အောက်တိုဘာ-၁ ၊၂၀၂၆။ခိုင်မြတ်/People’s Spring
စစ်တွေတိုက်ပွဲမှာ အထိနာနေတဲ့စစ်တပ်ဟာ စစ်တွေနဲ့ ထိစပ်နေတဲ့ကျောက်တော်အပါအဝင် ရခိုင်ပြည်နယ်က ၆မြို့နယ်ကို လေယာဉ်အုပ်လိုက်နဲ့ ဗုံးထပ်ကြဲခဲ့တာကြောင့် အရပ်သား ပြည်သူ ၁ ဦး သေဆုံးပြီး ၁၀ ဦးထက်မနည်း ဒဏ်ရာရခဲ့တယ်လို့ ဒေသခံတွေကပြောပါတယ်။
အောက်တိုဘာ၁ရက်၊နေ့လယ်ပိုင်းမှာကျောက်တော်မြို့နယ်၊ဇီးချောင်းဆည်အနီးတဝိုက်၊ သကြားစက်ဘုန်းတော်ကြီးကျောင်း၊ ကျောက်ဖြူမြို့နယ်၊စနဲမြို့အနီးတဝိုက် နဲ့ သံတွဲမြို့ပေါ် အမှတ်(၆)ဗောဓိကုန်းရပ်ကွက်တို့ ကိုစစ်တပ်က ဗုံးကြခဲ့တာကြောင့် သံတွဲမြို့မှ ဒေသခံနှစ်ဦး ဒဏ်ရာရခဲ့ပါတယ်။
“ကျောက်တော်ကိုထပ်လာကြဲတာ။ ဘယ်လောက်တောင်အငြိုးထားနေလဲမသိ။ဂျက်သုံးစီး၊ Y12 တစ်စီးနဲ့တောင် လာကြဲတယ် ၊ အသံတွေဟိန်းပြီးတော့ လိပ်ပြာတောင် စင်မလား မသိဘူး။ ဘုန်းကြီးကျောင်းကိုကျတယ်ပြောတယ်။ အဲဒီကျောင်းမှာလည်း ဘုန်းကြီးတပါးတည်း ရှိတာ။လူလည်း မရှိဘူး” လို့ ကျောက်တော်ဒေသခံတဦးက ပြောပါတယ်။
Public Service Announcement
ဒါ့အပြင်စက်တင်ဘာလ ၃၀ ရက်နေ့ညမှာလည်း ပေါက်တောမြို့ပေါ်ရပ်ကွက်တွေ၊ ပုဏ္ဏားကျွန်းမြို့နယ် ကျောက်ဆိပ်ရွာနဲ့ မြို့အနီးဝန်းကျင်နေရာတွေ၊ ရသေ့တာင်မြို့နယ် ဂူတောင်ကျေးရွာတို့ကိုဗုံးကြဲခဲ့ပါတယ်။
ရသေ့တာင်မြို့နယ်၊ ဂူတောင်ရွာကိုဗုံးကြဲတာကြောင့်ဂူတောင်ရွာမှ အသက် ၅၀ နှစ်အရွယ်ဦးအောင်ထွန်းသိန်း သေဆုံးခဲ့ပြီး အသက် ၄၂ နှစ် အရွယ် ဒေါ်ဝင်းနု ဒဏ်ရာရခဲ့ပါတယ်။
ဒါ့အပြင်ပုဏ္ဏားကျွန်းမြို့နဲ့ ကျောက်ဆိပ်ရွာကိုဗုံးကြဲတာကြောင့် ရွာမှ ၂၆ နှစ်အရွယ်မခင်ခင်သန်း နဲ့ ပုဏ္ဏားကျွန်းမြို့မှ ၄ နှစ်အရွယ် စစ်ဘေးရှောင် မောင်နေကျော်လင်းတို့ ဒဏ်ရာရခဲ့ပါတယ်။
အလားတူ ပေါက်တောမြို့ပေါ် ဗုံးကြဲတာကြောင့် အသက်၅၄ နှစ်အရွယ် ဒေါ်လှကျော့ယဉ်၊ အသက် ၆၆ နှစ်အရွယ် ဒေါ်မသန်း၊အသက် ၂၆ နှစ်အရွယ် မခင်ခင်ဌေး၊အသက် ၄၃ နှစ်အရွယ် ဒေါ်မနွယ်စိုး နဲ့ အသက် ၄၀နှစ် အရွယ်ဒေါ်မချေတို့လည်းဒဏ်ရာရခဲ့ပါတယ်။
“မနေ့က၉နာရီလောက်ကတည်းက လေယာဉ်တွေ ပတ်ကြဲနေခဲ့တာ။ ပုဏ္ဏားကျွန်းကိုကြဲတယ်။နောက်ရသေ့တောင်ကိုကြဲတယ်။လူတွေကတော့ ဟိုဘက်ကမ်းတွေကို ကြဲနေတာဆိုပြီး သိပ်အလေးမထားကြဘူး။ အဲဒီမှာ ၁၂ နာရီလောက်ကျတော့ ပေါက်တောမြို့ထက်ကိုပါ Y12 နဲ့ လာကြဲသွားတယ်။ ဗုံးအလုံး တဆယ်ကျော်တယ်” လို့ ပေါက်တော်မြို့ပေါ်မှာ နေထိုင်သူတဦးက ပြောပါတယ်။
အာဏာသိမ်းစစ်တပ်က စက်တင်ဘာ ၃၀ ရက်နေ့ ညနေပိုင်းမှာ စစ်တွေမြို့နယ်နဲ့ ပုဏ္ဏားကျွန်းမြို့နယ်အစပ်ဝါဘိုကျွန်းနဲ့ကွမ်းတောင်ရွာအနီးတိုက်ပွဲအတွင်း အင်အားသုံးဆယ်ဝန်းကျင်ရှိ စစ်ကြောင်းတခုလုံး သေဆုံးခဲ့ပြီးနောက် အရပ်သားလူနေ မြို့ရွာတွေကို ဗုံးပတ်ကြဲနေခဲ့တာဖြစ်ပါတယ်။
“စစ်ကို စစ်နဲ့တူအောင် တိုက်ဖို့လိုတယ်။အခု မင်းအောင်လှိုင်တို့စစ်တပ်လုပ်နေတာက ရွံစရာတော်တော်ကောင်း တယ်။ ဒီကောင်တွေကို ခိုင်နှိုင်းစရာစကားလုံးတောင် မမြင်ဘူး” လို့ရသေ့တာင်မြို့နယ်မှလူငယ်တဦးက ပြောပါ တယ်။
စစ်တပ်စခန်းတွေ လက်လွှတ်၊ အထိနာနေတဲ့ စစ်တပ်ဟာ လေယာဉ်အုပ်လိုက်အသုံးပြုကာ တိုက်ပွဲဆက်စပ် နေရာတွေအပြင် ရခိုင်ပြည်နယ်အတွင်းက အရပ်သားနေရာတွေကိုပါ လေကြောင်းဗုံးကြဲမှုတွေ ဆက်တိုက်လုပ်နေပါတယ်။ပြီးခဲ့တဲ့ စက်တင်ဘာ ၂၈ ရက်နေ့ကလည်း ကျောက်တော်မြို့ရှိကစ္ဆပနဒီတံတားနဲ့အိန္ဒိယစျေးနဲ့ တို့ကို ပေါင်ငါးရာ ဗုံးနှစ်လုံးကြဲချခဲ့တာကြောင့်ကိုယ်ဝန်ဆောင်မိခင်၊ ကလေးငယ်၊ အမျိုးသမီး၊ ရိုဟင်ဂျာတွေအပါအဝင်အပြစ် မဲ့အရပ်သားပြည်သူ ၅၀ ထက်မနည်း သေဆုံးပြီး ၆၀ ကျော် ဒဏ်ရာရခဲ့ပါတယ်။
လူထုနွေဦးက ကောက်ယူပြုစုထားတဲ့အချက်အလက်တွေအရ စစ်တပ်ရဲ့ တန်ပြန်စစ်ဆင်ရေးစတဲ့ စက်တင်ဘာ ၄ ရက်နေ့ ကနေအောက်တိုဘာ ၁ ရက်နေ့အထိ တစ်လခန်အတွင်း စစ်တပ်လက်ချက်ကြောင့် သေဆုံးရတဲ့ ရခိုင်ဒေသခံ အရပ်သားပြည်သူ ၆၂ ဦးနဲ့ ထိခိုက်ဏ်ရာရသူ ၁၀၆ ဦးထက်မနည်း ရှိနေပြီဖြစ်ပါတယ်။
