တားမြစ်ထားတဲ့ နေရာကို ဖြတ်သန်းဝင်ရောက်မှုအတွက် အိန္ဒိယ ပိုးဟပ် နိုင်ငံရေး လှုပ်ရှားမှုရဲ့ ခေါင်းဆောင်ပိုင်းနှစ်ဦး ထောင် ၅ ရက်စီ ကျသွားကြောင်း သိရပါတယ်။
အရှူတော့ရှ်ရန်ကာနဲ့ ဆူရက်ဗ်ဒက်စ်တို့ဟာ ဒေလီမြို့တော် ရဲတပ်ဖွဲ့က ဆန္ဒပြသူတွေ မဝင်ရောက်နိုင်အောင် တားမြစ်ထားတဲ့ ဂျန်တန်မန်တာ ဧရိယာမှာ အတားအဆီးတွေကို ကျော်ဝင်ခဲ့တဲ့အတွက် အောက်တိုဘာ ၁၄ ရက်နေ့မှာ အဖမ်းခံခဲ့ရပါတယ်။ အောက်တိုဘာ ၁၄ ရက်နေ့မှာတော့ ပိုးဟပ်ပြည်သူ့ပါတီ (CJP)က သူတို့နှစ်ဦး ထောင် ၅ ရက်စီ အချခံရတဲ့ သတင်းကို အတည်ပြုခဲ့ပါတယ်။
CJPဟာ အာဏာရ ဘာရတ်တီယာ ဂျန်နက်တာ ပါတီ (BJP)ကို သရော်ပြီး လူငယ်အများစု စုဖွဲ့ထားတဲ့ နိုင်ငံရေး လှုပ်ရှားမှု တစ်ခုဖြစ်ပြီး တရားဝင် နိုင်ငံရေးပါတီတစ်ခု မဟုတ်ပါဘူး။ CJP ခေါင်းဆောင် အက်ဘ်ဟီဂျိ ဒစ်ပ်ကီက လူမှုကွန်ရက်ပေါ် တင်ထားတဲ့ ဗီဒီယိုမှာတော့ ရန်ကာနဲ့ ဒက်ဗ်တို့ နှစ်ဦးဟာ အတားအဆီးတွေကို ကျော်လွှားပြီး နိုင်ငံတော် အလံကို ကိုင်ရင်း ဂျန်တန်မန်တာက လမ်းတစ်လမ်းထဲ ဝင်ပြေးပြီး ရဲတွေက သူတို့ကို လိုက်လံ ဖမ်းဆီးခဲ့တာကို တွေ့ရပါတယ်။
ပြီးခဲ့တဲ့ ရက်ပိုင်းအတွင်းက အတိုက်အခံ နိုင်ငံရေး အင်အားစုတွေနဲ့ CJPတို့ဟာ ရွေးကောက်ပွဲ ကော်မရှင် ဥက္ကဋ္ဌ နုတ်ထွက်ပေးဖို့ ဆန္ဒပြ လှုပ်ရှားမှုတွေ လုပ်ဆောင်နေခဲ့ပြီး ရဲတွေကလည်း လူစုလူဝေး ကြီးထွားမလာအောင် နည်းလမ်းမျိုးစုံနဲ့ တားဆီးနေခဲ့ပါတယ်။
Public Service Announcement
ဆန္ဒပြသူတွေ အပါအဝင် လူပေါင်းထောင်နဲ့ချီ အဖမ်းခံရတာကြောင့် အကြီးစား ဆန္ဒပြပွဲတွေ ဖြစ်မလာပေမယ့် မြို့တော် ဒေလီမှာတော့ ပြောက်ကျားသပိတ်ဆန်ဆန် ချီတက်မှုတွေ ဆက်လက် ဖြစ်ပွားနေဆဲပါ။
ရွေးကောက်ပွဲ ကော်မရှင်ဟာ အိန္ဒိယ ရွေးကောက်ပွဲ မဲစာရင်းတွေမှာ လူသန်းပေါင်းများစွာရဲ့ နာမည်တွေကို ပယ်ဖျက်ပြီး ဝန်ကြီးချုပ် နာယန်ဒရာ မိုဒီရဲ့ (BJP)ပါတီ အနိုင်ရစေဖို့ ကူညီပေးခဲ့ကြောင်း အတိုက်အခံတွေက စွပ်စွဲထားပါတယ်။ ဒါကြောင့်လည်း ကော်မရှင် အကြီးအကဲ ဂျန်နက်ရှ်ကူးမား နုတ်ထွက်ပေးဖို့ ဆန္ဒပြ တောင်းဆိုနေကြတာပါ။ အစိုးရနဲ့ ကော်မရှင်ဖက်ကတော့ စွပ်စွဲမှုတွေကို ငြင်းဆိုထားပါတယ်။
ဒေလီမြို့လယ်က ဆန္ဒပြသူတွေ စုဝေးလေ့ရှိတဲ့ ဂျန်တန်မန်တာ ဧရိယာမှာတော့ ရဲအင်အား ထူထူထပ်ထပ် ချထားပြီး လူစုလူဝေး ဖြစ်မလာအောင် တားဆီးနေကြဆဲပါ။ နေရာအနှံ့မှာလည်း ဆေးအဝါ သုတ်ထားတဲ့ လမ်းအတားအဆီးတွေကို ချထားတာ တွေ့ရပါတယ်။
ဒစ်ပ်ကီကတော့ ထောင် ၅ ရက် အချခံခဲ့ရတဲ့ ရန်ကာနဲ့ ဒက်စ်တို့ဖက်က ကာကွယ်ရပ်တည်ခဲ့သလို ဝန်ကြီးချုပ် မိုဒီအနေနဲ့ နည်းနည်းပါးပါး သတ္တိရှိသင့်ကြောင်း လူမှုကွန်ရက်ပေါ်မှာ လှောင်ပြောင် ရေးသားထားခဲ့ပါတယ်။
ကိုးကား: AFP
