပါတယ်။
“၂၃ရက်နေ့မနက် ၉နာရီလောက်မှာ ပုပ္ပါးဘက်သွားမယ်ဆိုပြီး လင်မယားနှစ်ယောက် ဆိုင်ကယ်ငှားပြီး ထွက်သွားကြပါတယ်။ ယနေ့ ၂၄ရက် ယခု Post တင်တဲ့အချိန် ၆း၂၁ pm အထိ အဆက်အသွယ် မရသေးပါရှင် ဟိုတယ်ကနေ ထွက်သွားတာပါ”လို့ ၎င်းက ရေးသားထားပါတယ်။
Public Service Announcement
တနေရာရာမှာ တွေ့မိရင် ဖုန်းနံပါတ် ၀၉၂၅၉၇၆၆၄၄၆ ကိုဆက်သွယ်ဖို့လည်း ရေးသားထားပါတယ်။
“မနေ့ညကားနဲ့ပြန်လာမှာမလို့ ဟိုတယ်မှာတောင် Check outလုပ်ပြီး ပစ္စည်းတွေထားခဲ့တာပါ။အခုက အဲ့ဒါတွေပါ ခုထိလာမယူသေးပါဘူး”လို့ နီးစပ်သူတစ်ဦးက ပြောပါတယ်။
ဒီဇင်ဘာ ၁၉ ရက်ကလည်း ပုဂံမြို့သစ်တောင်ပိုင်းရှိ စေတနာကြီးဘုရားအနီးမှာ ခရီးသွားကားတစ်စီးကို ပျူစောထီးတွေက ပြန်ပေးဆွဲမှု ဖြစ်ပွားခဲ့တယ်လို့ ဒေသခံအချို့က ပြောပါတယ်။
ပြန်ပေးဆွဲပြီးနောက် ညှိနှိုင်းမှုအရပြန်ပေးဆွဲခံရသူတွေဘက်က ကျပ်သိန်း၁,၂၀၀ နဲ့ လက်ဝတ် လက်စားတွေချွတ်ပေးရပြီးနောက် အဲဒီနေ့ ညနေပိုင်းမှာ ပြန်လွတ်လာတယ်လို့ သိရပါတယ်။
အခုလို ပြန်ပေးဆွဲငွေတောင်းတဲ့ ပျုစောထီးအဖွဲ့ဟာ ပုဂံမြို့အနီးတဝိုက်မှာ ကျင်လည်ကျက်စားနေတာလို့ ဒေသခံအချို့က ပြောပါတယ်။
လက်ရှိ ပုဂံ၊ညောင်ဦးဒေသမှာ ကလေးငယ်တွေရဲ့ ဒီဇင်ဘာကျောင်းပိတ်ရက်ဖြစ်လို့ ခရီးသွားဧည့်သည်တွေ များပြားနေပြီး ခရီးသွားတွေအတွက် စိုးရိမ်နေရကြောင်း ဒေသခံအချို့က ပြောပါတယ်။
ပြီးခဲ့တဲ့ နိုဝင်ဘာ ၂ ရက်က မန္တလေးတိုင်း၊ ကျောက်ဆည်မြို့ကနေ ပုပ္ပါးကို အလည်သွားတဲ့ မိသားစု ၂ စုက ၆ ဦးလည်း ပုပ္ပါးရောက်ရှိနေချိန် အဆက်အသွယ်ပြတ်တောက်သွားခဲ့ပြီး တစ်လခွဲကျော်အကြာ ဒီဇင်ဘာ ၁၈ရက်မှ ပြန်လည်ရောက်ရှိလာခဲ့ပါသေးတယ်။
