ပြင်းအား မဂ္ဂနီကျု ၆.၅ အဆင့် ငလျင်ကြီးတစ်ခု လှုပ်ခတ်မှုကြောင့် မက္ကဆီကို အလယ်ပိုင်းနဲ့ တောင်ပိုင်း ဒေသတွေမှာ ထိခိုက်ပျက်စီးမှုတချို့ ဖြစ်ပေါ်ခဲ့ပါတယ်။
ငလျင်ကြောင့် အနည်းဆုံး လူ ၂ ဦး သေဆုံးကြောင်း အာဏာပိုင်တွေက ပြောကြားခဲ့ပြီး ပျက်စီးဆုံးရှုံးမှု အခြေအနေတွေကိုတော့ အသေးစိတ် မသိရသေးပါဘူး။
ငလျင်ဟာ မက္ကဆီကို တောင်ပိုင်း၊ ဂွာရဲရိုး ပြည်နယ်ထဲက အပန်းဖြေ ကမ်းခြေမြို့ အက်ကာပူလ်ကိုနားမှာရှိတဲ့ ဆန်မားကို့စ်ဆိုတဲ့ မြို့လေးကို ဗဟိုပြု လှုပ်ခတ်ခဲ့တာ ဖြစ်ပါတယ်။ ဒီဇင်ဘာ ၂ ရက်နေ့ ငလျင်ကြီးအပြီး ၂၄ နာရီ မပြည့်ခင် အတောအတွင်း နောက်ဆက်တွဲ ငလျင်ငယ်ပေါင်း ၅၀၀ ကျော် လှုပ်ခတ်ခဲ့ပြီး ဖြစ်ကြောင်း မက္ကဆီကို ငလျင်တိုင်းတာရေး အေဂျင်စီက ပြောပါတယ်။
သေဆုံးသူတွေထဲက တစ်ဦးဟာ အသက် ၅၀ အရွယ် အမျိုးသမီး တစ်ဦးဖြစ်ပြီး ငလျင် ဗဟိုချက်နားက နေအိမ်ပြိုကျချိန်မှာ အပျက်အစီးတွေ ပိမိတာ ခံခဲ့ရတာ ဖြစ်ပါတယ်။
Public Service Announcement
ငလျင်လှုပ်နေချိန်မှာ မက္ကဆီကိုစီးတီး မြို့တော်နဲ့ အက်ကာပူလ်ကိုမှာ ရှိနေသူတွေဟာ နေအိမ်တွေပေါ်ကနေ ကြောက်လန့်တကြား ဆင်းပြေးခဲ့ကြပါတယ်။
ငလျင်ဟာ မြေမျက်နှာပြင်အောက် ၃၅ ကီလိုမီတာလောက်ထိ နက်နက်ရှိုင်းရှိုင်း ဗဟိုပြုခဲ့ကြောင်း အမေရိကန် ငလျင်တိုင်းတာရေး အေဂျင်စီ (USGS)က ထုတ်ပြန်ပါတယ်။ မြေအနက်ပိုင်းထဲကို ဗဟိုပြုခဲ့တဲ့ ငလျင်အမျိုးအစား ဖြစ်တဲ့အတွက်လည်း မြေမျက်နှာပြင်ပေါ်မှာ ထိခိုက်သက်ရောက်မှုတွေ အထိုက်အလျောက် နည်းပါးခဲ့တာ ဖြစ်ပါတယ်။
ငလျင်ကြောင့် မက္ကဆီကို သမ္မတ ကလော်ဒီရာ ရှိန်ဘွမ်း နှစ်သစ်အတွက် ပထမဆုံး ပြုလုပ်မယ့် သတင်းစာ ရှင်းလင်းပွဲ အစီအစဉ်မှာပါ နှောင့်နှေးမှုတွေ ကြုံခဲ့ရပါတယ်။ ရှိန်ဘွမ်းရဲ့ မိန့်ခွန်းအစီအစဉ်ကို ယာယီ ရွှေ့ဆိုင်းခဲ့ရပေမယ့် ငလျင်အပြီး သိပ်မကြာခင်မှာတော့ သမ္မတက သတင်းစာ ရှင်းလင်းပွဲကို စတင်စေခဲ့ပါတယ်။
မက္ကဆီကိုမှာတော့ မြို့တော် မက္ကဆီကို စီးတီးဟာ တစ်ချိန်က ရေကန်ကြီး ဖြစ်ခဲ့ဖူးပြီး ရွှံ့အလွှာတွေနဲ့ ပြန်လည် ဖုံးအုပ်ထားတာ ဖြစ်တဲ့အတွက် အောက်ခံမြေသားဟာ ငလျင်တွေရဲ့ ဒဏ်ကို ခုခံကာကွယ်နိုင်စွမ်း အားနည်းပါတယ်။
မက္ကဆီကိုမှာ အင်အားကောင်းတဲ့ ငလျင်တွေဟာ ဂွာရဲရိုးပြည်နယ်တဝိုက် ပစိဖိတ် ကမ်းရိုးတန်းကို အဓိက ဗဟိုပြု လှုပ်ခတ်လေ့ ရှိပါတယ်။ ၂၀၁၇ ခုနှစ် စက်တင်ဘာလတုန်းက မဂ္ဂနီကျု ၇.၁ ငလျင်ကြောင့် မက္ကဆီကို စီးတီး ဒေသခံ အများစု အပါအဝင် လူပေါင်း ၃၆၉ ဦး အသက်ဆုံးရှုံးခဲ့ဖူးပါတယ်။
ကိုးကား: AFP
