ရန်ကုန်မှာဝမ်း​​ရောဂါ​ဖြစ်ပွားသူဆက်တိုက်တိုး​နေ၊ကာလဝမ်းရောဂါပိုး​တွေ့လူနာ​တွေရှိ

သြဂုတ်-၁၂၊၂၀၂၆။တာရာ၊​ရောင်နီ/People’s Spring

ရန်ကုန်ဆေးရုံကြီးမှာ သြဂုတ် ၁၂ ရက်အထိဝမ်းပျက်ဝမ်း​ရောဂါ​ကြောင့် ဆေးကုသမှုခံယူနေရသူ (၂၀၀) ဝန်းကျင်ရှိပြီး ကာလဝမ်းရောဂါပိုး​တွေ့ရှိသူ ​တွေလည်းရှိတယ် လို့ ကျန်းမာ​ရေးဝန်ထမ်း​တွေ နဲ့ လူမှု​ရေးအသင်းအဖွဲ့က တာဝန်ရှိသူအချို့က​ပြောပါတယ် ။

ဝမ်းရောဂါပိုးကို လသာမြို့နယ်မှာစတွေ့ရှိခဲ့တာဖြစ်ပြီး ပန်းပဲတန်း၊ လမ်းမတော်၊ ပုဇွန်တောင်၊လှိုင်သာယာ၊တောင်ဒဂုံ၊ဒဂုံ(ဆိပ်ကမ်း) ၊ဒလ၊ သင်္ဃန်းကျွန်းမြို့နယ် အပါအဝင် အခြားမြို့နယ်တွေမှာလည်းဝမ်းပျက်ဝမ်းလျှောဖြစ်ပွားနေတယ်လို့ ကျန်းမာ​​ရေးဝန်ထမ်းတဦးက​ပြောပါတယ်။

“အခုလက်ရှိdown town ကအဖြစ်များတယ်။ဆေးရုံကြီးမှာလည်း တခြားသူတွေကူးမှာစိုးလို့ ပြင်ပလူနာဌာစပိတ်ပြီ ။ဆေးရုံကြီးအပြင်စံပြဆေးရုံ၊ မြောက်ဥက္ကလာ၊ပုဂ္ဂလိကဆေးရုံတွေမှာလည်း ဝမ်းရောဂါလူနာတွေကိုကုပေးနေရတယ်” လို့ ကျန်းမာ​ရေးဝန်ထမ်းတဦးက​ပြောပါတယ်။

Public Service Announcement

ဝမ်း​ရောဂါ ဖြစ်ပွားတဲ့လူနာအ​ရေအတွက် များပြီး ကာလဝမ်း​ရောဂါဖြစ်သူ ပြင်းထန်လူနာ​တွေလည်းရှိတယ်လို့သူကဆက်​ပြောပါတယ် ။ဒါ​ပေမယ့်ဝမ်း​ရောဂါဖြစ်လို့ဆေးရုံတက်​ရောက်ကုသ​နေရသူ အ​ရေအတွက်ကို​မ​ပြောပါဘူး ။

ဝမ်း​ရောဂါဖြစ်ပွား​နေတဲ့ မြို့နယ်တခုမှ လူမှူကူညီရေးအသင်းတာဝန်ရှိသူတဦးက​တော့”နှစ်ရာကျော်လောက်ရှိတယ်လို့ သိရပါတယ်။ ကိုဗစ်တုန်းကလုပ်ခဲ့တဲ့ tent (အ​ရေး​ပေါ်တဲ) အပြည့်နဲ့ ဆေးကုသဆောင်တွေမှာလည်း ထားတယ်လို့ သိရပါတယ်”လို့ သြဂုတ် ၁၂ ရက်ညမှာပြောပါတယ်။

ဝမ်း​ရောဂါဖြစ်ပွားသူ​တွေကို​ဆေးကုသဖို့ကူညီ​ပေး​နေတဲ့အခြားလူမှုကူညီ​ရေးအသင်းမှ တာဝန်ရှိသူတဦးကလည်း ကာလဝမ်းရောဂါပိုးတွေ့ရှိသူ ၉၀ ​ကျော်ရှိတယ်လို့အသိပေးထားပါတယ်။

ဝမ်းရောဂါစဖြစ်တဲ့လသာမြို့နယ် နဲ့ အခြားမြို့နယ်တွေကိုပိုးသတ်ဆေးတွေဖြန်းနေတယ်လို့သိရပါတယ် ။ဒါအပြင် ရန်ကုန်မြို့တွင်းမြို့နယ်​တွေက လမ်း​ဘေး အစားအ​သောက်​ရောင်းတဲ့သူ​တွေကို ​ဆေးစစ်ဖို့ စီစဥ်​နေတယ်လို့ ဆရာဝန်တဦးကဆိုပါတယ် ။

“လောလောဆယ်တော့ မိုးရာသီမှာ ဖြစ်လေ့ဖြစ်ထရှိတဲ့ ဝမ်းပျက်ဝမ်းလျှောရောဂါလို့ သတ်မှတ်ထားတယ်။ဒါပေမယ့်ဓာတ်ခွဲခန်းကိုနမူနာပေးပို့ပြီး စစ်​တော့ ကာလဝမ်းရောဂါပိုး စတွေ့တယ်။ သူတို့ကိုသီးသန့်ခွဲထားပြီးကုသပေးနေတယ်။ စိုးရိမ်စရာအခြေအနေတော့မရှိသေးပါဘူး” လို့ ကျန်းမာရေးဝန်ထမ်းတဦးကပြောပါတယ်။

ဝမ်း​ရောဂါကူးစက်တာဟာ မြို့တွင်းမြို့နယ်အချို့ကလမ်း​ဘေး အစားအစာ​ရောင်းတဲ့ဆိုင်​တွေက အစားအ​သောက်နဲ့ အဲဒီအစားအ​သောက်​တွေကို အိမ်အ​​ရောက်ပို့မှာစားတာ​တွေကကူးစက်မှုများတာလို့ ကျန်းမာ​ရေးဝန်ထမ်းတဦးက​ပြောပါတယ် ။

ဝမ်းပျက်ဝမ်းလျှောဖြစ်ပွားတဲ့ မြို့နယ်တွေက လမ်း​ဘေးမှာအစားအ​သောက်​ရောင်းတဲ့ဆိုင်တွေကို တစ်ပါတ်ခန့် ပိတ်ရမယ်လို့ စစ်တပ်လက်​အောက်ခံစည်ပင်ကညွှန်ကြားထားပါတယ်။

“တစ်ပါတ်ပိတ်ရမယ်လို့ပြောတယ်။ ပြန်ဖွင့်ရင်လည်း ဆိုင်ကိုသန့်သန့်ရှင်းရှင်းနဲ့ဖွင့်ရမယ်ပေါ့။ ကိုယ်တွေလည်းသန့်သန့်ရှင်းရှင်းရောင်း

ချတာပါ။ သူတို့ကရောဂါကိုအကြောင်းပြပြီး ဆိုင်တွေကိုရက်ရှည်ပိတ်ရဦးမယ်။ စျေးရောင်းမှစားရမှာ။ ဆိုင်ရက်ရှည်ပိတ်တော့ ကိုယ်တွေလည်းအဆင်မပြေဘူး” လို့ စျေးသည်တဦးကပြောပါတယ်။