ရေဦးနဲ့ တန့်ဆည်က စစ်ရှောင်စခန်း ၄ ခုထက်မနည်း ရေမြုပ်ပြီး အကူအညီလိုအပ်နေ

သြဂုတ် ၁၀၊၂၀၂၆။ဇေအောင်/People’s Spring

စစ်ကိုင်းတိုင်း၊ ရေဦးနဲ့ တန့်ဆည်မြို့နယ်က စစ်ရှောင်စခန်း ၄ ခုထက်မနည်း ရေကြီးနစ်မြုပ်နေပြီး အရေးပေါ်အကူအညီတွေ လိုအပ်နေပါတယ်။

ရွှေဘိုခရိုင်အတွင်း ရေကြီးရေလျှံံမှုကြောင့် တန့်ဆည်မြို့နယ် အရှေ့ခြမ်းနဲ့ ရေဦး − တန့်ဆည်မြို့နယ်အစပ်က စစ်ရှောင်စခန်း ၄ခုဟာ ရေကြီးနစ်မြုပ်နေပြီး အခြေအနေဆိုးရွားနေကြောင်း ကူညီကယ်ဆယ်နေသူတွေက ပြောပါတယ်။

အဲဒီစခန်းတွေအတွက် ရိက္ခာ၊ ဆေးဝါး၊ စောင်နဲ့ ခြင်ထောင်တွေ အရေးပေါ်လိုအပ်နေတယ်လို့ ကူညီနေသူတွေက ပြောပါတယ်။

Public Service Announcement

“အခုကတော့ ရေဘေးသင့်ဒေသတွေမှာ ရေသန့် ရိက္ခာခြောက် ဝေဖို့ ပြင်နေပါတယ်။ပြီးတော့ တချို့နေရာတွေမှာ ထမင်းထုပ်ဝေတာတွေ ဆန်ဆီကူတာတွေ လုပ်နေပါတယ်။ ပြီးတော့ ရွေ့လျားဆေးခန်း ပတ်နေပါတယ်”လို့ စစ်ကိုင်းတိုင်းဒေသ သပိတ်အင်အားစု၊ အရေးပေါ်ကူညီတုံ့ပြန်ရေးအဖွဲ့က ကိုရှင်းသန့်က ပြောပါတယ်။

ရေဦးနဲ့ တန့်ဆည်အပြင် ဝက်လက်မြို့နယ်မှာလည်း စစ်ဘေးရှောင်တဲတွေ ရေကြီးနစ်မြုပ်နေပြီး အကူအညီတွေ လိုအပ်နေတယ်လို့ သိရပါတယ်။

လက်ရှိ စစ်ကိုင်းတိုင်းအတွင်း ဆည်ရေနဲ့ မူးမြစ်ရေတွေကြောင့် ကျေးရွာအများအပြား ရေကြီးနစ်မြုပ်နေပြီး ပြည်သူ ၇ ဦးထက်မနည်း သေဆုံးကာ သောင်းနဲ့ချီတဲ့ ပြည်သူတွေ ရေဘေးသင့်နေပါတယ်။