စက်တင်ဘာ – ၂၀ ၊၂၀၂၆ ၊နိုင်ပကောင်း/People’s Spring
ကရင်ပြည်နယ်နဲ့ မွန်ပြည်နယ်အစပ်မှာရှိတဲ့ကြသောင်းဆိပ်ရွာက စာသင်ကျောင်းကိုမနေ့ (စက်တင်ဘာ ၁၉ ရက်)ညပိုင်းကအာဏာသိမ်းစစ်တပ်ကဗုံးကြဲတာကြောင့်စာသင်ကျောင်းနဲ့ နေအိမ်အချို့ ထိခိုက်ပျက်စီးသွားခဲ့တယ်လို့ ဒေသခံတွေဆီက သိရပါတယ်။
မနေ့ ညနက်ပိုင်း ၁၁ နာရီခွဲအချိန်ခန့်က ဒုံသမိချောင်းခြားထားတဲ့ မွန်ပြည်နယ်၊ဘီးလင်းမြို့နယ်၊ကြသောင်းဆိပ်အနောက်ရွာနဲ့ ကရင် ပြည်နယ်၊ ဘားအံမြို့နယ်၊ ကြသောင်းဆိပ်အရှေ့ရွာတွေဘက်ကို တိုက်လေယာဉ်နဲ့ ဗုံးကြဲတာပါ။
ဗုံးကြဲခံရတဲ့နေရာတွေဟာ ကရင်အမျိုးသားအစည်းအရုံး( KNU ) တပ်မဟာ( ၁) စစ်ရေးလှုပ်ရှားရာနယ်မြေဖြစ်ပြီး တိုက်ပွဲမဖြစ်ဘဲ ဗုံးကြဲတာလို့ ဒေသခံအချို့ကဆိုပါတယ်။
Public Service Announcement
အဲဒီလေကြောင်းတိုက်ခိုက်မှုကြောင့် ကြသောင်းဆိပ်အနောက်ရွာက စာသင်ကျောင်းတစ်ကျောင်းနဲ့ အနီးဝန်းကျင်က နေအိမ်အချို့ ထိခိုက်ပျက်စီးသွားခဲ့ပေမယ့် လူထိခိုက်မှုတော့ မရှိဘူးလို့ KNU တပ်မဟာ (၁ )သတင်းရင်းမြစ်က အသိပေးပါတယ်။
ကြသောင်းဆိပ်ရွာဟာအိမ်ခြေငါးရာခန့် ရှိတဲ့ရွာတစ်ရွာပါ။
KNU ဒူးသထူ(သထုံ)ခရိုင်၊ တပ်မဟာ (၁) စစ်ရေးလှုပ်ရှားရာ နယ်မြေအတွင်းမှာစစ်တပ်ရဲ့လက်နက်ကြီးပစ်ခတ်မှုနဲ့ ဗုံးကြဲမှုတွေကြောင့် ပြီးခဲ့တဲ့ ဩဂုတ်လ ၂၂ ရက်ကနေ စက်တင်ဘာ ၁၀ ရက်နေ့အထိ ကလေးနှစ်ဦး သေဆုံးခဲ့ပြီး ၁၂ ဦး ဒဏ်ရာရခဲ့တယ်လို့ KNU ဒူးသထူခရိုင်က သတင်းထုတ်ပြန်ထားပါတယ်။
ဒါအပြင် စစ်တပ်ရဲ့ထိုးစစ်ကြောင့် အခုနှစ် ဧပြီလကနေ ဇွန်လအတွင်း KNU တပ်မဟာ (၁) နယ်မြေထဲမှာ နေရပ်စွန့်ခွာထွက်ပြေးရတဲ့ ဒေသခံစစ်ရှောင်ဦးရေဟာ၁၄၀,၀၀၀ ကျော်ရှိနေတယ်လို့ ကရင်အရပ်ဖက်အဖွဲ့ (KPSN )ရဲ့ အချက်အလက်မှတ်တမ်းမှာ ဖော်ပြထားပါတယ်။
