ကနေဒါဖက်က ပို့ကုန်အမျိုးအစားတချို့ တင်သွင်းခွင့်ကို အမေရိကန် ပိတ်ပင်

နှစ်နိုင်ငံကြား ကုန်သွယ်ရေးဆိုင်ရာ တင်းမာမှုတွေ မြင့်တက်လာတဲ့နောက် ကနေဒါရဲ့ ပို့ကုန်အမျိုးအစား တချို့ကို အမေရိကန်က တင်သွင်းခွင့် ပိတ်ပစ်လိုက်ပါတယ်။

ပြီးခဲ့တဲ့လက မြောက်အမေရိကတိုက်ရဲ့ အိမ်နီးချင်း မဟာမိတ် နှစ်နိုင်ငံကြား ကုန်သွယ်ရေးဆိုင်ရာ ဆွေးနွေးမှုတွေဟာ အပြီးသတ် အောင်မြင်မှု မရဘဲ ပျက်ပြယ်သွားခဲ့ပါတယ်။ အဲဒီနောက် အမေရိကန် သမ္မတ ဒေါ်နယ်လ်ထရမ့်က ကနေဒါရဲ့ ဒေါ်လာ ၂၀ ဘီလီယံဖိုးလောက် တန်ဖိုးရှိတဲ့ သွင်းကုန်တွေအပေါ် တန်ဖိုးရဲ့ ၅၀ ရာခိုင်နှုန်းထိ များပြားတဲ့ အခွန်ငွေတွေ တိုးမြှင့် စည်းကြပ်ခဲ့ပါတယ်။

အဲဒီနောက် ကနေဒါ အစိုးရဖက်ကလည်း တူတူညီညီ တုံ့ပြန်ခဲ့ပြီး စက်တင်ဘာ ၈ ရက်နေ့ကစလို့ သံမဏိထည်တွေ၊ ပရိဘောဂတွေ၊ ချည်သားတီရှပ်တွေ အပါအဝင် အမေရိကန်ရဲ့ ဒေါ်လာ ၂၀ ဘီလီယံဖိုးလောက် ပို့ကုန်တွေအပေါ် ၅၀ ရာခိုင်နှုန်းထိများပြားတဲ့ အခွန်စည်းကြပ်မှုတွေ သတ်မှတ်ခဲ့ပါတယ်။

အဲဒီနေ့မှာပဲ ထရမ့်က အထူးအမိန့်တွေကို ဆက်တိုက် လက်မှတ်ရေးထိုးပြီး အချိုရည်တွေ၊ ယမကာတွေ၊ နို့ထွက်ပစ္စည်းတွေ၊ မော်တော်ဆိုင်ကယ်တွေ အပါအဝင် ကနေဒါဆီက သွင်းကုန် အမျိုးအစားတချို့ တင်သွင်းခွင့်ကို ပိတ်ပင်စေခဲ့တာ ဖြစ်ပါတယ်။

Public Service Announcement

ထရမ့်က ကုန်သွယ်ရေးမှာ ကနေဒါဟာ အမေရိကန်အပေါ် မမျှမတ ဆက်ဆံနေတယ်လို့ စွပ်စွဲခဲ့သလို ကနေဒါ သွင်းကုန်တွေအပေါ် အမေရိကန်ရဲ့ ပိတ်ဆို့မှုဟာ စက်တင်ဘာ ၂၉ ရက်မှာ စတင် အသက်ဝင်လာမယ်လို့ ပြောကြားသွားပါတယ်။

ကနေဒါ ဝန်ကြီးချုပ် မတ်ခ်ကာနေးကတော့ သူ့နိုင်ငံဟာ အစဉ်အလာအရ အမေရိကန်နဲ့ အကြီးမားဆုံး အပြန်အလှန် ကုန်သွယ်မိတ်ဖက်တွေအဖြစ် ရပ်တည်နေမှုကနေ ဖယ်ခွာရတော့မယ်ဆိုရင် နှစ်ဖက်စလုံး ထိခိုက်နစ်နာမှုတွေ ရှိလာလိမ့်မယ်လို့ စက်တင်ဘာ ၈ ရက်နေ့မှာ မှတ်ချက်ပေးခဲ့ပါတယ်။

ကနေဒါရော၊ အမေရိကန်ကပါ နှစ်ဦးနှစ်ဖက် လက်ခံနိုင်မယ့် ကုန်သွယ်ရေး သဘောတူညီမှု တစ်ခုကို ရှာဖွေသွားဖို့ ဆန္ဒရှိကြောင်း အသီးသီး ပြောဆိုထားပေမယ့် ဆွေးနွေးမှုတွေ ပျက်ပြယ်ပြီးနောက်ပိုင်း နောက်ထပ် တွေ့ဆုံမှုတွေ ရှိမလာသေးပါဘူး။

ပုံမှန်အားဖြင့် ကနေဒါရဲ့ ပြည်ပပို့ကုန် အားလုံးရဲ့ သုံးပုံနှစ်ပုံဟာ အမေရိကန်ကို ရောက်ရှိသွားပါတယ်။ ဒါပေမဲ့ လတ်တလော နှစ်နိုင်ငံကြား တင်းမာမှုတွေကြောင့် ကုန်သွယ်ရေး ရပ်ဝန်းမှာ မှန်းဆရခက်တဲ့ အပြောင်းအလဲတွေလည်း ရှိလာနိုင်ပါတယ်။

ကနေဒါနဲ့ အမေရိကန် ကုမ္ပဏီတွေကတော့ နှစ်နိုင်ငံ အစိုးရတွေကြားက အားပြိုင်မှုဟာ ကုန်သွယ်ရေး စစ်ပွဲတစ်ခုအသွင် ကျယ်ပြန့်လာမှာကို အထူးတလည် စိုးရိမ်နေပါတယ်။ လက်ရှိ အခြေအနေထက် ပိုဆိုးလာမယ် ဆိုရင် ကုန်စျေးနှုန်းတွေက မြင့်တက်ပြီး အပြန်အလှန် ဝယ်ယူတင်သွင်းမှုတွေ သိသိသာသာ ကျဆင်းသွားနိုင်ကြောင်း စျေးကွက် သုတေသီတွေကလည်း သတိပေးထားပါတယ်။

ကိုးကား: BBC