ဇူလိုင်-၃၊၂၀၂၆။စိုင်းနောင်/People’s Spring
ရန်ကုန်တက္ကသိုလ်ထဲက အနီရောင်စိန်ပန်းပင်တွေကို ဖယ်ရှားဖို့ အာဏာသိမ်းခေါင်းဆောင်မင်းအောင်လှိုင်ရဲ့ညွှန်ကြားချက်ကြောင့် စည်ပင်ဌာနနဲ့တက္ကသိုလ်ဝန်ထမ်းတွေပေါင်းပြီး အပင်ရင်းကနေခုတ်လှဲနေတယ်လို့ သတင်းရရှိပါတယ်။
ရန်ကုန်တက္ကသိုလ်၊ဘွဲ့နှင်းသဘင်အဆောက်အအုံနားက စိန်ပင်ကြီးတွေကို ခုတ်လှဲပစ်တာပါ။
“အပင်ကြီးတွေပါခုတ်ပစ်တာဗျ။ဘာကိုမှအနှောင့်အယှက်မပေးတဲ့အပင်တွေကို ခုတ်တာ။ ခုတ်ရမယ့်အပင်တွေရှိတယ်။အဲဒီအပင်တွေမခုတ်ဘဲ အနီရောင်စိန်ပန်းပင်တွေချည်းပဲလိုက်ခုတ်သွားတာ”လို့ဇူလိုင်လ ၃ ရက်နေ့မနက်ပိုင်းမှာ ရောက်ရှိခဲ့သူတစ်ဦးက ပြောပါတယ်။
Public Service Announcement
စိန်ပန်းပင်တွေကိုခုတ်တာဟာ နေပြည်တော်ရဲ့အမိန့်ဖြစ်တယ်လို့သိရကြောင်း နဲ့ ရန်ကုန်စည်ပင်ဌာနအကူအညီနဲ့ စိန်ပန်းပင်ကိုခုတ်ပစ်တာလို့ တက္ကသိုလ်ဝင်းလုံခြုံရေးအဖွဲ့နဲ့ နီးစပ်သူတစ်ဦးကပြောပါတယ်။
ရန်ကုန်တက္ကသိုလ်၊ ဘွဲ့နှင်းသဘင်အဆောက်အအုံနားက စိန်ပင် ၁၂ ပင်ထက်မနည်း ခုတ်လှဲခံထားရပါတယ်။ အရင်ကတည်းကရန်ကုန် တက္ကသိုလ်ကို ပိုလှစေတဲ့ စိန်ပန်းပင်တွေကို အာဏာသိမ်းစစ်တပ်ကခုတ်နေတာဟာမဖြစ်သင့်ဘူးလို့ မျက်မြင်တွေ့ရှိသူအချို့က ပြောပါတယ်။
“တကယ် ခုတ်ရမှာက ဘွဲ့နှင်းသဘင်နား ကပ်ပေါက် နေတဲ့ အလေ့ပေါက်ပင်ကြီးပါ ။သူက သော်ကကြီးပင်ကိုလည်း မိုးနေတယ်။ ဘွဲ့နှင်းသဘင်အုတ်မြစ်ကိုလဲဒုက္ခပေးမှာ။ခုတော့တလွဲ ဆံပင်ကောင်းနေတယ်”လို့ စိန်ပန်းပင်တွေခုတ်လှဲခံထားရတာကိုတွေ့ရှိခဲ့သူတဦးက လူမှုကွန်ရက်မှာရေးသားထားပါတယ်။
အာဏာသိမ်းစစ်ခေါင်းဆောင်ဗိုလ်ချုပ်မှူးကြီးမင်းအောင်လှိုင် နဲ့ စစ်အုပ်စုဟာ အမျိုးသားဒီမိုကရေစီအဖွဲ့ချုပ်ပါတီ ကိုယ်စားပြုအရောင်ဖြစ်တဲ့အနီရောင်ကိုမနာလိုမရှုစိမ့်သူဖြစ်တယ်လို့ လူသိများပါတယ်။
မန္တလေးမြို့က ဒေါ်အောင်ဆန်းစုကြည်လမ်းလို့ အမည်ပေးထားတဲ့ ၃၈လမ်းထဲက အနီရောင်စိန်ပန်းပင်တွေကိုလည်း စစ်တပ်အာဏာသိမ်းပြီးတဲ့နောက်ပိုင်း ခုတ်လှဲပစ်ခဲ့ပါတယ်။ ဒါအပြင် အာဏာသိမ်း ခေါင်းဆောင်နဲ့စစ်တပ်ဟာ ဗေဒင်ယတြာတွေကိုလည်း အလွန်ယုံကြည်ကြပါတယ် ။ဒါကြောင့် အနီရောင်ပန်းတွေပွင့်တဲ့ စိန်ပန်းပင်ကိုခုတ်လှဲနေတာဟာ သင်ကေတကိုဖျက်ဆီးနေတာလား ၊ဗေဒင်ယတြာအရလုပ်နေတာလားဆိုတာကိုတော့မသိရသေးပါဘူး။
ဒါ့အပြင်စစ်တပ်ကအခုလပိုင်းအတွင်းဗိုလ်ချုပ်ကြေးရုပ်တု နဲ့ NLD ပါတီရုံးတွေကိုလည်းလိုက်လံ ဖျက်ဆီးနေပါတယ် ။
“လက်နက်အားကိုးပြီး အာဏာသာကိုင်ထားချင်တာ။ အနီရောင်မြင်ရင် ခွေးက ကျားကို ကြောက်သလိုကြောက်တာ”လို့ ရန်ကုန်တက္ကသိုလ်ကျောင်းသားဟောင်းတစ်ဦးက ပြောပါတယ်။
လက်ရှိပညာရေးဝန်ကြီးဟာ ဒေါက်တာချောချောစိန်ဖြစ်ပါတယ်။ ဒေါက်တာချောချောစိန်က အာဏာသိမ်းခေါင်းဆောင်ကို ပြီးခဲ့တဲ့ဖေဖော်ဝါရီလ၅ရက်နေ့မှာပြည်သူ့ရေးရာစီမံခန့်ခွဲမှုပါရဂူဘွဲ့ ပေးအပ်ခဲ့ပါတယ်။
အာဏာသိမ်းပြီးနောက်ပိုင်း အရပ်သားပြည်သူတစ်သောင်းကျော်ကိုသတ်ဖြတ်ပြီး နိုင်ငံကို ဖျက်ဆီးခဲ့တဲ့ စစ်ခေါင်းဆောင်ကို ပြည်သူ့ရေးရာစီမံခန့်ခွဲမှုပါရဂူဘွဲ့ ပေးအပ်ခဲ့မှုအပေါ် ပြည်သူလူထုကပြင်းပြင်းထန်ထန်ဝေဖန်ခဲ့ကြပါတယ်။
လက်ရှိမှာ ရန်ကုန်တက္ကသိုလ်ထဲက စိန်ပန်းပင်တွေကို ခုတ်လှဲတာကလည်း အာဏာသိမ်းစစ်ခေါင်းဆောင်ရဲ့အလိုကျ လုပ်ဆောင်တာလို့ ရန်ကုန်တက္ကသိုလ်ကျောင်းသားဟောင်းတွေကဝေဖန်နေကြပါတယ်။
