—စစ်ကောင်စီတပ်သား ၉၀ခန့်သေဆုံးနိုင်ဟုဆို
စစ်ကိုင်းတိုင်း ကနီနှင့်မင်းကင်းမြို့နယ်တို့တွင်စစ်ကူလာသည့် စစ်ကောင်စီတပ်စစ်ကြောင်းနှစ်ခုကို မိုင်း ၁၀လုံးခွဲ၍ တိုက်ခိုက်ခဲ့ကြောင်း ကနီပြည်သူ့ကာကွယ်ရေးတပ်ဖွဲ့(KLG – PDF)က ယနေ့(ဒီဇင်ဘာ ၁၂)ထုတ်ပြန်သည်။
အဆိုပါတိုက်ခိုက်မှုများကို ယနေ့ နံနက် ၁၀ နာရီခွဲတွင် ချမ်းသာစုရွာအနီး၌ တစ်ကြိမ်၊ နေ့လယ်ပိုင်းက ဆယ်ရွာချောင်အနီး၌ တစ်ကြိမ်အသီးသီးတိုက်ခိုက်ခဲ့ကြောင်း ထုတ်ပြန်ချက်တွင် ဖော်ပြသည်။
ကနီမြို့နယ် ချမ်းသာစုရွာအနီးတိုက်ခိုက်မှုတွင် စစ်ကောင်စီတပ်များက နယ်မြေရှင်းလင်းရေးခေါင်းစဥ်ဖြင့် ကုန်းကြောင်းအတိုင်းတက်လာစဥ် KLG-PDF မှ ထောင် ထားသော တိုက်မိုင်းခြောက်လုံးဖြင့် ဖောက်ခွဲတိုက်ခိုက်ခဲ့သည်ဟု ဆိုသည်။
Public Service Announcement
ထိုတိုက်ခိုက်မှုကြောင့် နယ်မြေရှင်းလင်းရေးလာသော ပျူစောထီးနှင့် စစ်ကောင်စီတပ်သား ၂၀ ဦးခန့် သေဆုံးနိုင်ကြောင်း KLG-PDF ထုတ်ပြန်ချက်တွင် ဖော်ပြသည်။
“ဟုတ်တယ်ဗျ။ မနက်က မိုင်းက ခြောက်လုံးမိတာ။ တိုက်မိုင်းဆိုတော့ လောက်၂၀ လောက် ကျတယ်လို့ မြေပြင်ကသတင်းပို့ပါတယ်”ဟု KLG-PDF ပြန်ကြား ရေးတာဝန်ရှိသူက လူထုနွေဦးသို့ ပြောသည်။
အလားတူ မင်းကင်းမြို့ဘက်မှ ဆယ်ရွာချောင်ဘက်သို့ စစ်ကူလာသော ပျူစောထီးနှင့် စစ်ကောင်စီတပ် အင်အား ၁၀၀ခန့်ကို ကနီပြည်သူ့ကာကွယ်ရေးတပ်နှင့် မဟာမိတ်တပ်များက လေးနေရာခွဲ၍ တိုက်မိုင်းများဖြင့် ဖောက်ခွဲတိုက်ခိုက်ခဲ့သည်။
ယင်းတိုက်ခိုက်မှုကြောင့် ပျူစောထီးနှင့် စစ်ကောင်စီပူးပေါင်းတပ်များဘက်မှ ၇၀ ဦးခန့် သေဆုံးနိုင်ပြီး ပြည်သူ့ကာကွယ်ရေးမဟာမိတ်တပ်များဘက်မှ ထိခိုက်မှုမရှိခဲ့ကြောင်း KLG-PDF ထံမှ သိရသည်။
“၁၀၀ ကျော်လောက် တက်လာတာ။ မိုင်းလေး
နေရာခွဲတိုက်လိုက်တာ လာပို့ရွာကိုဝင်တော့ ၁၇ ယောက်ဘဲ ကျန်တယ်”ဟု KLG-PDF မှ ပြန်ကြားရေးတာဝန်ရှိသူက ပြောသည်။
လက်ရှိအခြေအနေတွင် စစ်ကောင်စီတပ်စစ်ကြောင်းများသည် ကနီမြို့နယ်အတွင်း ချင်းတွင်းမြစ်ရိုးတစ်လျှောက်နှင့် မင်းကင်းမြို့နယ်တွင် လာပို့ရွာအနီးတို့တွင် ဆက်လက်တည်ရှိနေကြောင်း သိရသည်။
ထို့ကြောင့် သက်ဆိုင်ရာဒေသများရှိ ပြည်သူများအနေဖြင့် စစ်ကောင်စီတပ်များကို ဝေးဝေးရှောင်ကြရန်နှင့် သတိဖြင့် နေထိုင်သွားလာကြရန် ကနီပြည်သူ့ကာကွယ်ရေးတပ်ဖွဲ့(KLG-PDF)နှင့် မဟာမိတ်များက အသိပေးနှိုးဆော်ထားသည်။
(ကနီပြည်သူ့ကာကွယ်ရေးတပ်ဖွဲ့(KLG – PDF)ရဲဘော်များ စစ်သင်တန်းလေ့ကျင့်နေစဥ်)
