စက်တင်ဘာ- ၆၊ ၂၀၂၆။ ထားမြတ်/People’s Spring
ကချင်ပြည်နယ်၊ ဗန်းမော်မြို့နယ်မှာ စက်တင်ဘာ ၄ရက်မနက်က စပြီးထိတွေ့တိုက်ပွဲတွေ ပြန်လည်စတင်ဖြစ်ပွားနေကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာနက ဖော်ပြပါတယ်။
KIA တပ်မဟာ(၃)နယ်မြေဖြစ်တဲ့ ဗန်းမော်မြို့ကို စစ်တပ်က လက်နက်ခဲယမ်း၊ ရိက္ခာနဲ့ စစ်ကူအင်အားတွေတင်ဆောင်လာတဲ့ သင်္ဘောအချို့ဆိုက်ရောက်လာပြီးနောက် တိုက်ပွဲတွေ ပြန်လည်စတင်ခဲ့တာလို့ ဆိုပါတယ်။
ဒါ့အပြင် KIA တပ်မဟာ(၁၁) တပ်ရင်း(၁၂)နယ်မြေ ရွှေကူမြို့နယ်ဘက်မှာလည်း စက်တင်ဘာ ၅ရက်အထိ တိုက်ပွဲတွေ ပြင်းထန်ခဲ့ကြောင်း ဖော်ပြပါတယ်။
Public Service Announcement
စက်တင်ဘာ ၅ရက်မှာ စင်းခန်းကျေးရွာအထက်ဘက် ဧရာ၀တီမြစ်ကြောင်းအတိုင်း စက်လှေတွေနဲ့တက်လာပြီး စင်းခန်းအနီး ခြေလျင် စစ်ကြောင်းထိုး ဝင်ရောက်လာတဲ့ စစ်ကောင်စီတပ်နဲ့KIA ပူးပေါင်းတပ်တို့ဟာ စင်းခန်းဘုန်းကြီးကျောင်းနဲ့ စင်းခန်းတံတား အနီး တိုက်ပွဲများ ဆက်လက်ပြင်းထန်ခဲ့တာလို့ ဆိုပါတယ်။
စစ်တပ်ဘက်က KIA ပူးပေါင်းတပ်များ စိုးမိုးထားတဲ့ နယ်မြေဘက်ကို ခြေလျင်စစ်ကြောင်းထိုး ဝင်ရောက်လာတဲ့အပြင် ဒရုန်းများ၊ လေကြောင်းများကို အသုံးပြု ပြင်းထန်စွာ ထိုးစစ်ဆင်နေပေမဲ့ KIA ပူးပေါင်းတပ်များ ဘက်က အပြင်းအထန် ခုခံတိုက်ခိုက်လျက်ရှိဟု အသိပေးပါတယ်။
ဒါ့အပြင် စစ်သင်္ဘောတွေ နောက်ထပ် မဝင်ရောက်လာစေနိုင်ဖို့အတွက် ရေကြောင်းလမ်းကြောင်းတွေ ပိတ်ဆို့တားဆီးတိုက်ခိုက်လျက်ရှိတယ်လို့ ဖော်ပြပါတယ်။
စက်တင်ဘာ ၄ရက်ကလည်း ရွှေကူမြို့နယ် ဇင်းဘုံဒေသမှာ စစ်တပ်နဲ့ KIA ပူးပေါင်းတပ်အကြား တိုက်ပွဲပြင်းထန်ခဲ့တယ်လို့ ဆိုပါတယ်။ ခလရ(၅၆)၊ ခမရ(၆၀၂)နဲ့ တပ်မ (၈၈) လက်အောက်ခံ ခမရ(၃၇၈)၊ ခမရ(၄၁၆)တပ်ရင်း ပူးပေါင်းစစ်ကြောင်းတွေက ဇင်းဘုံကျေးရွာဘက် ခြေလျင်စစ်ကြောင်းထိုးလာလို့ ထိတွေ့တိုက်ပွဲ ပြင်းထန်ခဲ့တာလို့ ဆိုပါတယ်။
ဒါ့အပြင် KIA ပူးပေါင်းတပ်က တိုက်ခိုက်လို့ ပျက်စီးခဲ့တဲ့ သင်္ဘောပေါ်က စစ်သားတွေဟာ စင်းခန်းကျေးရွာ အတွင်းဘက် ဝင်ရောက်လှုပ်ရှားလာလို့ စက်တင်ဘာ ၃ရက်မနက်မှာ တိုက်ပွဲဖြစ်ခဲ့တယ်လို့လည်း အသိပေးပါတယ်။
စက်တင်ဘာ ၂ရက်က အလံဖြူထောင်ဆန်တက်လာတဲ့ စစ်သင်္ဘောပေါ်က လက်နက်ခဲယမ်းများနဲ့အတူ စစ်ကောင်စီတပ်ဖွဲ့ဝင် ၁၀၅ဦး၊ ဝန်ထမ်းမိသားစုဝင် အမျိုးသမီး ၁၉ဦး၊ ကလေးငယ် ၅ဦး ဖမ်းမိထားကြောင်းလည်း ဖော်ပြပါတယ်။
စစ်တပ်ဟာ ဗန်းမော်မြို့ကို စစ်အင်အားဖြည့်တင်းဖို့ ရွှေကူမြို့ကနေ စက်တင်ဘာ ၂ရက်မှာ သင်္ဘောအုပ်စု ဆက်လက်ထွက်ခွာလာစဉ် KIA ပူးပေါင်းတပ်က တိုက်ခိုက်ခဲ့လို့ သင်္ဘော အများအပြား ထိခိုက်ပျက်စီးမီးလောင်တာ၊အချို့ နစ်မြုပ်တာ ရှိခဲ့ပါတယ်။
အဲဒီလို ထိခိုက်ပျက်စီးမှုများပြီး အထိနာခဲ့တဲ့ စစ်တပ်ဟာ စက်တင်ဘာ ၅ရက်မှာ မန္တလေးမြို့ကနေ စစ်သင်္ဘော တွေအပါအဝင် သင်္ဘော၃၀ခန့်နဲ့ ဧရာ၀တီ မြစ်ကြောင်းအတိုင်းဆက်လက်ဆန်တက်လာ လျက်ရှိပါတယ်။
