သြဂုတ်-၄၊၂၀၂၆။မိထက်/People’s Spring
လေးမျက်နှာမြို့နယ်ရေဘေးကို ကူညီကယ်ဆယ်ရေးလာတဲ့ ကားတစ်စီး တိမ်းမှောက်ပြီး ၈ ဦး ထိခိုက်မှုရှိခဲ့ပါတယ်။
ဟင်္သာတ-ပုသိမ်လမ်းကနေ ခွဲထွက်ပြီး ရေဘေးသင့်ဒေသတွေကိုသွားလို့ရတဲ့ နိဗ္ဗာန်ရွာနဲ့ ခမောက်စုရွာကြားကားလမ်းမှာဩဂုတ်လ၄ရက် မနက်ပိုင်းက ကားတိမ်းမှောက်ခဲ့တာဖြစ်ပါတယ်။
“အလှူရှင်ကားမှောက်တာ။၈ဦး ထိခိုက်တယ်။ လိုအပ်တာတွေ ကုသပေးနေတယ်လို့ လှမ်းပြောတယ်။ လမ်းကျကျဉ်းပြီးသိပ်မကောင်းလှဘူး”လို့ ရေဘေးကယ်ဆယ်ရေးလုပ်နေတဲ့ လူငယ်တစ်ဦးက ပြောပါတယ်။
Public Service Announcement
လေးမျက်နှာမြို့ကိုကာရံထားတဲ့ ငဝန်မြစ်ရေကာတာဟာ ဇူလိုင်လ ၃၀ရက်ညမှာကျိုးကျခဲ့ပြီး ဆိုးရွားတဲ့ရေဘေးကို ဒေသခံတွေရင်ဆိုင်နေရတာဖြစ်ပါတယ်။ ရေဘေးကြုံနေတဲ့ဒေသခံတွေကို အနယ်နယ်အရပ်ရပ်ကအလှူရှင်တွေက ကား၊စက်လှေတွေသုံးပြီး လာရောက်လှူဒါန်းနေကြပါတယ်။
လက်ရှိမှာ လေးမျက်နှာမြို့နယ်အပြင် ဘေးပတ်ဝန်းကျင်ဒေသတွေဖြစ်တဲ့ အိုင်သပြု၊ ဟင်္သာတ၊ ရေကြည်၊ ကျုံကျော်နဲ့ ငါးသိုင်းချောင်းမြို့နယ်တွေထဲကကျေးရွာတွေမှာပါ ရေကြီးနစ်မြုပ်နေတာဖြစ်ပါတယ်။
“လေးမျက်နှာမှာ ရေထပ်တက်တယ်နော်။ နောက်ပြီး အောက်ဖက်မြို့နယ်တွေလည်း ရေတိုးနေတယ်။ စိုးရိမ်နေရတဲ့အခြေအနေမှာပဲရှိနေတာပါ”လို့ ရေကြည်မြို့ခံတဦးကပြောပါတယ်။
ရေစီးကြောင့် ဒေသတွင်းလမ်းပိုင်းတွေလည်းပျက်စီးမှုရှိနေပြီး ဩဂုတ်လ ၃ရက်နေ့မနက်ပိုင်းက လေးမျက်နှာ-ငါးသိုင်းချောင်းလမ်းပိုင်းဆက်သွယ်ထားတဲ့ တံတားငယ်တစ်စင်း ရေတိုက်စားမှုကြောင့် ကျိုးကျခဲ့ပါတယ်။
