မေ-၁၄၊ ၂၀၂၆။ ထားမြတ်/People’s Spring
စစ်ရေးအခြေအနေတွေကြောင့် ဟားခါးမြို့အနီးဝန်းကျင်ရှိ တောတောင်များ၊ စစ်ရေးလှုပ်ရှားမှုဖြစ်ပွားနိုင်တဲ့ နေရာတွေနဲ့ လူသွားလာမှုနည်းပါးတဲ့ ဒေသတွေကို မလိုအပ်ဘဲ သွားလာခြင်းမပြုကြဖို့ ချင်းဒေသကာကွယ်ရေးတပ်(CDF)- ဟားခါးက ပြည်သူတွေကို မေတ္တာရပ်ခံလိုက်ပါတယ်။
ဟားခါးမြို့နယ်က စစ်တပ်လက်အောက်ခံ ပြည်သူ့စစ်တပ်ဖွဲ့ဝင် ၁ဦးကို ဖမ်းဆီးနိုင်ခဲ့ကြောင်း အသိပေးရာမှာ လက်ရှိ စစ်ရေး အခြေအနေတွေကြောင့် ပြည်သူတွေ လုံခြုံရေးအတွက် သတိပေးချက်ကို ဖော်ပြထားတာပါ။
အခု ဖမ်းမိတဲ့ စစ်ကောင်စီတပ်ဖွဲ့ဝင်ဟာ ဟားခါးမြို့အတွင်း ပြည်သူများအား ငွေညစ်တောင်းခံခြင်း၊ နေအိမ်များအား ဖောက်ထွင်းဓားပြတိုက်ခြင်းစတဲ့ ပြည်သူလုံခြုံရေးထိခိုက်စေသော လုပ်ရပ်များ ကျူးလွန်နေတာဖြစ်ပြီး မေလ ၁၃ရက်မှာ ဟားခါးမြို့တွင်းမှာပဲ ဖမ်းဆီးထိန်းသိမ်းနိုင်ခဲ့တာလို့ ဆိုပါတယ်။
Public Service Announcement
ပြည်သူတွေအနေနဲ့လည်း သံသယဖြစ်ဖွယ် လှုပ်ရှားမှုများတွေ့ရှိပါက နီးစပ်ရာ တာဝန်ရှိသူများထံ အချိန်မီ သတင်းပေးပို့ပူးပေါင်းဆောင်ရွက်ကြဖို့လည်း တိုက်တွန်းထားပါတယ်။
CDF-ဟားခါး အနေနဲ့ ပြည်သူတွေရဲ့ အသက်အိုးအိမ်လုံခြုံရေးကို ဦးစားပေးဆောင်ရွက်လျက်ရှိပြီး ပြည်သူအပေါ် အန္တရာယ်ပြုလုပ်ရပ်များအား ဆက်လက်ထိရောက်စွာ အရေးယူဆောင်ရွက်သွားမယ်လို့လည်း အသိပေးထားပါတယ်။
CDF ဟားခါးအနေနဲ့ အရင်ကလည်း ဟားခါးမြို့ပေါ်က စစ်ကောင်စီတပ်စခန်း၊ ရဲစခန်းတွေကို တိုက်ခိုက်တာ၊ စစ်ကောင်စီ ရဲနဲ့ တပ်ဖွဲ့ဝင်တွေကို ဖမ်းဆီးနိုင်တာ စတဲ့ ဖြစ်စဉ်တွေလည်းရှိခဲ့ပါတယ်။
