ဇူလိုင် ၂၇၊ ၂၀၂၆။ ထားမြတ်၊ဒလပန်း/People’s Spring
ပဲခူးတိုင်း၊ တောင်ငူခရိုင် လေလံမြောင်(လေလာမြောင်)ကျေးရွာကို စစ်တပ်က လေကြောင်းဗုံးကြဲတိုက်ခိုက်ခဲ့လို့ မိသားစု ၂ခုက ပြည်သူ ၈ဦးသေဆုံးခဲ့တယ်လို့ ပြည်သူ့ကာကွယ်ရေးတပ်မတော်(PDF) ပဲခူးတိုင်း စစ်ဌာနက သတင်းထုတ်ပြန်ပါတယ်။
အာဏာသိမ်းစစ်တပ်ဟာ ဇူလိုင် ၂၅ရက် နေ့လည်ပိုင်းမှာ လေလာမြောင်ကျေူရွာကို ပေါင် ၂၅၀ ဗုံးသီး ၂လုံး ကြဲချပြီး စက်သေနတ်နဲ့ပစ်ခတ်ခဲ့လို့ ကလေးငယ်တွေ အပါအဝင် ပြည်သူလူထုတွေ သေဆုံးခဲ့ရတာလို့ အသိပေးပါတယ်။
တိုက်ပွဲဖြစ်ပွားမှုမရှိဘဲ လေကြောင်း တိုက်ခိုက်ခဲ့တာဖြစ်ပြီး မိသားစုတစ်ခုမှ မိသားစုဝင် ၅ဦး၊ နောက်ထပ် မိသားစုက ၃ဦး သေဆုံးခဲ့တယ်လို့ဆိုပါတယ်။
Public Service Announcement
သေဆုံးခဲ့သူ ၈ဦးအနက် အသက် ၇နှစ်ကနေ ၁၈နှစ်အကြားရှိ ကလးငယ် ၄ဦး ပါဝင်တယ်လို့ ဖော်ပြထားပါတယ်။
ပြည်သူသေဆုံးထိခိုက်တာတွေအပြင် ဘာသာရေးအဆောက်အဦးအချို့ ပျက်စီးခဲ့ရကြောင်း ထုတ်ပြန်ပါတယ်။
စစ်တပ်ဟာ အဲဒီနေ့ ညနေပိုင်းမှာ ဒေသတွင်းက စကွေးရွာအရှေ့ဘက် ဆွာတမံအနီးဝန်းကျင် နေရာ ၂ခုကိုလည်း လေကြောင်း တိုက်ခိုက်မှု ၄ကြိမ် ထက်မနည်း ပြုလုပ်ခဲ့ကြောင်း ဖော်ပြထားပြီး အဲဒီ တိုက်ခိုက်ခံရမှုကြောင့် ထိခိုက်ပျက်စီးဆုံးရှုံးအခြေအနေတွေ စုံစမ်းနေဆဲလို့ အသိပေးပါတယ်။
” အခုလို အရပ်သားပြည်သူတွေအပေါ် ရည်ရွယ်ချက်ရှိရှိ ပစ်မှတ်ထားကာ လေကြောင်းကနေ ဗုံးကြဲတိုက်ခိုက်ခဲ့တဲ့ အကြမ်းဖက်စစ်အုပ်စုရဲ့ လုပ်ရပ်ဟာ လူ့အခွင့်အရေးချိုးဖောက်မှုနဲ့ စစ်ရာဇဝတ်ကျူးလွန်မှုလည်းဖြစ်ပါတယ်” လို့ ပဲခူးတိုင်း စစ်ဌာနက ထုတ်ပြန်ပါတယ်။
လေကြောင်းတိုက်ခိုက်ခံခဲ့ရတဲ့ ဒေသခံတွေကို ပဲခူးတိုင်းစစ်ဌာနအောက်ရှိ ပြည်သူ့ကာကွယ်ရေးတပ်ဖွဲ့ဝင်များက ဆေးဘက်ဆိုင်ရာကူညီမှုအပါအဝင် လိုအပ်သော ကူညီမှုများကို လုပ်ဆောင်ပေးခဲ့ကြောင်းလည်း ဖော်ပြထားပါတယ်။
အာဏာသိမ်းစစ်တပ်ဟာ ရေတာရှည်မြို့နယ်အတွင်းက ကျေးရွာတွေကို ပစ်မှတ်ထားတဲ့လေကြောင်း တိုက်ခိုက်မှုတွေကို အခုလပိုင်းအတွင်း မကြာခဏ ပြုလုပ်နေလို့ ပြည်သူထိခိုက်သေဆုံးမှုတွေရှိခဲ့ကြောင်း ဒေသတွင်း ကာကွယ်ရေးတပ်တွေက အသိပေးထားပါတယ်။
