မြဝတီမြို့ကိုထိန်းချုပ်ဖို့ စစ်တပ်က ကရင်လက်နက်ကိုင်တပ်ဖွဲ့တွေ မလိုအပ်ဘဲ လက်နက်မကိုင်ဆောင်ဖို့ ကန့်သတ်လာ

ဧပြီ-၂၉၊ ၂၀၂၆။ ဒလပန်း/People’s Spring

ကရင်ပြည်နယ်၊ မြဝတီမြို့ကို ထိန်းချုပ်နိုင်ဖို့အတွက် မြို့အတွင်းရှိနေတဲ့ ကရင်လက်နက်ကိုင်တပ်ဖွဲ့ဝင်တွေအနေနဲ့ မလိုအပ်ဘဲ လက်နက်ကိုင်ဆောင်ခြင်း မပြုဖို့ စစ်တပ်က ကန့်သတ်ထုတ်ပြန်လိုက်ပါတယ်။

မြဝတီမြို့စောင့်တပ် ခလရ(၂၇၅)တပ်ရင်းမှာ ဌာနဆိုင်ရာတွေနဲ့ လက်နက်ကိုင်အဖွဲ့အစည်းတွေ အစည်းအဝေးပြုလုပ်ပြီးနောက် အချက် ၈ ချက်ပါ အစည်းအဝေးမှတ်တမ်းကို ထုတ်ပြန်ခဲ့တာဖြစ်ပါတယ်။

ဧပြီ ၂၃ ရက်ရက်စွဲပါ အဲဒီအစည်းအဝေးမှတ်တမ်းမှာ မြဝတီမြို့ပေါ် ရပ်ကွက်တွေအတွင်း နေထိုင်တဲ့ ကရင်လက်နက်ကိုင် တပ်ဖွဲ့ဝင်တွေအနေနဲ့ မလိုအပ်ဘဲ လက်နက်ကိုင်ဆောင်ခြင်း မပြုဖို့ နဲ့ လက်နက်တွေကို သက်ဆိုင်ရာရုံးတွေမှာ အပ်နှံဖို့ ဖော်ပြထားပါတယ်။

Public Service Announcement

” တော်တော်လေးကန့်သတ်လိုက်တာ။ အခုအိမ်တွေမှာတောင် ထားလို့မရဘူး။ သက်စောင့်ထားဖို့ အတိုလေးကိုင်တာတောင်မရဘူး “လို့ ကရင်လက်နက်ကိုင်အဖွဲ့ဝင်တစ်ဦးက ပြောပါတယ်။

ဒါအပြင် ခွင့်ပြုချက်မရှိဘဲ ကိုင်ဆောင်ထားတဲ့ လက်နက်တွေတွေ့ရှိရင် တရားမဝင်လက်နက်ကိုင်ဆောင်မှုနဲ့ အရေးယူမယ်လို့ စစ်တပ်က သတိပေးထားပါတယ်။

မြို့တွင်း စားသောက်ဆိုင်တွေ ၊ ကာရာအိုကေ KTV တွေမှာ ယူနီဖောင်းဝတ်ပြီး လက်နက်တွေကိုင်ဆောင်ကာ ဝင်ရောက် စားသောက်ခြင်းမပြဖို့ကိုလည်း ကန့်သတ်ထားပါတယ်။

ဒါပြင်မြို့အတွင်း ကားတွေ တရကြမ်းမောင်နှင်ပြီး လက်နက်တွေထောင် ကိုင်ဆောင်သွားလာခြင်းမပြုဖို့ ပြောဆိုထားပါတယ်။

” ယူနီဖောင်းဆိုလည်း ဖားတစ်ပိုင်းငါးတစ်ပိုင်းတွေ သေနတ်တကားကားနဲ့ မသွားဖို့တင်းကြပ်ထားတာအခုနောက်ပိုင်းက ပြောရမယ်ဆိုရင် အရင်နဲ့ဆိုရင် အများကြီးလျော့သွားတယ်။ ကျားဖြန့်တွေဝင်ထဲကစပြီး အသွားအလာတွေ တဖြည်းဖြည်းလျော့သွားတာ။ “လို့ မြဝတီဒေသခံတစ်ဦးက ပြောပါတယ်။

မြဝတီမြို့ပေါ်မှာ ကရင်တိုင်းရင်းသားလက်နက်ကိုင်အဖွဲ့တွေဖြစ်တဲ့ ကရင်နယ်ခြားစောင့်တပ်ဖွဲ့-BGF ၊ ဒီမိုကရေစီ အကျိုးပြု ကရင်တပ်မတော်-DKBA နဲ့ KNU/KNLA – PC ကရင်ငြိမ်းချမ်းရေးကောင်စီအဖွဲ့တို့ နေထိုင်လှုပ်ရှားကြပါတယ်။

ပြီးခဲ့တဲ့ ဧပြီ ၂၇ ရက်မှာလည်း မြဝတီမြို့ အမှတ်(၄)ရပ်ကွက်က DKBA ဆက်ဆံရေးရုံးအနီးက ထိုက်တာကျားဖြန့်ဝင်းကို စစ်တပ်က ဝင်ရောက်ရှာဖွေရာကနေ နှစ်ဖက်တင်းမာမှုတွေဖြစ်ခဲ့ပါတယ်။