ကမ္ဘာ့ဖလား ဘောလုံးပြိုင်ပွဲမှာ အနိုင်ရ ဗိုလ်စွဲပြီး ဆုဖလားကြီးကို သယ်ဆောင်လာတဲ့ စပိန်လက်ရွေးစင် ဘောလုံးအသင်းဟာ မက်ဒရစ် မြို့တော်ကို ပြန်ရောက်လာချိန်မှာ သူရဲကောင်းတွေလို သောင်းသောင်းဖြဖြ ကြိုဆိုနှုတ်ဆက်ခြင်း ခံခဲ့ရပါတယ်။
စပိန်ကစားသမား ၂၆ ဦး၊ နည်းပြအဖွဲ့ဝင်တွေနဲ့ တခြားဝန်ထမ်းတွေကို သယ်ဆောင်လာတဲ့ စင်းလုံးချေ လေယာဉ်ကြီးဟာ ဇူလိုင် ၂၀ ရက်နေ့မှာ မက်ဒရစ်ဆီ ရောက်ရှိလာခဲ့ပါတယ်။ အမေရိကန်နိုင်ငံ၊ နယူးဂျာစီမှာ ကျင်းပခဲ့တဲ့ ကမ္ဘာ့ဖလား ဗိုလ်လုပွဲမှာ စပိန်အသင်းဟာ လက်ရှိ ချန်ပီယံ အာဂျင်တီးနားကို အချိန်ပိုမှာ ဖာရန်တောရက်စ်ရဲ့ သွင်းဂိုးနဲ့ အနိုင်ယူပြီး ချန်ပီယံဆုကို သိမ်းယူနိုင်ခဲ့တာ ဖြစ်ပါတယ်။
လေဆိပ်မှာတော့ အသင်းမန်နေဂျာ လူးဝစ်ဒယ်လာဖွန်တေးနဲ့ အသင်းခေါင်းဆောင် ရိုဒရီ ဟာနန်ဒက်ဇ်တို့ဟာ လေယာဉ်ပေါ်ကနေ အရင်ဆုံး ဆင်းလာခဲ့ပြီး ဆုဖလားကြီးကို ဂုဏ်ယူစွာ ကိုင်မြှောက်ပြခဲ့ပါတယ်။
အဲဒီနောက်မှာတော့ စပိန်အသင်းဟာ ‘ချန်ပီယံတွေကို ဂုဏ်ပြုပါတယ်’ဆိုတဲ့ စာသား ရေးထိုးထားတဲ့ စင်းလုံးငှား ဘတ်စ်ကားပေါ်ကို တက်ခဲ့ကြပါတယ်။ အဲဒီ ဘတ်စ်ကားဟာ လေဆိပ်ထိ လာရောက်စောင့်ဆိုင်းပြီး ဂုဏ်ပြုသီချင်းတွေ ဟစ်ကြွေး သီဆိုနေတဲ့ ပရိသတ် ရာဂဏန်းရှေ့ကနေ စတင်ဖြတ်သန်း မောင်းနှင်ခဲ့ပါတယ်။
Public Service Announcement
အဲဒီနောက် ဘတ်စ်ကားဟာ စပိန်အသင်းအတွက် ခဏတဖြုတ် အနားယူဖို့ စီစဉ်ပေးထားတဲ့ ဇိမ်ခံဟိုတယ် တစ်ခုဆီ ပို့ဆောင်ပေးခဲ့ပါတယ်။ မွန်းလွဲပိုင်းမှာ အသင်းသားတွေဟာ ဇာဇူလာ နန်းတော်ဆီကို သွားရောက်ပြီး ဘုရင် သတ္တမဖိလစ်၊ မိဖုရားခေါင်ကြီး လက်တစ်ဇာ၊ မင်းသမီး လီယိုနော်နဲ့ အင်ဖန်တာ ဆိုဖီယာတို့ အပါအဝင် တော်ဝင်မိသားစုတွေရဲ့ ဂုဏ်ပြု နှုတ်ဆက်မှုကို ခံယူခဲ့ပါတယ်။
ညနေပိုင်းမှာတော့ စပိန် အစိုးရက စီစဉ်ပေးထားတဲ့ မွန်ကလိုအာ နန်းတော် ဂုဏ်ပြုပွဲဆီကို တက်ရောက်ခဲ့ ဝန်ကြီးချုပ် ပက်ဒရို ဟွမ်းချက်ဇ်က အသင်းသားတွေကို အခမ်းအနားနဲ့ ကြိုဆိုခဲ့ပါတယ်။ ဒါ့အပြင် ဝန်ကြီးချုပ်က စပိန်အသင်းရဲ့ စွမ်းစွမ်းတမံ အားထုတ်မှုနဲ့ ထူးခြားတဲ့ ကစားပုံတွေ အတွက်လည်း နည်းပြအဖွဲ့နဲ့ ကစားသမားတွေကို ကျေးဇူးစကား ဆိုခဲ့ပါတယ်။
ညပိုင်းမှာတော့ မက်ဒရစ်မြို့ခံ ပြည်သူတွေ တက်တက်ကြွကြွ စောင့်မျှော်နေတဲ့ အောင်ပွဲခံ လှည့်လည်မှု အစီအစဉ် စတင်လာခဲ့ပါတယ်။ နန်းတော်နှစ်ခုမှာ ကျင်းပခဲ့တဲ့ ဂုဏ်ပြု အစီအစဉ်တွေ အပြီးမှာတော့ ကစားသမားတွေဟာ အထူးစီစဉ်ထားတဲ့ အမိုးဖွင့် ဘတ်စ်ကားကြီးပေါ် တက်ရောက်ကြပါတယ်။ ဘတ်စ်ကားဟာ မွန်ကလိုအာကနေ ဖြည်းဖြည်းချင်း စတင်ထွက်ခွာပြီး မက်ဒရစ် မြို့လယ် အထင်ကရ လမ်းမကြီး တချို့ဆီ လှည့်လည် မောင်းနှင်ခဲ့ပါတယ်။
နေဝင်သွားပြီ ဖြစ်ပေမယ့်လည်း မက်ဒရစ်ရဲ့ နွေရာသီ အပူချိန်ဟာ ၃၅ ဒီဂရီ ဆဲလ်ဆီးရပ်စ်လောက်ထိ မြင့်တက်နေပါတယ်။ ဒါပေမဲ့လည်း စပိန်ပြည်သူ နှစ်သန်းလောက်ဟာ နိုင်ငံဂုဏ်ဆောင် ကစားသမားတွေရဲ့ အပြန်ခရီးကို စိတ်အား ထက်ထက်သန်သန်နဲ့ စုဝေး စောင့်ကြိုနေပါတယ်။ ဘတ်စ်ကားပေါ်မှာတော့ ကစားသမားတွေကလည်း ပရိသတ်တွေကို နှုတ်ဆက်ရင်း၊ ကခုန်ရင်း၊ အလံတွေကို ဝှေ့ရမ်းရင်း လိုက်ပါလာခဲ့ပါတယ်။
နောက်တော့ ဘတ်စ်ကားဟာ မြို့တော်ခန်းမနားက နာမည်ကျော် ဆီဘဲလက်စ် ရေပန်းကြီးနားမှာ ရပ်တန့်သွားပြီး ကစားသမားတွေဟာ ကြိုတင်ပြင်ဆင် ဆောက်လုပ်ထားတဲ့ စင်မြင့်ပေါ်ကို တက်ခဲ့ကြပါတယ်။ အဲဒီမှာတော့ ဆုဖလားကို မိတ်ဆက် ပြသတဲ့ တရားဝင် အခမ်းအနားကို ဆက်လက် ဆင်နွှဲခဲ့ပါတယ်။
ကစားသမား တစ်ဦးချင်းစီနဲ့ နည်းပြအဖွဲ့ဝင် တစ်ဦးချင်းစီက ဆုဖလားကို တစ်ကြိမ် ကိုင်မြှောက်ပြတိုင်း စုဝေးနေတဲ့ ပရိသတ်တွေဆီ အားပေး အော်ဟစ်သံကြီးက ကျယ်ကျယ်လောင်လောင် ထွက်ပေါ်လာခဲ့ပါတယ်။
အောင်ပွဲခံမှု အစီအစဉ်တွေ အပြီးမှာတော့ စပိန် နာမည်ကြီး ဂီတကြယ်ပွင့်တွေက ပရိသတ်တွေအတွက် ဖျော်ဖြေခဲ့ကြပြီး မက်ဒရစ်မြို့တော် ကောင်းကင်ယံမှာလည်း မီးရှူးမီးပန်းတွေ ဂုဏ်ပြု ပစ်ဖောက်ခဲ့ပါတယ်။
စပိန်ဟာ ၂၀၁၀ ပြည့်နှစ်တုန်းက ကမ္ဘာ့ချန်ပီယံ ဖြစ်ခဲ့ဖူးပြီး ၁၆ နှစ်အကြာမှာ ဒုတိယ အကြိမ်အဖြစ် ကမ္ဘာ့ဖလားကြီးကို ဆွတ်ခူးနိုင်ခဲ့တာ ဖြစ်ပါတယ်။
ကိုးကား: BBC
