ကမမောင်း – ဖာပွန် လမ်းပိုင်းမှာတိုက်ပွဲဖြစ်နေပြီး ရွာတွေ ဗုံးကြဲခံရ

မေ – ၂၁ ၊၂၀၂၆ ၊နိုင်ပကောင်း/People’s Spring

ကရင်ပြည်န​ယ်၊ဖာပွန်ခရိုင်၊ကမမောင်း-ဖာပွန်ကားလမ်းမကြီးအတိုင်း စစ်ကြောင်းထိုးလာတဲ့စစ်တပ်စစ်ကြောင်းနဲ့ KNU တပ်မဟာ(၅)တို့တိုက်ပွဲဖြစ်ရာမှာဗုံးကြဲတိုက်ခိုက်မှုတွေကြောင့်ကားလမ်းအနီးဝန်းကျင်က ကျေးရွာတွေ ထိခိုက်ပျက်စီးသွားတယ်လို့ ဒေသခံကရင်သတင်းရင်းမြစ်ဆီကနေသိရပါတယ်။

မေလပထမအပတ်ကစပြီးကမမောင်းမြို့မှာစစ်တပ်ကအင်အားအလုံး အရင်းဖြည့်ခဲ့ပြီးနောက်ကမမောင်းမြို့၊ဝါးဒူးရွာကနေ ကမမောင်း-ကတိုင်တိ-ဖာပွန်ကားလမ်းအတိုင်းစစ်ကြောင်းထိုးလာခဲ့တာပါ။

အဲဒီစစ်ကြောင်းနဲ့ KNU ဦးစီးတဲ့ ပူးပေါင်းတပ်တို့ထိတွေ့တိုက်ပွဲတွေ နေ့စဉ်ဖြစ်ပွားနေတယ်လို့ကရင်သတင်းရင်းမြစ်က ပြောပါတယ်။

Public Service Announcement

လက်ရှိစစ်တပ်စစ်ကြောင်းဟာကမမောင်းမြို့နဲ့ ကတိုင်တိကျေးရွာကြား မှာရှိတဲ့ရေပူကျေးရွာမှာရောက်ရှိနေပြီလို့ ဒေသခံက ဆိုပါတယ်။

မြေပြင်ခြေလျင်တပ်တွေကြားတိုက်ပွဲဖြစ်ချိန်မှာစစ်တပ်ကလေကြောင်းပစ်ကူပါအသုံးပြုပြီးလေကြောင်းတိုက်ခိုက်မှုတွေကြောင့်အနီးဝန်းကျင်ရှိရွာတွေကနေအိမ်တွေထိခိုက်ပျက်စီးကာဒေသခံတွေလည်း ကမမောင်းမြို့နဲ့ မြိုင်ကြီးငူဒေသဆီ စစ်ဘေးရှောင်လာခဲ့ရတယ်လို့ ကမမောင်းဒေသခံတစ်ဦးက ပြောပါတယ်။

ရေပူရွာ၊မဲကလားရွာ၊ ကျောက်ကွင်းရွာစတဲ့ရွာတွေမှာနေအိမ်တွေအများအပြား ဗုံးကြဲတိုက်ခိုက်ခံရတာကြောင့်ပျက်စီးသွားခဲ့ပြီးအရပ်သားတချို့လည်းထိခိုက်မှုရှိတယ်လို့ ဒေသခံကရင်သတင်းရင်းမြစ်ဆီကနေ သိရပါတယ်။

ပျက်စီးသွားတဲ့ နေအိမ်နဲ့ ထိခိုက်ဒဏ်ရာရ အရပ်သားအရေအတွက်အတိ အကျကိုတော့မသိရပါဘူး။

ကမမောင်း-ကတိုင်တိ-ဖာပွန် ကားလမ်းမကြီး တလျှောက်ကို ပြန်လည်ထိန်းချုပ်နိုင်ဖို့နဲ့ ဖာပွန်ဗျူဟာ၊ ကတိုင်တိဗျူဟာတို့ဆီ စစ်ကူပေးပို့နိုင်ဖို့အတွက် စစ်တပ်က အင်အားအလုံးအရင်းသုံးပြီး မေလ ပထမအပတ်ကစတင်ကာ KNU တပ်မဟာ (၅)နယ်မြေထဲ ထိုးဖောက်ဝင်ရောက်နေတာပါ။