အောက်တိုဘာ ၁၊ ၂၀၂၆။ ထားမြတ်/People’s Spring
အာဏာသိမ်းစစ်တပ်ဟာ ဗန်းမော်အကျဉ်းထောင်က အကျဉ်းသားတွေကို လူသားဒိုင်းအဖြစ် အသုံးပြုတဲ့ လုပ်ရပ်တွေ ကျူးလွန်နေကြောင်း ထွက်ပြေးလွတ်မြောက်လာတဲ့ အကျဉ်းသားက ထွက်ဆိုကြောင်း ကချင်လွတ်လပ်ရေးတပ်မတော်(KIO/KIA) သတင်းပြန်ကြားရေးဌာနက ဖော်ပြခဲ့ပြီး စစ်တပ်က သင်္ဘောနဲ့ ခေါ်တင်လာတဲ့ အကျဉ်းသားတွေလည်း တိုက်ပွဲဖြစ်ချိန် ရေထဲခုန်ချ ထွက်ပြေးလို့ လွတ်မြောက်လာသူတွေရှိတယ်လို့ အသိပေးပါတယ်။
ဗန်းမော်အကျဉ်းထောင်က အကျဉ်းသားတွေကို စစ်တပ်က လုံခြုံရေးအတွက် လူသားဒိုင်းအဖြစ် အသုံးပြုနေကြောင်း အကျဉ်းထောင်မှ လွတ်မြောက်လာသူ ဦးအိုက်စိုးက ပြောဆိုခဲ့တယ်လို့ KIA က ဖော်ပြခဲ့တာဖြစ်ပါတယ်။
ကချင်ပြည်နယ် ဗန်းမော်မြို့ကို စစ်အင်အားဖြည့်ဖို့ မန္တလေးကနေ ဆန်တက်လာစဉ်ကလည်း စစ်တပ်ဟာ ပြည်သူတွေနဲ့အတူ ရောနှောတက်လာသလို ဗန်းမော်မြို့မှ ပြန်စုန်ဆင်းချိန်မှာလည်း မီးမတော်တဆဖြစ်ရင် ငြိမ်းသက်ရန်ဟုဆိုကာ အကျဉ်းသားများအား လူသားဒိုင်းအဖြစ် တင်ဆောင်သွားတာ ဖြစ်တယ်လို့ ဆိုပါတယ်။
Public Service Announcement
သင်္ဘောနဲ့ စုန်ဆင်းလာချိန် KIA ပူးပေါင်းတပ်ရဲ့ တိုက်ခိုက်မှုကြောင့် တိုက်ပွဲဖြစ်ပွားခဲ့ရာ ရွှေကူမြို့အနီးမှာ အကျဉ်းသား ဦးအိုက်စိုးက ရေထဲခုန်ချပြီး စစ်တပ်လက်မှ လွတ်မြောက်လာတာဖြစ်ကြောင်းဖော်ပြပါတယ်။ ဦးအိုက်စိုးနဲ့အတူ အခြားအကျဉ်းသား ၇၀ ကျော်လည်း ရေထဲခုန်ချ လွတ်မြောက်သွားကြောင်း KIAက အသိပေးပါတယ်။
“ဗန်းမော်အကျဉ်းထောင်ထဲက တချို့ တွေကို လွှတ်တာရှိပါတယ်။ လွှတ်ပေမဲ့လည်း သူတို့နဲ့အတူတူ မန္တလေး ရောက်ရမယ် ဆိုပြီးသူတို့(စစ်ကောင်စီတပ်) အမိန့်တွေ ချပေးတာ။ ဆိုတော့ အကျဉ်းသားတွေလည်း မန္တလေးဘက်ကို လိုက်သွားရတာဖြစ်ပါတယ်တဲ့။ ဆိုတော့ အဲဒီလမ်းကြားမှာ ကျနော်တို့ ကြားဖြတ်ပြီး တိုက်ခိုက်တဲ့နေရာမှာ သင်္ဘောမြုပ်သွားတဲ့နေရာမှာ ပါတာလည်း သေသွားတာ အများကြီးပါတယ်လို့ ပြောတယ်” လို့ KIO/KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောပါတယ်။
အကျဉ်းသားတွေကို စုန်ဆင်းလာတဲ့သင်္ဘောတွေပေါ် မျှတင်လာတာဖြစ်ပြီး သင်္ဘောတိုက်ခိုက်ခံရပြီး မီးလောင်တဲ့အခါ မီးသတ်ဖို့ စေခိုင်းခဲ့တာလို့ ဆိုပါတယ်။
“မန္တလေးရောက်ပြီးမှ ကိုယ့်အိမ်ကိုယ် ပြန်ရောက်တဲ့ သူတွေလည်း တော်တော်များများတော့ရှိတယ်လို့ ပြောပါတယ်” လို့ ဗိုလ်မှူးကြီးနော်ဘူက ပြောကြားပါတယ်။
ဗန်းမော်အကျဉ်းထောင်မှာ အကျဉ်းသား ၄၀၀ ကျော်ကျန်ရှိနေပြီး အကျဉ်းသားတွေဟာ သင်္ဘောပေါ်မှ ပစ္စည်းတွေ သယ်ပေးရတာ၊ ခေါင်းစဉ်အမျိုးမျိုးတပ် ငွေကောက်ခံခြင်း၊ ငွေမပေးနိုင်သူတွေကို ရိုက်နှက်တာ ဒဏ်ပေးတာရှိခဲ့တယ်လို့ လွတ်မြောက်အကျဉ်းသား ဦးအိုက်စိုးက ထွက်ဆိုကြောင်း KIA သတင်းပြန်ကြားရေးဌာနက ဖော်ပြပါတယ်။
ဒါ့အပြင် သင်္ဘောရိက္ခာ မရောက်ခင် အကျဉ်းသားတွေဟာ ပြောင်းဖူးများသာ လနဲ့ချီ စားခဲ့ရလို့
ကျန်းမာရေးထိခိုက်သူတွေရှိသလို ဖျားနာသူတွေကို ဆေးကုသပေးတာမရှိဘူးလို့လည်း သတင်းဖော်ပြထားပါတယ်။
အာဏာသိမ်းစစ်တပ် သင်္ဘောတွေဟာ ဩဂုတ်လကုန်ပိုင်းမှာ ကချင်ပြည်နယ်ကို ဝင်ရောက်လာတာဖြစ်ပြီး ကသာ-ရွှေကူကြား၊ ရွှေကူ-ဗန်းမော်ကြားမှာ KIA ပူးပေါင်းတပ်က တိုက်ခိုက်ခဲ့ပါတယ်။ ဒါ့အပြင် စက်တင်ဘာ ဒုတိယပတ်ကစပြီး ဗန်းမော်မြို့ကနေ သင်္ဘောတွေ ပြန်စုန်ဆင်းခဲ့ရာ KIA ပူးပေါင်းတပ်က ထပ်မံတိုက်ခိုက်ခဲ့ပါတယ်။ အဲဒီလို တိုက်ခိုက်မှုတွေကြောင့် သင်္ဘောတွေ မီးလောင်၊ နစ်မြုပ်၊ ပျက်စီးတာတွေရှိခဲ့ပြီး KIA သတင်းပြန်ကြားရေးဌာနရဲ့ ဖော်ပြချက်အရ စက်တင်ဘာ ရေကြောင်းတိုက်ပွဲအတွင်း စစ်တပ်သင်္ဘော အစီး ၂၀ခန့် ထိခိုက်ပျက်စီးနစ်မြုပ်ခဲ့တယ်လို့ ဆိုပါတယ်။
စစ်တပ်ဟာ ဗန်းမော်မြို့ကို စစ်အင်အားဖြည့်တင်းရာမှာ အရပ်သားသင်္ဘောတွေကိုပါ အဓမ္မ ခေါ်ဆောင်အသုံးပြုခဲ့ရာ တိုက်ခိုက်ခံရလို့ ပျက်စီးခဲ့တဲ့ သင်္ဘောတွေထဲမှာလည်း ပုဂ္ဂလိကပိုင် သင်္ဘောများစွာ ပါဝင်ကြောင်း KIAက အသိပေးထားပါတယ်။
