စက်တင်ဘာ – ၁၁ ၊၂၀၂၆
အိန္ဒိယ ဝန်ကြီးချုပ် နာယန်ဒရာ မိုဒီနဲ့ ရုရှား သမ္မတ ဗလာဒီမာ ပူတင်တို့ဟာ အိန္ဒိယနိုင်ငံမြို့တော် နယူးဒေလီမြို့မှာ ဒီနေ့ (စက်တင်ဘာလ ၁၁ ရက်) သောကြာနေ့မှာ တွေ့ဆုံခဲ့ကြပါတယ်။
ဒါဟာ နှစ်နိုင်ငံ ခေါင်းဆောင်တွေကြား နှစ်ပတ်အတွင်း ဒုတိယမြောက် တွေ့ဆုံမှုဖြစ်ပြီး ကုန်သွယ်ရေး၊ စွမ်းအင်နဲ့ ကာကွယ်ရေးဆိုင်ရာ ပူးပေါင်း ဆောင်ရွက်မှုတွေကို အဓိကထား ဆွေးနွေးခဲ့တယ်လို့ အိန္ဒိယ အစိုးရက ထုတ်ပြန်ပါတယ်။
ပူတင်ဟာ အိန္ဒိယမှာ ကျင်းပတဲ့ BRICS ညီလာခံကို တက်ရောက်ရင်း မိုဒီနဲ့ လူချင်းတွေ့ခဲ့တာ ဖြစ်ပါတယ်။ BRICS ညီလာခံကို တရုတ် သမ္မတ ရှီကျင့်ဖျင်နဲ့ အီရန် သမ္မတ မာဆုဒ်ပက်ဇက်ရှ်ခန်းတို့လို အဖွဲ့ဝင် နိုင်ငံ ခေါင်းဆောင်တွေလည်း တက်ရောက်လာပါတယ်။
Public Service Announcement
BRICS ဆိုတာက အမေရိကန်နဲ့ အနောက်နိုင်ငံတွေက ကမ္ဘာ့စီးပွားရေး နယ်ပယ်ကို လက်ဝါးကြီး အုပ်ထားတဲ့အပေါ် စိန်ခေါ်ဖို့ ရည်ရွယ်ပြီး ဘရာဇီး၊ ရုရှား၊ အိန္ဒိယ၊ တရုတ်နဲ့ တောင်အာဖရိကတို့က စတင်ဖွဲ့စည်းခဲ့တဲ့ အစုအဖွဲ့လည်း ဖြစ်ပါတယ်။
ဒေလီမှာ မတွေ့ဆုံခင် ဩဂုတ် ၃၁ ရက်နေ့တုန်းကလည်း ကာဂျစ္စတန်နိုင်ငံ၊ ဘစ်ရှ်ကက်မြို့မှာ ကျင်းပတဲ့ ရှန်ဟိုင်း ပူးပေါင်းဆောင်ရွက်ရေးအဖွဲ့ ညီလာခံမှာ မိုဒီနဲ့ ပူတင်တို့ တွေ့ဆုံခဲ့ပါသေးတယ်။
တရုတ်နဲ့ အိန္ဒိယတို့ဟာ ရုရှားဆီက ရေနံအများဆုံး ဝယ်ယူတဲ့ နိုင်ငံတွေဖြစ်ပြီး အဲဒီအခြေအနေကြောင့်ပဲ ရုရှားဟာ ယူကရိန်း စစ်ပွဲနဲ့ ပတ်သက်လို့ အနောက်နိုင်ငံတွေရဲ့ ပြင်းထန်တဲ့ စီးပွားရေး ပိတ်ဆို့မှုတွေကို တောင့်ခံနိုင်ခဲ့ပါတယ်။
ပူတင်ဟာ မနှစ်က ဒီဇင်ဘာလတုန်းကလည်း အိန္ဒိယကို အလည်အပတ် ခရီးစဉ် ရောက်ရှိလာခဲ့ဖူးပါတယ်။ ပြီးတော့ နှစ်နိုင်ငံကြား ကုန်သွယ်ရေးနဲ့ ကာကွယ်ရေးဆိုင်ရာ ပူးပေါင်း ဆောင်ရွက်မှုတွေ မြှင့်တင်ဖို့ သဘောတူညီမှု ရရှိခဲ့ပါတယ်။
ကိုးကား – Reuters
