ဇူလိုင်-၇၊ ၂၀၂၆။ထားမြတ်/People’s Spring
ပဲခူးတိုင်း ရေတာရှည်မြို့နယ်အတွင်း စစ်ရေးအခြေအနေတွေကြောင့် ဒေသခံတွေ အနေနဲ့ စစ်ရေးသတိရှိဖို့ ရေတာရှည်မြို့နယ် အခြေစိုက် ပြည်သူ့ကာကွယ်ရေးတပ်မတော်(PDF) တပ်ရင်း(၃၅၀၄) သတင်းပြန်ကြားရေးဌာန တာဝန်ခံ က သတိပေးတိုက်တွန်းပါတယ်။
ဇွန်လအတွင်း ရေတာရှည်မြို့နယ် မှာ PDF တပ်တွေနဲ့ စစ်ကောင်စီအကြား တိုက်ပွဲတွေဖြစ်ခဲ့ပြီး အထိနာတဲ့ စစ်တပ်က ဒေသတွင်း စစ်ရေးလှုပ်ရှား လေကြောင်းတိုက်ခိုက်မှုတွေ လုပ်ဆောင်လာတဲ့အပေါ် အခုလို တိုက်တွန်းခဲ့တာပါ။
“အဓိကတိုက်တွန်းချင်တာကတော့ မိဘပြည်သူများအနေနဲ့ စစ်ရေးသတိ၊ စစ်ရေးအမြင် အမြဲရှိနေပေးကြဖို့ပါပဲ။အခြေအနေက အချိန်မရွေးပြောင်းလဲနိုင်တာမို့မိမိတို့ဒေသအလိုက်တာဝန်ရှိသူတွေ၊ ကာကွယ်ရေးတပ်ဖွဲ့တွေ ထုတ်ပြန်တဲ့ သတင်းနဲ့ သတိပေးချက်တွေကို အမြဲမပြတ် နားစွင့်ပေးကြပါ။ ပြီးတော့ အရေးပေါ်ရွှေ့ပြောင်းရရင်လိုအပ်မယ့် ဆေးဝါး၊ရိက္ခာနဲ့ အရေးကြီးစာရွက်စာတမ်းတွေကို အသင့်ပြင်ထားကြဖို့ တိုက်တွန်းချင်ပါတယ်” လို့ တပ်ရင်း ၃၅၀၄ တာဝန်ရှိသူက ပြောပါတယ်။
Public Service Announcement
လက်ရှိမှာဒေသတွင်းရွာ ၂၀ ခန့်မှ ဒေသခံတွေ စစ်ရှောင်နေကြရတယ်လို့ဆိုပါတယ်။
“ဒီချိန်က မိုးစပါးစိုက်ပျိုးရာသီအချိန်ဖြစ်လည်းဖြစ်တယ် ဒီချိန်ဆို စပါးစိုက်ပျိုးပီးစီးရမယ့်အချိန်ပေါ့တချို့ကတော့စိုက်ပျိုးပီးသားတွေပစ်ထားခဲ့ရတယ်။ တစ်ချို့ကလုံးဝမလုပ်ရသေးတာတွေရှိတယ်။ စစ်ဘေးရှောင်နေရတော့ တစ်ချို့စိုက်ပျ်ုးပြီးသားဆိုပေမယ့်လည်း ပေါင်းတွေမရှင်းရတော့ ပျက်စီးမယ့်အနေအထားတွေလည်းရှိတယ်ပေါ့။ မိုးတွင်းကာလကတော့ အဓိကစစ်ဘေးရှောင်တွေအတွက် ဆေးဝါးနဲ့ စားနပ်ရိက္ခာပါပဲ ကျွန်တော်တို့တပ်ရင်းအနေနဲ့ကတော့ စားနပ်ရိပ်က္ခာအတွက် တက်နိုင်သမျှထောက်ပံ့မှုတော့လုပ်ပေးနေတာလေးတွေ တပ်ခွဲ ၁ ကအဓိကထားပံ့ပိုးလုပ်ဆောင်ပေးနေပါတယ်” လို့ PDF တပ်ရင်း (၃၅၀၄) တာဝန်ရှိသူက ပြောပါတယ်။
မြေပြင်တိုက်ပွဲ အခြေအနေတွေနဲ့ ပတ်သက်တဲ့ မေးမြန်းမှုကိုတော့ စစ်ရေးအရ အရေးကြီးတဲ့ အပိုင်းတွေ ရှိနေတာမို့ အသေးစိတ် ထုတ်ပြောဖို့စောသေးတယ်လို့လည်းတပ်ရင်းတာဝန်ရှိသူက ပြောပါတယ်။
ဒေသတွင်း တော်လှန်ရေးတပ်တွေကလည်း ရေတာရှည်နယ် စစ်ရေးအခြေအနေတွေနဲ့ ဒေသခံတွေ စစ်ရှောင်နေကြရတာရှိတာကြောင့် နီးစပ်ရာ တပ်ရင်းတပ်ဖွဲ့တွေ၊ ပြည်သူတွေကို ပံ့ပိုးကူညီကြဖို့ နှိုးဆော်ထားတာလည်း တွေ့ရပါတယ်။
