ယမန်နေ့(ဒီဇင်ဘာ ၅)ညက ခရမ်းမြို့မရဲစခန်း ပစ်ခတ်တိုက်ခိုက်ခံရမှုတွင် စစ်ကောင်စီတပ်မှ သုံးဦးသေဆုံးပြီး ခုနစ်ဦး ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။
အဆိုပါတိုက်ခိုက်မှုကို PDF ခရမ်းမှ လုပ်ဆောင်ခဲ့ခြင်းဖြစ်ပြီး ၄၀ မမဗုံးသီးသုံးလုံးပစ်ခတ်၍ တိုက်ခိုက်ခဲ့ကြောင်း ရန်ကုန်တိုင်းစစ်ဒေသကွပ်ကဲရေးအဖွဲ့က အသိပေးထုတ်ပြန်ထားသည်။
“ညတုန်းက ရဲစခန်းနဲ့ ပညာရေးမှူးရုံးကို ဗုံးနဲ့တိုက်ခိုက်တယ်လို့ သိရတယ်။ ရဲစခန်းထဲက အော်သံတွေလည်းကြားရတယ်”ဟု ခရမ်းမြို့ခံတစ်ဦးက ပြောသည်။
ယမန်နေ့ည ၈ နာရီခွဲခန့်တွင် ခရမ်းမြို့မရဲစခန်းနှင့် မြို့နယ်ပညာရေးမှူးရုံးများအနီး ပေါက်ကွဲမှုများဖြစ်ပွားချိန် စစ်ကောင်စီဘက်မှ ပြန်လည်ပစ်ခတ်သည့် သေနတ်သံများလည်း ကြားရကြောင်း ဒေသခံများက ဆိုသည်။
Public Service Announcement
ရန်ကုန်တိုင်း ခရမ်းမြို့နယ်တွင် အကြမ်းဖက်စစ်ကောင်စီလက်အောက်ခံ ကြည်းတပ်နှင့် ရေတပ်ပေါင်း၍ အစောင့်ချထားသည်မှာ နွေဦးတော်လှန်ရေးအစောပိုင်းကာလကတည်းကဖြစ်ပြီး လက်ရှိတွင်လည်း ယင်းတပ်နှစ်တပ်ပေါင်းကာ တာဝန်ယူထားသည်။
အဆိုပါတပ်များသည် မြို့လုံခြုံရေးဟုဆိုကာ ခရမ်းမှ သုံးခွက်မြို့ဘက်အထွက် မြို့အဝင်ဂိတ်နှင့် ဒေသအခေါ် သစ်တောဂိတ်(သက်ကလဘက်အထွက်)တို့တွင် ၂၄ နာရီနီးပါး အစောင့်ချထားပြီး မြို့အရှေ့ဘက်ခြမ်း အဝင်အထွက်ကိုမူ ရံဖန်ရံခါ စောင့်ကြပ်စစ်ဆေးလျက်ရှိသည်။
ရဲစခန်းအား တိုက်ခိုက်မှုမဖြစ်ပွားမီ ယမန်နေ့ (ဒီဇင်ဘာ ၅ ရက်)နံနက်ပိုင်းကလည်း အထက်ပါပူးပေါင်းအဖွဲ့က ခရမ်းမြို့အရှေ့ဘက်ခြမ်း မြို့ဝင်ပေါက်၌ စစ်ကောင်စီခန့်အုပ်ချုပ်ရေးမှူးထောက်ခံစာမပါသူများကို မြို့တွင်းသို့ပေးမဝင်ဘဲ ပျက်ယွင်းနေသည့် ရပ်ကျေးအုပ်ချုပ်ရေး ယန္တရား ပြန်လည်အသက်သွင်းရန် ကြိုးပမ်းနေသည်။
