ကျောင်းတွင်းပစ်ခတ်မှု အလွန်ဆိုးရွားတဲ့ထိတ်လန့်ဖွယ်ဖြစ်ရပ်လို့ အနုတင်​ပြော

သြဂုတ်-၇၊၂၀၂၆။People’s Spring

ထိုင်းဝန်ကြီးချုပ် အန်နုတင် ချန်ဗီရာကူလ်က နွန်သဘူရီမြို့ကျောင်းတွင်းပစ်ခတ်မှုကြောင့် လူသေဆုံးခဲ့ရတဲ့ဖြစ်ရပ်အပေါ် အလွန်အမင်း ဝမ်းနည်းကြောင်းပြောကြားပြီး၊ ဒီဖြစ်ရပ်ဟာအလွန်ဆိုးရွားတဲ့ထိတ်လန့်ဖွယ် ဖြစ်ရပ်လို့​ပြောပါတယ် ။

ဒါ့အပြင် ဒဏ်ရာရရှိသူ​တွေကို အရေးပေါ်အကူအညီ​တွေ အမြန်ဆုံးပေးအပ်ဖို့ သက်ဆိုင်ရာအာဏာပိုင်​တွေကို ညွှန်ကြားထားတယ်လို့ သတင်း​ထောက်​တွေကို ​ပြောပါတယ် ။

ဘန်ကောက်မြို့တော် မြောက်ပိုင်းနားမှာ ဖြစ်ပွားခဲ့တဲ့ စာသင်ကျောင်း ပစ်ခတ်မှုမှာ သေနတ်သမား အပါအဝင် အနည်းဆုံး ၅ ဦးသေဆုံးပြီး ၁၅ ဦးထက်မနည်း ဒဏ်ရာရခဲ့တယ်လို့ The Reporter သတင်းဌာနက ​နေ့ခင်း ၁၂ နာရီခန့်ကအချက်အလက်ကို ကိုးကားပြီး​ဖော်ပြပါတယ် ။ Khaosod သတင်းဌာနက​​တော့ ​သေဆုံးသူ ၇ ဦးထိတိုးလာပြီလို့​ဖော်ပြပါတယ် ။

Public Service Announcement

ဒီက​​နေ့ မနက်ပိုင်းက နွန်သာဘူရီစာသင်ကျောင်းမှာဖြစ်ခဲ့တဲ့ ပစ်ခတ်မှုမှာသေနတ်သမားဟာ Grade 8 ကျောင်းသား တစ်ဦးဖြစ်ပြီးကျောင်းအဆောက်အအုံထဲမှာပုန်းအောင်းနေတာကြောင့် ရဲတွေက အဲဒီနေရာကို ပိတ်ဆို့ပြီး ရှာဖွေခဲ့ရပါတယ်။

နောက်ဆုံး ထွက်ပေါ်လာတဲ့ သတင်းတွေအရ သေနတ်သမားဟာ ကိုယ့်ကိုယ်ကိုယ် အဆုံးစီရင်ခဲ့တယ်လို့ ယူဆရတယ်လို့​ထိုင်းသတင်းဌာနအချို့က​ဖော်ပြပါတယ် ။

သေနတ်သမား ကျောင်းသားရဲ့ သေနတ်ဒဏ်ရာနဲ့ အလောင်းကိုတော့ သူ့ကိုယ်သူ ပိတ်ဆို့ထားတဲ့ အခန်းထဲမှာပဲ ရဲတွေက ရှာတွေ့ခဲ့ပါတယ်။ ပစ်ခတ်မှုမှာ အသုံးပြုခဲ့တယ်လို့ ယူဆရတဲ့ ပစ္စတို သေနတ်ရဲ့ ဓာတ်ပုံကလည်း လူမှုကွန်ရက်တွေပေါ် ထွက်ပေါ်လာပါတယ်။

ဒဏ်ရာရသူ ၁၅ ဦးထဲမှာလည်း အနည်းဆုံး ၁ ဦးရဲ့ အခြေအနေက စိုးရိမ်ရတယ်လို့ ဆိုပါတယ်။

အာဏာသိမ်း​ခေါင်း​ဆောင် မင်း​အောင်လှိုင် ဘန်​ကောက်မြို့ကို​ရောက်ရှိ​နေချိန်နဲ့ ဘန်​ကောက်မြို့အစွန်က​ကျောင်းမှာပစ်ခတ်မှုဖြစ်ပွားတာကတိုက်ဆိုင်​နေပါတယ်။ထိုင်းဝန်ကြီးချုပ် အနုတင်ဟာ ယမန်​နေ့က မင်း​အောင်လှိုင်ကို ​ကော်​​​ဇောနီခင်းကြိုဆိုခဲ့ပြီး နှစ်နိုင်ပူးတွဲ​ဆွေး​နွေးပွဲ​တွေ ၊စီးပွား​ရေးဖိုရမ်​တွေနဲ့ တစ်​နေကုန်အလုပ်များ​နေခဲ့တာဖြစ်ပါတယ်။ဒီ​နေ့မှာ​တော့ ​ဘန်​ကောက်မြို့နားက​ကျောင်းတွင်းပစ်ခတ်မှု​ကြောင့် အနုတင်အစိုးရရဲ့လက်နက်ထိန်းချုပ်မှုအ​ပေါ် ​မေးခွန်းထုတ်မှု​တွေပိုများလာပြီး ဖိအားများလာပြီဖြစ်ပါတယ် ။

ကိုးကား- Reporter ၊Khaosod