ဇူလိုင် – ၈ ၊၂၀၂၆၊နိုင်ပကောင်း/People’s Spring
မြ၀တီမြို့တောင်ဘက်ဖလူးကျေးရွာဆီ ဦးတည်စစ်ကြောင်းထိုးနေတဲ့ စစ်တပ်စစ်ကြောင်းတွေနဲ့ KNU ပူးပေါင်းတပ်တို့ဒီနေ့ (ဇူလိုင် ၈)ရက်မနက်အစောပိုင်းကစပြီး တိုက်ပွဲအပြင်းအထန်ဖြစ်ပွားနေတယ်လို့ ကရင်သတင်း ရင်းမြစ်က ပြောပါတယ်။
ထိုင်း-မြန်မာနယ်စပ်နားက မြ၀တီ-ဝေါ်လေ ကားလမ်းပေါ်မှာရှိတဲ့ မင်းလက်ပံကျေးရွာနဲ့ ဖလူးကျေးရွာတို့ကို ပြန်လည်သိမ်းယူနိုင်ဖို့အတွက် စစ်တပ်က ထိုးစစ်ဆင်နေတာ ကိုးလကြာမြင့်လာပြီးနောက် လက်ရှိ ဇူလိုင်လအစောပိုင်းကစတင်ကာ အင်အားအလုံးအရင်းသုံးလာတာပါ။
“ညက အလုံးကြီးတွေ(လက်နက်ကြိီး) တစ်ညလုံးပစ်တယ်၊ ဒီမနက် တိုက်ပွဲကြမ်းနေပြီး၊ အသေးအကြီးအသံစုံပဲ” လို့ ကရင်သတင်းရင်းမြစ်က ပြောပါတယ်။
Public Service Announcement
မနေ့ (ဇူလိုင်၇ရက်) က စစ်တပ်က လေးကေကော်မြို့အနီး၊ ထီးမယ်ဝါးခီးရွာဘက်ကို အင်အားအများအပြား ပို့ထားလိုက်ပြီးနောက် ညပိုင်းမှာ လက်နက်ကြီးတွေနဲ့ တောက်လျှောက်ပစ်ခတ်ခဲ့တာလို့သိရပါတယ်။
ဒီနေ့ မနက်ပိုင်းမှာမြေပြင် စစ်ကြောင်းထိုးတက်လာတာလို့ ကရင်သတင်းရင်းမြစ်က ပြောပါတယ်။
တိုက်ပွဲဟာ မနက်အစောပိုင်းကစပြီး မနက်၁၀ နာရီခွဲအထိ ဆက်လက်ပြင်းထန်နေဆဲပဲလို့ သိရပါတယ်။
“ထီးမယ်ဝါးခီးလမ်းကနေတက်လာတာ ၊စစ်တပ်က အထိများတယ်၊ ပစ(ပြည်သူ့စစ်မှုထမ်း)တွေပေါ့၊အခု လူနာတင်ကားနဲ့ မြ၀တီကို လူနာတွေပြန်ပို့တယ်”လို့ ကရင်သတင်းရင်းမြစ်က အသိပေးပါတယ်။
ကရင်သတင်းရင်းမြစ်ရဲ့ ပြောဆိုချက်အရ စစ်တပ်ဟာ မြ၀တီမြို့ စောင့်တပ်ဖြစ်တဲ့ အမှတ် ( ၂၇၅ ) ခြေလျင်တပ်ရင်း ထဲမှာ ပြီးခဲ့တဲ့လတွေကတည်းက ဆေးရုံတစ်ခုတည်ဆောက်ထားပြီး အဲဒီဆေးရုံထဲမှာပဲ တိုက်ပွဲမှာ ထိခိုက်ဒဏ်ရာရ စစ်သည်လူနာတွေကို ကုသမှုပေးနေတယ်လို့ သိရပါတယ်။
လက်ရှိ ဖလူးနယ်မြေ စစ်တပ်ရဲ့ ထိုးစစ်မှာ ဘားအံမြို့နယ်၊ ကြာအင်းပေါ်တော်မူအထူးဒေသမှာ အခြေစိုက်တဲ့ တိုးတက်သောဗုဒ္ဓဘာသာကရင်အမျိုးသားတပ်မတော်(DKBA)အဖွဲ့က ဗိုလ်ဘိတို့တပ်ဖွဲ့တွေက စစ်တပ်နဲ့အတူ ပါဝင်ကူညီတိုက်ခိုက်ပေးနေတယ်လို့ ကရင်သတင်းရင်းမြစ်တွေက အသိပေးထားပါတယ်။
ဗိုလ်ဘိတို့ DKBA တပ်ဟာ လက်ရှိ ဖာပွန်-ကမမောင်းလမ်းပိုင်းတိုက်ပွဲမှာ စစ်တပ်ကို ကူညီပေးနေတဲ့ ကရင်လက်နက်ကိုင်အဖွဲ့တစ်ဖွဲ့လည်း ဖြစ်ပါတယ်။
