စစ်ကိုင်းတိုင်းအတွင်းရှိ လမ်းပိုင်းနှစ်ခုအား ယနေ့ (ဒီဇင်ဘာလ၄ ရက်) ည ၇း၃ နာရီမှစတင်ကာ ယာယီပိတ်ထားကြောင်း ချောင်းဦးနှင့်မုံရွာ ပြည်သူ့ကာကွယ်ရေးအဖွဲ့များက အသိပေးကြေညာသည်။
မန္တလေး-မြင်းမူ-မုံရွာလမ်းပိုင်း၊ ပခုက္ကူ-ချောင်းဦး-မုံရွာလမ်းပိုင်းတို့အား ယာယီပိတ်ထားလိုက်ခြင်းဖြစ်ပြီး ပြန်လည်ဖွင့်မည့်အချိန်နှင့်နေ့ရက်ကို ကြေညာပေးသွားမည်ဟု ချောင်းဦးနှင့်မုံရွာ ပြည်သူ့ကာကွယ်ရေးအဖွဲ့များက အသိပေးသည်။
“ပြည်သူလူထု ဘေးကင်းရေး နှင့်ထိခိုက်မှုမရှိစေရန် အရေးပေါ် ပိတ်လိုက်ရတာပါဗျ။ ဒီထက်ပိုပြောလို့ မရလို့ပါခင်ဗျ။”ဟု မုံရွာပြည်သူ့ကာကွယ်ရေးအဖွဲ့က ဖြေကြားသည်။
မန္တလေး-မြင်းမူ-မုံရွာလမ်းပိုင်း၊ မန္တလေး-အရာတော်-မုံရွာလမ်းပိုင်း၊ မန္တလေး-ရွှေဘို-မုံရွာလမ်းပိုင်း၊ ပခုက္ကူ-ချောင်းဦး-မုံရွာလမ်းပိုင်းများအားနိုဝင်ဘာလ ၂၈ ရက်နေ့ညမှ နိုဝင်ဘာလ၃၀ ရက်နေ့ နံနက်ပိုင်းအထိ ပိတ်ထားခဲ့ဖူးသည်။
Public Service Announcement
စစ်ကိုင်းတိုင်းအတွင်း အဆိုပါလမ်းပိုင်းများတွင် စစ်ကောင်စီတပ်များအား ပြည်သူ့ကာကွယ်ရေးအဖွဲ့များမှ ခုခံတိုက်ခိုက်ခြင်းများပြုလုပ်နေပြီး ဒီဇင်ဘာလ ၂ ရက်နေ့ကလည်း မန္တလေးမှ မုံရွာသို့လာသော အကြမ်းဖက်စစ်ကောင်စီ၏ လက်နက်တင်ကားတန်းအား ပဒေသာမိုင်းဖြင့် တိုက်ခိုက်ခဲ့ရာအကြမ်းဖက်စစ်ကောင်စီတပ်သားနှစ်ဦးသေဆုံးပြီး ကားတစ်စီးလည်း ရှေ့ပိုင်းတစ်စစီဖြစ်သွားခဲ့သေးသည်။
